Salmo 68:1-35
Parad direktor. Salmo nen David. Sakey a kansion.
68 Onalagey komon so Dios, nitaytayak komon iray kalaban to,Tan ombatik komon manlapud arapan to iramay mamubusol ed sikato.+
2 No panon so pangipapalir na dagem ed asewek, ontan komon so pamataynan mod sikara;No panon a natutunaw so sebo ed apoy,Naandi met komon so mauges ed arapan na Dios.+
3 Balet manliket komon so matunong;+Komon ta manggayaga ran maong ed arapan na Dios;Onlukso ra komon lapud panlikliket.
4 Kansionan yo so Dios; kansionan yo na panangidayew so* ngaran to.+
Kansionan yo imay ondadalan ed saray desierto.*
Jah* so ngaran to!+ Manliket kayo ed arapan to!
5 Say Dios a walad masanton ayaman toEt ama na saray ulila tan managprotekta* na saray balon bibii.+
6 Say Dios et iikdan toy abung a panayaman iramay manbukbukor;+Ibubulos to ray priso tan papaaligwasen to ra.+
Balet samay benger* et manayam ed amagaan a dalin.+
7 O Dios, sanen intonton moy* totoom,+Sanen nanakar ka ed desierto, (Selah)
8 Yinmegyeg so dalin;+Angipelag na uran* so tawen nisengeg ed Dios;Yinmegyeg so Palandey Sinai nisengeg ed Dios, say Dios na Israel.+
9 Pinauran moy maksil, O Dios;Pinakasil mo lamet so naknaksawan a totoom.*
10 Nanayam irad saray toldam;+Lapud kamaongan mo, O Dios, et imparaanan moy mairap-bilay.
11 Si Jehova so mangiiter na ganggan;Saray bibiin mangiyaabawag na maong a balita et baleg ya armada.+
12 Saray arari na saray armada et binmatik,+ on, binmatik ira!
Samay biin tinmilak ed abung et walay apag tod samsam.+
13 Sikayo ran lalaki, anggano ondudukol kayo ed kawalaan na saray apoy ed kampo,*Makala kayo ditan na malapati a saray payak to et pilak,Tan saray bago to et maabig a klase na* balitok.
14 Sanen intaytayak na Makapanyarin-amin iray arari ditan,+Inmuran na niebe ed Zalmon.*
15 Say palandey na Basan+ et palandey na Dios;*Say palandey na Basan et atagtagey a palandey.
16 Sikayo ran atataragey a palandey, akin et makakaibeg kayoEd palandey a pinili na Dios* a panayaman to?+
Si Jehova et manayam ditan ya anggad angga.+
17 Saray pan-guerra a karwahe na Dios et samplon libolibo, salanti, nilibon libolibo.+
Manlapud Sinai, si Jehova et linma ed masanton pasen.+
18 Sinmegep ka ed tagey;+Angawit ka na saray narel;Ginawam iran regalo a lalaki,+On, anggan saramay anawet so ulo ra,+ pian manayam ka ed limog da, O Jehova* a Dios.
19 Narayew komon si Jehova, ya inagew-agew a manasakbat ed saray awit tayo,+Say tuan Dios na kilalaban tayo. (Selah)
20 Say tuan Dios et sakey a Dios a mangililiktar ed sikatayo;+Tan si Jehova a Soberanon Katawan so mangisasalba manlapud ipapatey.+
21 On, betagen na Dios iray ulo na saray kalaban to,Say lapis-lapis na ulo na siopaman a mantutultuloy ed pankakasalanan to.+
22 Inkuan nen Jehova: “Ipawil ko ra manlapud Basan;+Ipawil ko ra manlapud kaaralman na dayat,
23 Pian naurasan so sali yo ed dala+Tan nadildilan na saray aso yo so dala na kakabusol.”
24 Nanenengneng da ray parada na impanalom, O Dios,Saray parada na Dios ko, say Arik, paonlad masanton pasen.+
25 Walad unaan iray managkansion, tan manumtumbok iray mantotogtog na saray nandeles ya instrumento;+Diad baetan da et wala ray kalangweran a bibiin mantotogtog na saray tamburin.+
26 Idayew yoy Dios diad saray nantitipon a totoo;*Idayew yoy Jehova, sikayo ran nanlapud Subol na Israel.+
27 Diman, si Benjamin+ a sankayugtanan so manasakop* ed sikara,Ontan met iray prinsipe na Juda kaiba iray maingal a totoo ra,Saray prinsipe na Zebulon, saray prinsipe na Neftali.
28 Ingganggan na Dios mo a magmaliw kan mabiskeg.
Ipatnag moy biskeg mo, O Dios, sika a kinmiwas parad sikami.+
29 Nisengeg ed templom a walad Jerusalem,+Saray arari et mangawit na regalo ed sika.+
30 Paamom iray atap ya ayayep a walad silong na saray tanubong,Say pulok na saray toro+ tan saray kilaw da,Anggad saray totoo et ondakmomo tan mangawit na* saray pilak.
Balet pansisianen to ray totoon labalabay day guerra.
31 Saray kagawaan a gansa et ipaway* ed Ehipto;+Say Cus* et mangganat a mangiter na saray regalo ed Dios.
32 O sikayo ran panarian ed dalin, kansionan yo so Dios,+Kansionan yo na panangidayew* si Jehova, (Selah)
33 Samay akalugan ed abaybayag lan tawen na saray katawenan.+
Sikatoy manpapakarol ed panamegley na boses to, say maksil a boses to.
34 Bidbir yoy inkabiskeg na Dios.+
Say atagey a pakauley to et walad Israel,Tan say biskeg to et walad tawen.*
35 Say Dios et makapadinayew legan ya ompapaway ed masanton santuaryo to.*+
Sikato so Dios na Israel,A mangiiter na biskeg tan pakayari ed totoo.+
Narayew komon so Dios.
Paimanod leksab
^ Odino “mantogtog tan mangansion kayo parad.”
^ Odino posiblin, “onlulugan ed saray lurem.”
^ Say “Jah” et pinatikey a ngaran a Jehova.
^ Literal, “ukom.”
^ Odino “rebelyoso.”
^ Literal, “linma kad unaan na.”
^ Literal, “Tinmerter.”
^ Literal, “so tawir mo.”
^ Odino posiblin, “saray pukokan na karnero.”
^ Odino “et duyawan a birdin.”
^ Odino “Singa inmuran na niebe ed Zalmon.”
^ Odino “makapadinayew a palandey.”
^ Odino “pipirawaten na Dios.” Salanti, say Palandey Sion.
^ Literal, “Jah.”
^ Literal, “diad saray pantitipon.”
^ Odino “manuuley.”
^ Odino posiblin, “et mangigatin-gatin ed.”
^ Odino posiblin, “Saray embahador et ompaway.”
^ Odino “Etiopia.”
^ Odino “Mantogtog tan mangansion kayo parad.”
^ Literal, “saray lurem.”
^ Literal, “santuaryom.”
