Salmo 59:1-17
Parad direktor; diad “Agka Manederal.” Salmo nen David. Miktam.* Sanen angibaki si Saul na lalakin manbantay ed abung nen David pian pateyen da.+
59 O Dios ko, iliktar mo ak pa ed saramay mamubusol ed siak;+Iyagel mo ak ed saramay onsusumpad siak.+
2 Iliktar mo ak pa ed saramay manggagawa na mauges,Tan ilaban mo ak ed saray lalakin maruksa.*
3 Tatambangan da ak;*+Aatakien ak na saray mabibiskeg a lalakiBalet aliwan lapud nanrebelde ak odino nankasalanan ak,+ O Jehova.
4 Anggan anggapoy ginawak a mauges, nangganat tan namparaan ira ya onatakid siak.
Bangon ka sano ontatawag ak tan nengneng moy nagagawad siak.
5 Ta sika, O Jehova a Dios na saray armada, sika so Dios na Israel.+
Liing ka pian usisaen moy amin a nasyon.
Agmo kakasian so siopaman a traidor.+ (Selah)
6 Nilabilabi ran ompapawil;+Manngengem* iran singa aso+ tan siber-siber irad syudad.+
7 Nengneng moy ompapaway ed sangi ra;Saray bibil da et singa espada,+Ta kuan da: “Siopay ondedengel?”+
8 Balet elekan mo ra, O Jehova;+Balawen mo ray amin a nasyon.+
9 O Dios, sikay Biskeg ko, mantultuloy ak a manbantay parad sika;+Ta sika so maligen a salimbengan* ko.+
10 Say Dios a mangipapatnag ed siak na matoor a panangaro et tulongan to ak;+Ipanengneng tod siak a natalo iray kalaban ko.+
11 Agmo ra papateyen, pian agmakalingwan so totook.
Diad panamegley na pakayarim et panakar-akar mo ra;Itumbam ira, O Jehova a samper mi.+
12 Lapud mankakasalanan ira ed ibabaga ra,Naerel ira komon ed inkamapaatagey da,+Lapud sasalitaen dan panag-ayew tan panagpalikdo.
13 Panganggam ira lapud sanok mo;+Panganggam ira, pian naandi la ra;Ipaamtam ed sikara a say Dios so manuuley ed Jacob tan anggad saray sampot na dalin.+ (Selah)
14 Paulyan mo ran ompawil no labi;Paulyan mo ran manngengem* a singa aso tan mansiber-siber ed syudad.+
15 Paulyan mo ran manakar-akar pian mananap na naakan;+
Agmo aabuloyan a napesel ira odino makaromog iray natuloyan da.
16 Balet siak, kansionen ko so nipaakar ed biskeg mo;+Diad kabuasan et malikeliket kon ipaamtay matoor a panangarom.
Ta sika so maligen a salimbengan ko+Tan say pasen a nabatikan ko sano nagogonigon ak.+
17 O Dios, say Biskeg ko, kansionan ta ka na panangidayew,*+Ta sika so maligen a salimbengan ko, say Dios a mangipapatnag ed siak na matoor a panangaro.+
