Salmo 17:1-15
Pikakasi nen David.
17 Dengel mo pay ikekerew koy hustisya, O Jehova;Imanom pay ikekerew koy tulong;Dengel mo pay pikakasik ya imbalikas kon andiay panamalikdo.+
2 Manggawa ka komon na matunong a desisyon parad siak;+Nanengneng mo komon no antoy duga.
3 Inusisam so pusok, sinurim ak diad labi;+Dinalisay mo ak;+Naromog mo ya anggapoy ginetmak a mauges,Tan agnankasalanan so sangik.
4 Nipaakar ed gagawaen na totoo,Unong ed imbagam, pinaliisan ko ray dalan na matakew.+
5 Panakar mo ak pa ed saray basbas mo,Pian agnatiror iray salik.+
6 Ontatawag ak ed sika, O Dios, ta amtak ya ebatan mo ak.+
Ikiling mo pad siak so layag mo.* Dengel mo pa ray ibabagak.+
7 Ipatnag mo komon so matoor a panangarom diad makapakelaw a paraan,+O Manangiliktar na saramay pasasalimbengan ed kawanan a limamManlapud saramay manrerebelde ed sika.
8 Alwaran mo ak pa a singa bukel na matam;+Iyamot mo ak diad silong na saray payak mo.+
9 Iyagel mo ak pa ed saray mauges ya onaataki ed siak,Ed saray mamubusol ed siak a kalaban ko* ya akapaliber ed siak.+
10 Naandian ira na pakalikna;*Panaglastog so ompapaway ed sangi ra;
11 Natan et papaliberan da kami;+Manaalagar iray pankanawnawa pian nitumba da kami.*
12 Sikatoy singa leon a labalabay ton bingbingkasen so biktima to,Tan singa sakey a mabiskeg a leon ya akakebkeb a manatambang.
13 Alagey ka, O Jehova, pian sikatoy labanan mo+ tan itumbam;Iliktar mo ak* ed mauges diad panamegley na espadam;
14 Iliktar mo ak pa ed panamegley na limam, O Jehova,Diad saray totoo ed sayan mundo,* a say betang da et diad sayan bilay,+Saramay pepeneken mo na saray maong a bengatlan itataryam+Tan saramay mangititilak na tawir ed dakdakel ya ananak da.
15 Balet siak, nanengneng koy lupam lapud inkatunong ko;Maliket ak a diad ibangon ko et wadtan ka.+
Paimanod leksab
^ Odino “Yuko ka tan dengel mo ak.”
^ Odino “kakabusol a sumpad kamarerwak.”
^ Odino “Abalkot ira na mismon taba ra.”
^ Odino “ibalsak da kami ed dalin.”
^ Odino “so kamarerwak.”
^ Odino “sistema na bengabengatla.”
