Salmo 139:1-24
Parad direktor. Salmo nen David. Sakey a kansion.
139 O Jehova, inusisam ak, tan kabkabat mo ak.+
2 Amtam sano onyuyurong ak tan sano ombabangon ak.+
Manlapud arawi et natetebek moy kanonotan ko.+
3 Babantayan* mo ak sano manbiabiahe ak tan sano ondudukol ak;Kabisadom so amin a dalan ko.+
4 Anggan anggapo ni salitan imbalikas na dilak,Amtam la no anto itan, O Jehova.+
5 Diad beneg tan arap ko et papaliberan mo ak;Tan itatapew moy limam ed siak.
6 Satan a kakabatan et agko narandan.*
Atagtagey itan kanian agko naabot.*+
7 Iner so natakasan ko ya agak naromog na espiritum,Tan iner so nabatikan ko ya agmo ak nanengneng?+
8 No onsegep ak ed tawen, wadman ka,Tan no manggawa ak na dukolan ko ed Lubok,* wadman ka met.+
9 No ontikyab ak diad panamegley na saray payak na palbangonPian manayam ak diad gilig na sankaarawian a dayat,
10 Anggan diman et itabin ak na limamTan bembenan ak na kawanan a limam.+
11 No ibagak: “Seguradon saniban ak na kabilungetan!”
No ontan, say labi ya akasakbong ed siak et magmaliw a liwawa.
12 Anggan say kabilungetan et agmagmaliw ya ambilbilunget ed sika,Noag ingen say labi et magmaliw a singa kaliwawa na agew;+Say kabilungetan et singa liwawa ed sika.+
13 Ta sikay nanggawa ed saray batok;Sinaniban* mo ak ed eges nen inak.+
14 Idayew ta ka lapud diad makapadinayew a paraan et makapakelkelaw so inkagawak.+
Makapakelkelaw iray gawam,+Kabkabat ko* itan.
15 Saray pukel ko et agniyamot ed sikaSanen aporma ak ed amot,Sanen atuop ak diad saray kaaralman na dalin.+
16 Anengneng mo ak la anggan sanen ilulukon ak ni labat;Akasulat lad librom so amin a kabiangan ko,Say nipaakar ed saray agew sanen aporma iratan,Antis ni a niwala iratan.
17 Kanian mabmabli ed siak iray kanonotan mo!+
O Dios, agaylay karakel na bilang da!+
18 No salien ko ran bilangen, mas dakel ni ra nen saray buer ed dayat.+
Kabangon ko et kaiba ta ka nin siansia.*+
19 O Dios, no pateyen mo labat komon imay mauges!+
Diad ontan et onarawid siak iray totoon maruksa,*
20 Saramay mansasalita sumpad sika a mauges so motibo ra;*Saraya may kalaban mo a manguusar ed ngaran mo diad andi-kakanaan.+
21 O Jehova, agta bubusolen ko iramay mamubusol ed sika,+Tan didimlaen ko iramay manrerebelde ed sika?+
22 Anggapoy arum a naliliknak noag say panamusol ed sikara;+Ipapasen ko ra a talagan kalaban ko.
23 Komon ta usisaen mo ak, O Dios, tan amtaen moy pusok.+
Komon ta surien mo ak, tan amtaen moy nanaaburidon* kanonotan ko.+
24 Nengneng mo no kasin walaan ak na makapasakit a tendensia,+Tan itonton mo ak+ ed dalan na andi-anggaan.
Paimanod leksab
^ Literal, “Susukaten.”
^ Odino “et makapakelkelaw ed siak.”
^ Odino “agko natalosan.”
^ Odino posiblin, “Tinuop.”
^ Odino “Kabkabat na kamarerwak.”
^ Odino posiblin, “bibilangen ko nin siansia iratan.”
^ Odino “nankasalanan ed dala.”
^ Odino “unong ed nononoten da.”
^ Odino “magulon.”
