Mga Salmo 74:1-23
Maskil* ni Asap.+
74 O Dios, kay ano nga iginsalikway mo kami ha kadayonan?+
Kay ano nga an imo kasina naglalaga* kontra ha panon ha imo panabsaban?+
2 Hinumdumi an katawohan* nga nagin imo panag-iya hin maiha na nga panahon,+An tribo nga imo gintubos sugad nga imo panurundon.+
Hinumdumi an Bukid Zion nga imo gin-ukyan.+
3 Kadto ha mga kagubaan nga magpapadayon hin maiha nga panahon.+
Ginruba han kaaway an ngatanan dida ha baraan nga lugar.+
4 An imo mga kakontra nan-gugliat ha sulod han imo lugar nga katirokan.+
Nagbutang hira han ira kalugaringon nga mga bandera sugad nga mga tigaman didto.
5 Pariho hira hin kalalakin-an nga nagamit hin mga atsa basi pamudlon an kakahoyan ha kagurangan.
6 Ira ginruba an ngatanan nga inukit hito+ gamit an mga atsa ngan mga kabra.
7 Ira ginsunog an imo santuaryo.+
Ira ginpasiparahan an tabernakulo nga nagdadara han imo ngaran, ginrumpag ito ngada ha tuna.
8 Hira ngan an ira mga anak nagsiring ha ira kasingkasing:
“An ngatanan nga lugar nga katirokan han Dios* ha tuna kinahanglan sunugon.”
9 Waray mga tigaman nga aton makikita;Waray na bisan usa nga propeta,Ngan waray bisan usa ha aton an maaram kon tubtob san-o ini matatapos.
10 O Dios, tubtob san-o an kaaway padayon nga magtatamay?+
An kaaway ba magpapasipara han imo ngaran ha kadayonan?+
11 Kay ano nga imo ginpupugngan an imo kamot, an imo too nga kamot?+
Igawas ito ha imo dughan* ngan pooha hira.
12 Pero an Dios an akon Hadi tikang pa hadto,Hiya an nagbubuhat hin mga pagtalwas ha tuna.+
13 Imo gin-ukay an dagat pinaagi han imo kusog;+Imo gindugmok an mga ulo han dagku nga mga linarang ha dagat.
14 Imo gindugmok an mga ulo han Leviatan;*Iginhatag mo ito sugad nga pagkaon ha katawohan nga naukoy ha mga disyerto.
15 Imo gin-abrihan an mga burabod ngan an mga sapa;+Imo ginpahubas an nag-iinawas nga mga salog.+
16 Imo an adlaw, pati an gab-i.
Ikaw an naghimo han kalamrag* ngan han adlaw.+
17 Ikaw an nagbutang han ngatanan nga tubtoban ha tuna;+Ikaw an naghimo han katpaso ngan kathagkot.+
18 Hinumdumi an mga pagtamay han kaaway, O Jehova,Kon paonan-o an lurong nga katawohan nagpapasipara ha imo ngaran.+
19 Ayaw itubyan an kinabuhi* han imo tukmo ngadto ha ihalas nga mga hayop.
Ayaw hingalimti ha kadayonan an kinabuhi han imo nag-aantos nga katawohan.
20 Hinumdumi an kasabotan,Kay an magsirom nga mga lugar ha tuna napuno han kamadarahog.
21 An tinalumpigos diri unta bumaya nga pakyas;+An ubos ngan an pobre magdayaw unta han imo ngaran.+
22 Buhát, O Dios, ngan depensahi an imo kaso.
Hinumdumi kon paonan-o ka gintatamay han lurong ha bug-os nga adlaw.+
23 Ayaw hingalimti an ginsisiring han imo mga kakontra.
An aringasa han mga nakontra ha imo pirme naabot ha langit.
Mga footnote
^ Lit., “nag-aaso.”
^ Lit., “imo komunidad.”
^ O “An ngatanan nga lugar diin ginsisingba an Dios.”
^ O “tikang ha mga pilo han imo bado.”
^ O “han kapawa.”
^ O “kalag.”
