Mga Salmo 21:1-13
Para ha direktor. Kanta ni David.
21 O Jehova, tungod han imo kusog an hadi nagrarayhak;+Duro gud an iya pagrayhak tungod han imo mga pagtalwas!+
2 Imo iginhatag ha iya an hingyap han iya kasingkasing,+Ngan waray ka magbaribad han hangyo han iya mga im-im. (Selah)
3 Kay imo hiya gintapo hin hura nga mga bendisyon;Imo ginsul-otan an iya ulo hin korona nga maopay nga klase hin* bulawan.+
4 Naghangyo hiya ha imo hin kinabuhi, ngan imo ito iginhatag ha iya,+Hilawig nga kinabuhi,* ha kadayonan, oo ha kadayonan.
5 An imo mga pagtalwas naghahatag ha iya hin daku nga himaya.+
Gintatagan mo hiya hin dignidad ngan dungog.
6 Imo hiya ginbibendisyonan ha kadayonan;+Ginpapalipay mo hiya pinaagi han kalipay ha imo presensya.*+
7 Kay an hadi nasarig kan Jehova;+Tungod han maunungon nga gugma han Gihitaasi, diri gud hiya mababay-og.*+
8 Madadakop han imo kamot an ngatanan mo nga kaaway;Madadakop han imo too nga kamot an mga nangangalas ha imo.
9 Imo hira hihimoon pariho hin naglalaga nga hudno ha itinanda nga panahon han imo pag-usisa.
Lalamuyon hira ni Jehova tungod han iya kasina, ngan mauugtang hira han kalayo.+
10 Bubungkagon mo an ira katulinan* ha tuna,Ngan an ira mga anak tikang ha mga anak han mga tawo.
11 Kay nagsari hira ha pagbuhat hin maraot kontra ha imo;+Naghimo hira hin mga plano nga diri maglalampos.+
12 Kay imo hira paaatrason+Pinaagi ha pagpuntirya han imo bawog* ngadto ha ira.*
13 Buhát, O Jehova, tungod han imo kusog.
Magkakanta kami hin mga pagdayaw* ha imo pagkagamhanan.
Mga footnote
^ O “ginpurog nga.”
^ Lit., “Hilawig nga mga adlaw.”
^ Lit., “nawong.”
^ O “diri gud hiya mababantad (mauuy-og).”
^ Lit., “bunga.”
^ Lit., “imo mga higot han bawog.”
^ Lit., “ha ira mga nawong.”
^ O “Magkakanta kami nga ginduduyogan hin mga instrumento.”
