Salmo 9:1-20
Parad direktor; diad tono na Muth-labben.* Kansion nen David.
א [Aleph]
9 O Jehova, idayew ta ka diad interon pusok;Ipaamtak so amin a makapakelaw a gawam.+
2 Manliket ak tan manggayaga ak lapud sika;Kansionan ko na panangidayew so* ngaran mo, O Sankatagyan a Dios.+
ב [Beth]
3 Sano onaatras iray kakabusol ko,+Natumba ra tan ompatey irad arapan mo.
4 Ta idedepensam so kanepegan ko;Akayurong kad tronom a manguukom diad inkatunong.+
ג [Gimel]
5 Kinondenam iray nasyon+ tan dineral mo so mauges,A binural moy ngaran da ya anggad angga.
6 Say kabusol et aderal la ya anggad angga;Sigpot mon pinaandi iray syudad da,Tan anggapo lan balot so pakanodnonotan ed sikara.+
ה [He]
7 Balet si Jehova et akayurong ed trono to ya anggad angga;+Inletneg ton malet so trono to parad hustisya.+
8 Ukomen to ray manaayam ed dalin diad inkatunong;+Sikatoy mangipaakseb na matunong iran desisyon parad saray nasyon.+
ו [Waw]
9 Si Jehova et magmaliw a maligen a salimbengan* ed samay napapairap,+Sakey a maligen a salimbengan diad panaon na gonigon.+
10 Saramay kabat day ngaran mo et manmatalek ed sika;+Agmon balot taynan iramay manaanap ed sika, O Jehova.+
ז [Zayin]
11 Kansionan yo na panangidayew si Jehova a manaayam ed Sion;Ipakabat yod totoo iray gagawaen to.+
12 Ta saray napapairap et sankanonot na samay manangibales na dala ra;+Agto lingwanan so akis da.+
ח [Heth]
13 Kasian mo ak, O Jehova; nengneng moy pamapairap ed siak na saramay mamubusol ed siak,O sika a mangibabangon ed siak manlapud puerta na patey,+
14 Diad ontan et niyabawag ko ray makapadinayew a gawam diad saray lolooban na anak a bii na Sion,+Tan panliketan ko ray panangiliktar mo.+
ט [Teth]
15 Saray nasyon et naplag ed abot a ginawa ra;Akalotan so sali ra ed iket ya impatit da.+
16 Si Jehova et kabkabat ed panangukom to.+Say mauges et apatitan ed kimey na saray mismon lima to.+Higgaion.* (Selah)
י [Yod]
17 Say mauges et onsener paonlad Lubok,*Amin a nasyon a mangililingwan ed Dios.
18 Balet aglawas nalingwanan so mairap-bilay;+Tan agbalot naandi so ilalo na mauyamo.+
כ [Kaph]
19 Alagey ka, O Jehova! Agmo aabuloyan a manalo so too.
Naukom komon iray nasyon ed arapan mo.+
20 Taktakot mo ra, O Jehova,+Ipaamtam ed saray nasyon a totoo labat ira. (Selah)
Paimanod leksab
^ Odino “Mantogtog tan mangansion ak parad.”
^ Odino “magmaliw ya atagey tan maligen a pasen.”
