Salmo 30:1-12
-
Say paneermen et asalatan na panliliket
-
Say pabor na Dios et legay bilay (5)
-
Sakey a kansion nipaakar ed inagurasyon na abung. Salmo nen David.
30 Itandoro ta ka, O Jehova, ta inyatagey* mo ak;Agmo inabuloyan ya elek-elekan ak na kakabusol ko.+
2 O Jehova a Dios ko, kinmerew ak na tulong ed sika, tan pinaabig mo ak.+
3 O Jehova, inagwat mo ak* ed Lubok.*+Pinansiansiam ak a mabilay; agmo inabuloyan ya onlereg ak ed abot.*+
4 Kansionan yo na panangidayew* si Jehova, sikayo ran matoor ed sikato,+Pisalamatan yoy masanton ngaran* to;+
5 Ta no sinmanok ed sika, maganggano itan ya onkepa,+Balet no walad sikay pabor* to, legay bilay itan.+
Nayarin diad labi et walay pannangis, balet diad kaimbuasan et walay panlikliket.+
6 Sanen agak nagogonigon et inkuan ko:
“Agak balot nagalaw.”*
7 O Jehova, legan a walad siak so pabor mo, pinabiskeg mo ak a singa palandey.+
Balet sanen inyamot moy lupam, tinmakot ak.+
8 O Jehova, naynay ak ya ontatawag ed sika;+Naynay ak ya onkekerew na pabor nen Jehova.
9 Antoy nagunggona diad ipatey ko,* diad ilasur ko ed abot?*+
Nirayew ka ni kasi na dabok?+ Nipaamta to ni kasi katooran mo?+
10 Dengel mo ak pa, O Jehova, tan kasian mo ak.+O Jehova, tulongan mo ak.+
11 Say ermen ko et pinagmaliw mon sayaw;Inekal moy sulong ko a sakon abel, tan kinawesan mo ak na liket,
12 Pian makapankansion ak* na panangidayew ed sika tan agak manpareen.
O Jehova a Dios ko, idayew ta ka ya anggad angga.
