Salmo 104:1-35
104 Idayew ko* si Jehova.+
O Jehova a Dios ko, makapadinayew ka.+
Akawesan kay katagyan* tan karlangan.+
2 Akasulong ed sikan singa kawes so liwawa;+Ibubuskag mon singa abel a tolda so katawenan.+
3 Iiyan mo ray biga na ayaman mo diad tapew na saray danum ed tagey,*+Gagawaen mon karwahe iray lurem,+Onaabante ka diad panamegley na saray payak na dagem.+
4 Saray anghel mo et gagawaen mon makapanyarin puersa,*Saray lingkor mo et gagawaen mon apoy a mangaakmon.+
5 Inletneg moy dalin diad saray pundasyon to;+Ag-itan nagalaw diad pasen to* ya anggad angga.+
6 Sinakbongan mo itan na araralem a danum a singa kawes.+
Saray danum et sinakoban day kapalandeyan.
7 Diad pasnok mo et binmatik ira;+Diad tanol na karol mo et kinmuyat ira ed takot
8 —Inmatagey iray palandey+ tan inmabeba iray lawak—Paonlad pasen ya inletneg mo parad sikara.
9 Angiyan ka na ketegan, a ditan et ag-ira nayarin onlampas,+Pian agda lan balot sakbongan so dalin.
10 Papapawayen mo ray subol diad saray lawak;*Diad leet na saray palandey et manag-agus ira.
11 Mangitatarya ra na danum parad amin ya atap ya ayep ed uma;Naaandi inkapgaan na saray atap ya asno.
12 Diad abay da so panuubongan na saray siwit ed tawen;Unuuni ira diad saray sanga na masalompapak a kakiewan.
13 Manlapud saray ayaman mod tagey et sasalogen mo ray palandey.+
Say dalin et napno na bunga na saray kimey mo.+
14 Patutuboen mo ray dika parad ayayepTan saray tanaman ya onkana ed katooan,+Pian napawalay naakan diad dalin
15 Tan alak a mamapaliket ed puso na too,+Larak a mamapasileng ed lupa to,Tan tinapay a mamepenek ed puso to.+
16 Naynay a nasasalog iray kiew nen Jehova,Saray sedro na Lebanon ya intanem to,
17 A ditan manggagawa na ubong iray siwit.
Saray kiew ya enebro so ayaman na dulakak.+
18 Saray ataragey a palandey so ayaman na saray atap a kanding;+Saray angkakabaleg a bato so amotan na saray kuneho ed kabatoan.+
19 Ginawam so bulan a panandaan ed saray aturon panaon;Say agew et amta to no kapigan onselek.+
20 Papawalaen moy bilunget, tan onlalabi,+Diad satan et manliberliber so amin ya atap ya ayep ed katakelan.
21 Saray malangwer a leon* et managlem no walay labay dan buagen+Tan manaanap iray naakan da manlapud Dios.+
22 Sano ombubutay so agew,Ompapawil tan ondudukol irad saray ayaman da.
23 Say too et oonlad trabaho to,Tan mankikimey anggad labi.
24 Agaylay karakel na saray kimey mo, O Jehova!+
Amin iratan et ginawam ed karunongan.+
Say dalin et napno na saray ginawam.
25 Wadtan so dayat ya araldalem tan maawa-awang,A kawalaan na agnabilang a mabilay a bengatla, saray angkekelag tan angkakabaleg.+
26 Ditan ombiabiahe iray barko,Tan say Leviatan*+ a pinalsam pian manlangoylangoy ditan.
27 Amin da et manaalagar ed sikaPian ikdan mo ray naakan diad panaon a nakaukolan da.+
28 Saray iiter mo et titiponen da.+
Sano ilulukas moy limam et napepenek ira na maong iran bengatla.+
29 Sano iyaamot moy lupam, nagugulo ra.
No ekalen moy espiritu ra, ompatey ira tan ompawil irad dabok.+
30 No ibakim so espiritum,* napalsa ira,+Tan pasisimbaloen moy tapew na dalin.
31 Say gloria nen Jehova et mansiansia ya anggad angga.
Panliketan nen Jehova iray kimey to.+
32 Sikatoy onnenengneng ed dalin tan onggigiwgiw itan;Didiwiten to ray palandey tan onaasewek iratan.+
33 Kansionan ko si Jehova+ diad interon bilay ko;Kansionan ko na panangidayew so* Dios ko legan a mabilay ak.+
34 Komon ta saray nononoten ko et makapaliket ed sikato.*
Manliket ak lapud si Jehova.
35 Saray makasalanan et naandi ed dalin,Tan anggapo lay naromog a mauges.+
Idayew ko* si Jehova. Idayew yoy Jah!*
Paimanod leksab
^ Odino “kagalangan.”
^ Odino “na kamarerwak.”
^ Literal, “diad saray danum.”
^ Literal, “espiritu.”
^ Odino “Ag-itan natentenyeg.”
^ Odino “saray kulos.”
^ Odino “Saray mabiskeg tan malangwer a leon.”
^ Tutukoyen na saya so aktibon puersa na Dios.
^ Odino “Mantogtog tan mangansion ak parad.”
^ Odino posiblin, “Komon ta makapaliket so panagdalepdep ko nipaakar ed sikato.”
^ Odino “na kamarerwak.”
^ Odino “Hallelujah!” Say “Jah” et pinatikey a ngaran a Jehova.
