Salmo 26:1-12
Salmo nen David.
26 Ukom mo ak pa, O Jehova, lapud manaakar ak a walaay integridad;+Agnagiing so panmamatalek ko ed si Jehova.+
2 Usisam ak pa, O Jehova, tan subok mo ak;Dalisay mo pa so sankaaraleman a kanonotan ko* tan say pusok.+
3 Ta say matoor a panangarom et naynay a walad arapan ko,Tan manaakar ak unong ed katuaan mo.+
4 Agak miuulop* ed saray mapalikdon totoo,+Tan papaliisan ko iramay iyaamot day inkatoo ra.*
5 Kabusol koy grupo na saray mauges a totoo,+Tan agko labay so miulop* ed saray marelmeng.+
6 Urasan ko ray limak pian ipanengneng ya anggapoy kasalanan ko,Tan manakar ak ed paliber na altar mo, O Jehova,
7 Pian iparengel koy pisasalamat ko+Tan iyabawag koy amin a makapakelaw a gawam.
8 O Jehova, labalabay koy abung a panaayaman mo,+Say pasen a kawalaay gloriam.+
9 Komon ta agmo ak papaandien* a kaiba na saray makasalanan+Tan agmo aalaen so bilay ko a kaiba na saray maruksan totoo,*
10 A saray lima ra et mibibiang ed makapabaing a kagagawa,Tan say kawanan a lima ra et napno na saray pasuksok.
11 Balet siak, manakar ak a walaay integridad.Iliktar* mo ak pa tan kasian mo ak.
12 Akaalagey ak ed patar a dalin;+Idayew koy Jehova diad baleg a kongregasyon.*+
Paimanod leksab
^ Odino “sankaaraleman ya emosyon ko.” Literal, “iray batok.”
^ Literal, “miyuyurong.”
^ Odino “agak mililimog ed saray mansimpisimpitan.”
^ Literal, “miyuyurong.”
^ Odino “papaandien so kamarerwak.”
^ Odino “totoon managpaagus na dala.”
^ Literal, “Dondon.”
^ Literal, “diad saray pantitipon.”
