Mga Salmo 96:1-13
96 Pagkanta kan Jehova hin bag-o nga kanta.+
Pagkanta kan Jehova, bug-os nga tuna!+
2 Pagkanta kan Jehova; dayawa an iya ngaran.
Ipasamwak an maopay nga sumat han iya pagtalwas kada adlaw.+
3 Ipahayag an iya himaya ha mga nasud,An iya urusahon nga mga buhat ha ngatanan nga mga katawohan.+
4 Hi Jehova harangdon ngan takos gud dayawon.
Mas urusahon gud hiya* kay han ngatanan nga iba pa nga dios.
5 An ngatanan nga dios han mga katawohan waray pulos nga mga dios,+Pero hi Jehova amo an naghimo han langit.+
6 Ha iya presensya aada an pagkaharangdon* ngan kadungganan;+An kusog ngan kaanyag aada ha iya santuaryo.+
7 Ihatag kan Jehova an angay ha iya, kamo nga mga pamilya han mga katawohan,Ihatag kan Jehova an angay ha iya tungod han iya himaya ngan kusog.+
8 Ihatag kan Jehova an himaya nga angay ha iya ngaran;+Pagdara hin regalo ngan sulod ha iya mga bungsaran.
9 Yukbo* kan Jehova nga sul-ot an iyo baraan nga mga bado;*Pangurog ha iya atubangan, bug-os nga tuna!
10 Ipasamwak ha mga nasud: “Hi Jehova nagin Hadi!+
An tuna* marig-on nga gin-establisar, diri ito mababalhin.*
Iya huhukman* hin patas an mga katawohan.”+
11 Magrayhak an langit, ngan magkalipay an tuna;Maghagubuhob an dagat ngan an ngatanan nga aada hito;+
12 Magrayhak an kaumhan ngan an ngatanan dida hito.+
Ha pariho nga panahon magsinggit hin malipayon an ngatanan nga kahoy ha kagurangan+
13 Ha atubangan ni Jehova, kay tiabot* hiya,Tiabot hiya basi maghukom ha tuna.
Huhukman niya an inuukyan nga tuna* uyon ha katadongan+
Ngan an mga katawohan uyon ha iya pagkamatinumanon.+
Mga footnote
^ O “nakakaaghat hiya hin hilarom nga respeto nga may kahadlok.”
^ O “dignidad.”
^ O “Pagsingba.”
^ O posible nga “tungod han kadungganan han iya pagkabaraan.”
^ O “mabungahon nga tuna.”
^ O “diri ito mauuy-og.”
^ O “didepensahan.”
^ O “inabot na.”
^ O “an mabungahon nga tuna.”