కీర్తనలు 21:1-13

  • యెహోవాపై నమ్మకముంచే రాజుకు దీవెనలు

    • రాజుకు దీర్ఘాయుష్షును ఇవ్వడం (4)

    • దేవుని శత్రువులు ఓడిపోతారు (8-12)

సంగీత నిర్దేశకునికి సూచన. దావీదు శ్రావ్యగీతం. 21  యెహోవా, నీ బలాన్ని బట్టి రాజు ఉల్లసిస్తున్నాడు;+నీ రక్షణ కార్యాల్ని బట్టి అతను ఎంతో ఉల్లసిస్తున్నాడు!+  2  నువ్వు అతని హృదయ కోరికను తీర్చావు,+అతని పెదాల విన్నపాన్ని కాదనలేదు. (సెలా)  3  నువ్వు అతన్ని ఆశీర్వదించి, మంచివాటిని అతనికి ఇచ్చావు;అతని తల మీద మేలిమి* బంగారు కిరీటాన్ని పెట్టావు.+  4  అతను నిన్ను ఆయుష్షు ఇవ్వమని అడిగాడు,నువ్వు అతనికి దీర్ఘాయుష్షును, శాశ్వత జీవితాన్ని ఇచ్చావు.+  5  నీ రక్షణ కార్యాలు అతనికి ఎంతో మహిమను తీసుకొస్తాయి.+ ఘనతను, వైభవాన్ని నువ్వు అతనికి అనుగ్రహిస్తావు.  6  అతను ఎప్పటికీ దీవించబడేలా చేస్తావు;+నీ సన్నిధిలో అతన్ని ఆనందింపజేస్తావు.+  7  ఎందుకంటే, రాజు యెహోవా మీద నమ్మకముంచాడు;+సర్వోన్నతుని విశ్వసనీయ ప్రేమను బట్టి, అతను ఎన్నడూ కదల్చబడడు.*+  8  నీ చెయ్యి నీ శత్రువులందర్నీ పట్టుకుంటుంది;నీ కుడిచెయ్యి నిన్ను ద్వేషించేవాళ్లను పట్టుకుంటుంది.  9  నువ్వు వాళ్లమీద దృష్టిపెట్టే సమయంలో వాళ్లను అగ్నితో నాశనం చేస్తావు. యెహోవా తన కోపంతో వాళ్లను మింగేస్తాడు, అగ్ని వాళ్లను దహించేస్తుంది.+ 10  నువ్వు భూమ్మీద లేకుండా వాళ్ల వంశస్థుల్ని నాశనం చేస్తావు,మనుషుల్లో నుండి వాళ్ల సంతానాన్ని నిర్మూలిస్తావు. 11  వాళ్లు నీకు కీడు చేయాలనుకున్నారు;+వాళ్లు పన్నాగాలు పన్నారు, కానీ అవి ఫలించవు.+ 12  నువ్వు నీ విల్లును వాళ్ల* మీదికి ఎక్కుపెట్టి, వాళ్లు పారిపోయేలా చేస్తావు.+ 13  యెహోవా, లేచి నీ బలాన్ని చూపించు. నీ గొప్ప శక్తిని స్తుతిస్తూ మేము పాటలు పాడతాం.*

అధస్సూచీలు

లేదా “శుద్ధి చేయబడిన.”
లేదా “తడబడడు.”
అక్ష., “వాళ్ల ముఖాల.”
అక్ష., “పాడతాం, సంగీతం వాయిస్తాం.”