Salmo 16:1-11
Miktam* nen David.
16 Iyagel mo ak, O Dios, ta sika so pansasalimbengan ko.+
2 Imbagak ed si Jehova: “Sika si Jehova, say Lapuan na kamaongan ko.
3 Tan saray masanto ed dalin,Saramay kagalgalang, so mamapaliket a maong ed siak.”+
4 Saramay ontutumbok ed sananey a dirios et ompalaloy ermen da.+
Agak balot mangibales na dala ya iyaapay da,Tan agko bitlaen so ngaran da.*+
5 Si Jehova so nabebetangan ko, say apag ko,+ tan say kopak.+
Sikay mangaasikaso ed tawir ko.
6 Marakdakep iran pasen so asukat parad siak.
On, maliket ak ed tawir ko.+
7 Idayew koy Jehova, a mamibilin ed siak.+
Anggan diad labi et ipepetek ak na sankaaraleman a kanonotan ko.*+
8 Naynay a walad arapan ko si Jehova.+
Agak balot nagalaw,* lapud sikatoy walad nikawanan ko.+
9 Kanian magayaga so pusok, malikeliket ak.*
Tan manbilay ak* a walaay kaligenan.
10 Ta agmo ak itilak ed* Lubok.*+
Samay matoor ed sika et agmo abuloyan a nanengneng toy abot.*+
11 Impaamtam ed siak so dalan na bilay.+
Diad arapan mo* et walay baleg a gayaga;+Diad nikawanan mo et walay liket ya anggad angga.
Paimanod leksab
^ Salanti, ngaran na palson dirios.
^ Odino “sankaaraleman ya emosyon ko.” Literal, “saray batok.”
^ Odino “Agak balot natugingging (natentenyeg).”
^ Literal, “so gloriak.”
^ Literal, “manayam so laman ko.”
^ Odino “paulyanan so kamarerwak ed.”
^ Odino posiblin, “nanengneng toy kabubulok.”
^ Literal, “Diad lupam.”
