Salmo 149:1-9
149 Idayew yoy Jah!*
Kansionan yo si Jehova na sakey a balon kansion;+Idayew yo diad kongregasyon na saray matoor.+
2 Say Israel et manliket komon lapud Makapadinayew a Dios a nanggawad sikato;+Saray anak na Sion et manggayaga komon lapud Ari ra.
3 Idayew da komon so ngaran to a walay pansasayaw+Tan kansionan da na panangirayew,* a bansagan day tamburin tan arpa.+
4 Ta panliliketan nen Jehova so totoo to.+
Papagalangan to ray mauyamo diad pangililiktar tod sikara.+
5 Manliket komon iray matoor lapud nigloria ira;Oneyag ira komon ed liket diad saray dukolan da.+
6 Saray kansion a mangirarayew ed Dios et ompaway komon ed sangi ra,Tan bembenan da komon so duaray-tarem ya espada,
7 Pian balesen da ray nasyonTan dusaen da ray totoo,
8 Pian nigulonggulong da ray arari raTan nikadena da ray gagalangen a totoo ed limog da,
9 Tan nidapo ra so panangukom a nisulat sumpad sikara.+
Sayan kagalangan et walad amin a matoor ed sikato.
Idayew yoy Jah!*
Paimanod leksab
^ Odino “Hallelujah!” Say “Jah” et pinatikey a ngaran a Jehova.
^ Odino “mantogtog tan mangansion ira parad sikato.”
^ Odino “Hallelujah!” Say “Jah” et pinatikey a ngaran a Jehova.
