Salmo 7:1-17
-
Si Jehova et matunong ya Ukom
-
“Ukom mo ak pa, O Jehova” (8)
-
Tagleey* nen David a kinansion tod si Jehova nipaakar ed saray imbaga nen Cus a Benjaminita.
7 O Jehova a Dios ko, sika so pansasalimbengan ko.+Iyagel mo ak pa ed amin a mamapasegsegang ed siak tan iliktar mo ak.+
2 No andi et bingbingkasen da ak* a singa gagawaen na leon,+Tan alaen da ak tan anggapoy mangiliktar ed siak.
3 O Jehova a Dios ko, no siak so akankasalanan ed saya,No walay ginawak ya ag-inkahustisya,
4 No nanggawa ak na mauges ed samay manggagaway maong ed siak,+Odino sinamsaman kon anggapoy makasengeg so kabusol ko,*
5 Pausilan tan paerel mo ak* ed kalaban ko;Paulyan mon gatin-gatinan to ak* diad dalinTan paandien toy kagalangan ko diad dabok. (Selah)
6 O Jehova, alagey ka lapud sanok mo;Talindeg ka sumpad saramay onsasanok a kakabusol ko;+Bangon ka parad siak, tan iganggan mon nagaway hustisya.+
7 Paulyan mon paliberan ka na saray nasyon;Tan manlapud tagey et onkiwas ka sumpad sikara.
8 Si Jehova so mansentensia ed totoo.+Ukom mo ak pa, O Jehova, unong ed inkatunong koTan unong ed integridad ko.+
9 Panganggam komon iray gagawaen na mauges.Balet say matunong et pagmaliw mon maligen,+Ta sikay matunong a Dios+ a manuusisa ed saray puso+ tan sankaaraleman ya emosyon.*+
10 Say Dios so samper ko,+ say Manangiliktar na saramay maptek-impanpuso.+
11 Say Dios et matunong ya Ukom,+Tan inagew-agew ton iyaabawag iray panangukom to.
12 No agmagbabawi so sakey a too,+ iyubol na Dios so espada to;+Pinaten toy pana to, tan ipuntirya to.+
13 Iparaan to ray makapatey ya armas to;Ipuntirya to ray mandarlang a pana to.+
14 Nengneng mo may nanlukon na kaugsan;Sikatoy nannginew na gulo tan angiyanak na katilaan.+
15 Sikatoy nankotkot na abot tan pinaaralem to,Balet sikatoy napelag ed mismon abot a ginawa to.+
16 Say gulon ginawa to et ompawil ed mismon ulo to;+Say inkaruksa to et ondapod toktok na ulo to.
17 Idayew koy Jehova lapud inkahustisya to;+Kansionan ko na panangidayew so* ngaran nen Jehova,+ say Sankatagyan a Dios.+
Paimanod leksab
^ Odino “Kansion parad paneermen.”
^ Odino “so kamarerwak.”
^ Odino posiblin, “Balet ta pinaulyan ko labat imay onsusumpad siak ya anggapoy makasengeg.”
^ Odino “so kamarerwak.”
^ Literal, “so bilay ko.”
^ Odino “a manusubok ed saray puso tan bato.”
^ Odino “Mantogtog tan mangansion ak parad.”
