Salmo 79:1-13
Kansion nen Asaf.+
79 O Dios, saray nasyon et nilooban day tawir mo;+Pinabanday da so masanton templom;+Ginawa ran bunton na saray geray so Jerusalem.+
2 Impakan da so bangkay na saray lingkor mo ed saray manok ed tawenTan say laman na saray matoor ed sika ed saray atap ya ayayep diad dalin.+
3 Say dala ra et inkalbo ran singa danum diad interon Jerusalem,Tan anggapo so atilak a mangiponpon ed sikara.+
4 Balbalawen kami na saray kakaabay mi;+Leleglemewen tan eelek-elekan kami na saray akapaliber ed sikami.
5 O Jehova, anggad kapigan ka manpasnok? Anggad angga?+
Anggad kapigan ondalang a singa apoy so sanok mo?+
6 Ikalbom pay sanok mo ed saray nasyon ya agmakapikabat ed sikaTan ed saray panarian ya ag-ontatawag ed ngaran mo.+
7 Ta inupot day JacobTan ginawa ran agnapanayaman so dalin to.+
8 Agmo komon papaebatan ed sikami iray kasalanan na inmuunan atateng mi.+
Ipatnag mo pan tampol ed sikami so panangasim,+Ta nipaabeba kami lan maong.
9 Tulongan mo kami, O Dios na kilalaban mi,+Nisengeg ed maglorian ngaran mo;Iliktar mo kami tan perdonam* iray kasalanan mi nisengeg ed ngaran mo.+
10 Akin et kaukolan nin ibaga na saray nasyon: “Kawalaan na Dios da?”+
Diad pakanengneng mi et naamtaan komon na saray nasyonA say impaagus a dala na saray lingkor mo et asingil la.+
11 Narengel mo komon so pannangis na saray apriso.+
Usar mo pay baleg a pakayarim* pian isalba* iramay asentensiaan na ipapatey.*+
12 Bales mo pan maminpito iray kakaabay mi+Lapud saray panagkantiaw a ginawa rad sika, O Jehova.+
13 Diad ontan, sikami ran totoom tan pulok a walad panagpastolan mo+Et pisalamatan mi ka ya anggad angga;Tan iyabawag mi dayew mo diad amin a henerasyon.+
Paimanod leksab
^ Literal, “sakbongan mo.”
^ Literal, “taklay mo.”
^ Odino posiblin, “ibulos.”
^ Literal, “iramay ananak a lalaki na ipapatey.”
