కీర్తనలు 146:1-10
146 యెహోవాను* స్తుతించండి!*+
నా ప్రాణమా, యెహోవాను స్తుతించు.+
2 నా జీవితమంతా నేను యెహోవాను స్తుతిస్తాను.
నేను బ్రతికున్నంత కాలం నా దేవుణ్ణి స్తుతిస్తూ పాటలు పాడతాను.*
3 రాజుల* మీద గానీ, మనుషుల మీద గానీ నమ్మకం పెట్టుకోకండి,వాళ్లు రక్షణను తీసుకురాలేరు.+
4 వాళ్ల ఊపిరి* వెళ్లిపోతుంది, వాళ్లు తిరిగి మట్టికి చేరుకుంటారు;+ఆ రోజే వాళ్ల ఆలోచనలు కూడా నశించిపోతాయి.+
5 సహాయం కోసం యాకోబు దేవునికి మొరపెట్టే వాళ్లు,*+తమ దేవుడైన యెహోవా మీద ఆశపెట్టుకునే వాళ్లు ధన్యులు;*+
6 ఆయనే భూమ్యాకాశాల్ని,సముద్రాన్ని, వాటిలో ఉన్న వాటన్నిటినీ తయారుచేశాడు,+ఆయన ఎప్పటికీ నమ్మకంగానే ఉంటాడు;+
7 మోసగించబడిన వాళ్లకు న్యాయం చేసేది,ఆకలిగా ఉన్నవాళ్లకు ఆహారం ఇచ్చేది ఆయనే.+
యెహోవా ఖైదీల్ని* విడుదల చేస్తున్నాడు.+
8 యెహోవా గుడ్డివాళ్ల కళ్లు తెరుస్తున్నాడు;+యెహోవా కృంగిపోయిన వాళ్లను పైకి లేపుతున్నాడు;+యెహోవా నీతిమంతుల్ని ప్రేమిస్తాడు.
9 యెహోవా పరదేశుల్ని కాపాడుతున్నాడు;ఆయన తండ్రిలేని పిల్లల, విధవరాళ్ల బాగోగులు చూసుకుంటున్నాడు,+అయితే దుష్టుల పన్నాగాల్ని ఆయన అడ్డుకుంటాడు.*+
10 యెహోవా ఎప్పటికీ రాజుగా ఉంటాడు,+సీయోనూ, నీ దేవుడు తరతరాలు రాజుగా ఉంటాడు.
యెహోవాను* స్తుతించండి!*
అధస్సూచీలు
^ అక్ష., “యా.” ఇది యెహోవా పేరుకు సంక్షిప్త రూపం.
^ లేదా “హల్లెలూయా!”
^ లేదా “సంగీతం వాయిస్తాను.”
^ లేదా “అధిపతుల; ప్రముఖుల.”
^ పదకోశంలో “రూ-ఆహ్; న్యూమా” చూడండి.
^ లేదా “సంతోషంగా ఉంటారు.”
^ లేదా “యాకోబు దేవుడు తమకు సహాయకుడిగా ఉన్న వాళ్లు.”
^ అక్ష., “బంధించబడిన వాళ్లను.”
^ లేదా “దుష్టుల మార్గాన్ని ఆయన వంకర చేస్తాడు.”
^ అక్ష., “యా.” ఇది యెహోవా పేరుకు సంక్షిప్త రూపం.
^ లేదా “హల్లెలూయా!”