Mga Salmo 135:1-21
135 Dayawa hi Jah!*
Dayawa an ngaran ni Jehova;Paghatag hin pagdayaw, kamo nga mga surugoon ni Jehova,+
2 Kamo nga natindog ha balay ni Jehova,Ha mga bungsaran han balay han aton Dios.+
3 Dayawa hi Jah, kay hi Jehova maopay.+
Pagkanta hin mga pagdayaw* ha iya ngaran, kay makalilipay ito.
4 Kay ginpili ni Jah hi Jacob para ha iya kalugaringon,An Israel sugad nga iya espesyal nga propyedad.*+
5 Kay maaram gud ako nga harangdon hi Jehova;An aton Ginoo mas labaw kay ha ngatanan nga iba nga dios.+
6 Ginbubuhat ni Jehova an ngatanan nga karuyag niya buhaton+Ha langit ngan ha tuna, ha kadagatan ngan ha ngatanan nga kahiladman.
7 Ginpapaigbaw niya an mga dampog* tikang ha mga sidsid han tuna;Nagpapakidlat hiya upod* han uran;Ginpapagawas niya an hangin tikang ha iya mga bodega.+
8 Iya ginpamatay an mga suhag ha Ehipto,An suhag han tawo ngan hayop.+
9 Nagpadara hiya hin mga tigaman ngan mga milagro ngada ha imo, O Ehipto,+Kontra ha Paraon ngan ha ngatanan niya nga surugoon.+
10 Iya ginbungkag an damu nga nasud+Ngan ginpatay an gamhanan nga mga hadi+
11 —Hi Sihon nga hadi han mga Amorita,+Hi Og nga hadi han Basan,+Ngan an ngatanan nga ginhadian han Canaan.
12 An ira tuna iya iginhatag sugad nga panurundon,Usa nga panurundon han Israel nga iya katawohan.+
13 O Jehova, an imo ngaran nagpapabilin ha kadayonan.
O Jehova, an imo kabantogan* nagpapabilin ha ngatanan nga henerasyon.+
14 Kay hi Jehova magdidepensa ha iya katawohan,+Ngan mapaid* hiya ha iya mga surugoon.+
15 An mga idolo han mga nasud silber ngan bulawan,Ginhimo han mga kamot han tawo.+
16 May baba hira, pero diri hira nakakayakan;+May mga mata, pero diri hira nakakakita;
17 May mga talinga hira, pero diri hira nakakabati.
Waray gininhawa ha ira baba.+
18 An mga tawo nga naghihimo ha ira magigin pariho ha ira,+Sugad man an ngatanan nga nasarig ha ira.+
19 O panimalay ni Israel, dayawa hi Jehova.
O panimalay ni Aaron, dayawa hi Jehova.
20 O panimalay ni Levi, dayawa hi Jehova.+
Kamo nga may kahadlok kan Jehova, dayawa hi Jehova.
21 Dayawon unta hi Jehova tikang ha Zion,+An Dios nga naukoy ha Jerusalem.+
Dayawa hi Jah!+
Mga footnote
^ O “Hallelujah!” “Jah” an ginpahalipot nga porma han ngaran nga Jehova.
^ O “Pagkanta nga ginduduyogan hin mga instrumento.”
^ O “ginpapabilhan gud nga panag-iya.”
^ O “mga alisngaw.”
^ O posible nga “Naghihimo hiya hin mga arawasan para.”
^ O “ngaran.” Lit., “handumanan.”
^ O “magbabasol.”
