Mga Salmo 41:1-13
Para ha direktor. Kanta ni David.
41 Malipayon an bisan hin-o nga nagpapakita hin konsiderasyon ha ubos nga tawo;+Tatalwason hiya ni Jehova ha adlaw han kasakitan.
2 Babantayan hiya ni Jehova ngan titipigan hiya nga buhi.
Ipapahayag hiya nga malipayon dida ha tuna;+Diri mo gud hiya itutubyan ha pagbuot* han iya mga kaaway.+
3 Bubuligan hiya ni Jehova dida ha iya higdaan samtang may sakit hiya;+Durante han iya pagkasakit bug-os mo nga liliwanan an iya higdaan.
4 Kay ako nagsiring: “O Jehova, ipakita ha akon an imo pagkabuotan.+
Tambala ako,*+ kay nakasala ako ha imo.”+
5 Pero an akon mga kaaway nagyayakan hin maraot mahitungod ha akon:
“San-o hiya mamamatay basi hingalimtan na an iya ngaran?”
6 Kon an usa ha ira nabisita ha akon, an iya kasingkasing nagyayakan hin buwa.
Namimiling hiya hin maraot nga masisiring mahitungod ha akon;Katapos nalarga hiya ngan iginpapanumat ito ha iba.
7 An ngatanan nga nangangalas ha akon naghuhuringhuringay;Nagpaplano hira hin maraot kontra ha akon:
8 “May maraot nga nahitabo ha iya;Yana nga nahigda hiya, diri na hiya makakabuhát.”+
9 Bisan an akon duok nga sangkay, an usa nga akon gintaporan,+Nga kaupod ko ha pagkaon han akon tinapay, nagtraydor ha akon.*+
10 Pero ikaw, O Jehova, ipakita ha akon an imo pagkabuotan ngan buligi ako nga makabangon,Basi masirotan ko hira ha ira ginbuhat.
11 Mahibabaroan ko nga nalilipay ka ha akon pinaagi hini:
Kon an akon kaaway diri makasinggit tungod han kadaogan kontra ha akon.+
12 Tungod han akon integridad imo ako ginbubuligan;+Imo ako titipigan ha imo presensya ha kadayonan.+
13 Hinaot dayawon hi Jehova, an Dios han Israel
Tubtob ha kadayonan.+
Amen ngan Amen.
