Salmo 119:1-176

  • Apresasyon ed mablin salita na Dios

    • ‘Panon a napansiansian malinis na saray kalangweran so kabibilay da?’ (9)

    • “Labalabay ko ray panonot mo” (24)

    • “Say salitam so ilalok” (74, 81, 114)

    • “Ontan lay panangarok ed ganggan mo!” (97)

    • “Mas aralem so pakatebek ko nen say amin a managbangat ko” (99)

    • “Say salitam et sakey a silew ed salik” (105)

    • ‘Say kabaliksan na salitam et katuaan’ (160)

    • Kareenan ed saramay mangaarod ganggan na Dios (165)

א [Aleph] 119  Maliket iramay andiay pakabalawan* so panagbilay da,A manaakar unong ed ganggan nen Jehova.+  2  Maliket iramay manguunor ed saray panonot to,+Saramay manaanap ed sikato diad interon puso ra.+  3  Ag-ira manggagawa na ag-inkatunong;Manaakar ira ed saray dalan to.+  4  Ingganggan moA saray totontonen ya inter mo et maalwar min sumpalen.+  5  No makapansiansia ak labat komon a mapekder*+Pian natumbok ko ray pananontonan mo!  6  Diad ontan et agak niiyan ed kababaingan+Sano nodnonoten koy amin a ganggan mo.  7  Idayew ta ka diad maptek a pusoSano naaralan ko ray matunong a panangukom mo.  8  Unoren ko ray pananontonan mo. Agmo ak komon sigpot a papaulyanan. ב [Beth]  9  Panon a napansiansian malinis na sakey a kalangweran so kabibilay to? Diad panalwar tod inkasikato unong ed salitam.+ 10  Sigpot-puso ta kan aanapen. Agmo komon papaulyanan ya onarawi ak ed saray ganggan mo.+ 11  Diad pusok et papablien* koy salitam+Pian agak makapankasalanan ed sika.+ 12  Narayew ka komon, O Jehova;Ibangat mo pad siak iray pananontonan mo. 13  Diad panamegley na bibil ko et iyaabawag koSo amin ya imbagam a panangukom. 14  Panliliketan ko ray panonot mo+A mas ni nen say arum ni ran mablin bengatla.+ 15  Dalepdepen* ko ray totontonen mo+Tan iteen ko ray matak ed saray dalan mo.+ 16  Labalabay ko ray ganggan mo. Agko lingwanan so salitam.+ ג [Gimel] 17  Maabig komon so pideneng mod lingkor mo,Pian manbilay ak tan unoren koy salitam.+ 18  Lukasan mo ray matak pian malinew kon nanengnengIray makapakelaw a bengatlan walad ganggan mo. 19  Sakey ak labat a dayo ed sananey a bansa.+ Agmo komon iyaamot ed siak iray ganggan mo. 20  Makapkapuy ak* la ed pampipirawat koEd saray panangukom mo diad amin a panaon. 21  Babanoen mo so mapalakbat,Saramay naayew ya onaarawi ed saray ganggan mo.+ 22  Ekal mo pa so panagmudmora tan panagbusol ed siak,Ta uunoren ko ray panonot mo. 23  Anggan sano mantitipon tan mansalita iray prinsipe sumpad siak,Dadalepdepen* na lingkor mo iray pananontonan mo. 24  Labalabay ko ray panonot mo;+Sikaray mananimbawak.+ ד [Daleth] 25  Akatikleb ak* ed dabok.+ Pansiansiam ak pan mabilay unong ed salitam.+ 26  Impaamtak ed sika iray dalan ko, tan inebatan mo ak;Ibangat mo pad siak iray pananontonan mo.+ 27  Tulongan mo ak pan natalosan so kabaliksan* na saray totontonen mo,Pian nadalepdep* ko ray makapakelaw a ginawam.+ 28  Agak makaugip* lapud ermen. Pabiskeg mo ak pa unong ed salitam. 29  Ekal mo pad siak so dalan na panagpalikdo,+Tan ipatnag mod siak so kaabigan diad panamegley na ganggan mo. 30  Pinilik so dalan na katooran.+ Ipapasen kon duga iray panangukom mo. 31  Agko ikbanan iray panonot mo.+ O Jehova, agmo komon aabuloyan a nadismaya ak.*+ 32  Labalabay kon tumboken so* dalan na saray ganggan moLapud inikdan mo itan na pasen ed pusok.* ה [He] 33  O Jehova, ibangat mo pad siak+ so dalan na saray pananontonan mo,Tan tumboken ko itan ya anggad sampot.+ 34  Ikdan mo ak pay pakatalos,Pian naunor koy ganggan moTan nasumpal ko itan a sigpot-puso. 35  Iwanwan mo ak* pad basbas na saray ganggan mo,+Ta satan so panliliketan ko. 36  Iteen mo pay pusok ed saray panonot mo,Aliwan diad makasarilin nabang.*+ 37  Ipaliis mo pay matak ed andi-kakanaan;+Pansiansiam ak pan mabilay diad dalan mo. 38  Toor mo komon so sipan mo* ed lingkor mo,Pian sikay takotan.* 39  Ekal mo pay kabandayan a tatakotan ko,Ta maptek iray panangukom mo.+ 40  Nengneng mo no panoy pampipirawat ko ed saray totontonen ya inter mo. Pansiansiam ak pan mabilay unong ed inkatunong mo. ו [Waw] 41  Ipatnag mo komon ed siak so matoor a panangarom, O Jehova,+Tan iliktar mo ak unong ed sipan mo;*+ 42  Pian naebatan ko imay mangakantiaw ed siak,Ta manmamatalek ak ed salitam. 43  Agmo pa eekalen ed sangik so salita na katuaan,Ta maniilalo ak* ed panangukom mo. 44  Itultuloy kon unoren so ganggan moYa anggad angga.+ 45  Tan manakar-akar ak ed maligen a pasen,*+Ta uusisaen ko ray totontonen ya inter mo. 46  Itongtong koy nipaakar ed saray panonot mo diad arap na saray arari,Tan agak ombaing.+ 47  Labalabay ko ray ganggan mo,On, inad-arok iratan.+ 48  Itagey ko ray limak parad saray ganggan mo ya inad-arok,+Tan dalepdepen* ko ray pananontonan mo.+ ז [Zayin] 49  Agmo komon lilingwanan imay sinalitam* ed lingkor mo,A lapud satan et inikdan mo ak na ilalo.* 50  Saya so ligliwak diad paniirap ko,+Ta impansiansia ak a mabilay na salitam. 51  Pinasyay panmumudmora ed siak na samay mapalakbat,Balet agko sumlangen so ganggan mo.+ 52  Saray panangukom mo nensaman et sankanonot ko,+ O Jehova,Tan naliligliwa ak ed saratan.+ 53  Pinasyay insanok ko lapud samay maugesA mangikakaindan ed ganggan mo.+ 54  Parad siak et singa kansion iray pananontonan moDiad inerman a panaayaman ko.* 55  No labi et nonodnonoten koy ngaran mo, O Jehova,+Pian nasumpal koy ganggan mo. 56  Gagawaen ko irayaLapud uunoren ko ray totontonen mo. ח [Heth] 57  Si Jehova so nabebetangan ko;+Insipan kon tooren iray salitam.+ 58  Mikakasi ak ed sika* diad interon pusok;+Mangipatnag kad siak na kaabigan+ unong ed sipan mo.* 59  Inusisak iray dalan ko,Pian makapawil ak tan natumbok ko ray panonot mo.+ 60  Manaapura ak tan agak manpapaleenA manumpal ed saray ganggan mo.+ 61  Akabariber ed siak iray lubir na mauges,Balet agko lilingwanan so ganggan mo.+ 62  Diad pegley-labi et ombabangon ak pian pisalamatan ta ka+Lapud saray matunong a panangukom mo. 63  Kaaro ak na amin ya ontatakot ed sikaTan saramay manguunor ed saray totontonen ya inter mo.+ 64  O Jehova, say dalin et napno na matoor a panangarom;+Ibangat mo pad siak iray pananontonan mo. ט [Teth] 65  Maabig so impideneng mod lingkor mo,O Jehova, unong ed salitam. 66  Bangatan mo ak pa na maong a pakatebek tan kakabatan,+Ta manmamatalek ak ed saray ganggan mo. 67  Antis ak ya apairap, aliway aarapen ko,*Balet natan et uunoren ko lay salitam.+ 68  Maomaong ka+ tan maong iray gagawaen mo. Ibangat mo pad siak iray pananontonan mo.+ 69  Saray mapalakbat et dederalan da ak ed panamegley na katilaan,Balet siak, uunoren ko ray inter mon totontonen diad interon pusok. 70  Say puso ra et agmakalikna,*+Balet siak, labalabay koy ganggan mo.+ 71  Maong met ya apairap ak,+Pian naaralan ko ray pananontonan mo. 72  Say ganggan ya impaamtam et maabig parad siak,+Mas maong ni nen say nilibon balitok tan pilak.+ י [Yod] 73  Ginawa ak na saray limam tan pinorma da ak. Ikdan mo ak pay pakatalos,Pian naaralan ko ray ganggan mo.+ 74  Saramay ontatakot ed sika et manliliket sano nanenengneng da ak,Ta say salitam so ilalok.*+ 75  O Jehova, amtak a matunong iray panangukom mo,+Tan lapud katooran mo et dinisiplinam ak.+ 76  Komon ta ligliwaen ak na matoor a panangarom,+Unong ed sipan* ya imbagam ed lingkor mo. 77  Kasian mo ak komon, pian manbilay ak ni,+Ta labalabay koy ganggan mo.+ 78  Saray mapalakbat et niiyan komon ed kababaingan,Ta nanggawa ray aliwa ed siak ya anggapoy makasengeg.* Balet siak, dalepdepen* ko ray totontonen ya inter mo.+ 79  Komon ta ompawil ed siak iramay ontatakot ed sika,Saramay makaamta ed saray panonot mo. 80  Komon ta magmaliw ya andiay pakabalawan so pusok diad panumbok kod saray pananontonan mo,+Pian agak niiyan ed kababaingan.+ כ [Kaph] 81  Pipirawaten koy* panangiliktar mo,+Ta say salitam so ilalok.* 82  Pipirawaten na matak so salitam,+A tetepeten ko: “Kapigan mo ak ligliwaen?”+ 83  Ta nagmaliw ak a singa katat a pananginan ya amagaan ed asewek,Balet agko lilingwanan iray pananontonan mo.+ 84  Pigaran agew ni so panalagar na lingkor mo? Kapigan so pangukom mo ed saramay mamapasegsegang ed siak?+ 85  Saray mapalakbat et angotkot na saray abot parad siak,Saramay onsusumlang ed ganggan mo. 86  Amin a ganggan mo et napanmatalkan. Saray totoo et papasegsegangen da ak ya anggapoy makasengeg; tulongan mo ak!+ 87  Dawdawit da ak ya apatey,Balet agko inkaindan iray totontonen ya inter mo. 88  Pansiansiam ak pan mabilay lapud matoor a panangarom,Pian naunor ko ray panonot a sinalitam. ל [Lamed] 89  Say salitam et mansiansia ed tawenYa anggad angga, O Jehova.+ 90  Say katooran mo et mantultuloy diad amin a henerasyon.+ Inletneg mon malet so dalin, kanian mansiasiansia itan.+ 91  Diad panangukom mo et mansiasiansia iratan* ya anggad natan,Ta amin iratan et lingkor mo. 92  No agko papablien so ganggan mo,Ompan inatey ak la lapud paniirap ko.+ 93  Agkon balot lingwanan iray totontonen ya inter mo,Ta pinansiansiam ak a mabilay lapud saratan.+ 94  Kayarian mo ak; iliktar mo ak pa,+Lapud inusisak iray totontonen ya inter mo.+ 95  Saray mauges et aalagaren day paneral dad siak,Balet iimanoen kon maong iray panonot mo. 96  Anengneng ko a say inkayadyari et walay limitasyon to,Balet say ganggan mo et anggapoy limitasyon to.* מ [Mem] 97  Ontan lay panangarok ed ganggan mo!+ Naynay kon dadalepdepen* itan.+ 98  Lapud ganggan mo et nagmaliw ak a mas makabat nen saray kakabusol ko,+Ta walad siak itan ya anggad angga. 99  Mas aralem so pakatebek ko nen say amin a managbangat ko,+Lapud dadalepdepen* ko iray panonot mo. 100  Mangipapatnag ak na mas aralem a pakatalos nen saray mamasiken,Lapud uunoren ko ray totontonen ya inter mo. 101  Agko labay so manakar ed inerman a mauges a dalan,+Pian natumbok koy salitam. 102  Agko susumlangen iray panangukom mo,Ta sikay angibangat ed siak. 103  Masamsamit ed pakataway ko iray salitam,Mas masamit ni nen say dilo!+ 104  Lapud saray inter mon totontonen et onkikiwas ak a walaay pakatalos.+ Kanian kabusol ko so amin a dalan na katilaan.+ נ [Nun] 105  Say salitam et sakey a silew ed salik,Tan liwawa ed dalan ko.+ 106  Sinambaan ko ya unoren iray matunong a panangukom mo,Tan tooren ko itan. 107  Masyado lay paniirap ko.+ O Jehova, pansiansiam ak pan mabilay unong ed salitam.+ 108  O Jehova, panliketan mo komon iray boluntaryon iyaapay ko a panangidayew,*+Tan ibangat mo pad siak iray panangukom mo.+ 109  Say bilay ko et lanang a walad peligro,*Balet agko nilingwanan so ganggan mo.+ 110  Pinatitan ak na mauges,Balet agak inmarawi ed saray totontonen ya inter mo.+ 111  Impasen ko ray panonot mo bilang permanentin kayarian ko,*Ta panliliketan iratan na pusok.+ 112  Determinado ak* ya unoren iray pananontonan moDiad amin a panaon, anggad kaunoran. ס [Samekh] 113  Kabusol ko iray totoon naapag so puso ra,+Balet inad-arok so ganggan mo.+ 114  Sika so panag-amotan ko tan say samper ko,+Ta say salitam so ilalok.*+ 115  Arawi kayod siak, sikayo ran mauges a totoo,+Pian naunor ko ray ganggan na Dios ko. 116  Tulongan mo ak pa, O Dios ko, unong ya insipan mo,*+Pian manbilay ak ni;Agmo komon aabuloyan a say ilalok et magmaliw a pakadismaya.*+ 117  Tulongan mo ak pa pian nisalba ak;+Diad ontan et naynay kon niteen so imanok ed saray pananontonan mo.+ 118  Ipupulisay mo so amin ya onaarawi ed saray pananontonan mo,+Ta matitila tan mapalikdo ra. 119  Amin a mauges ed dalin et eekalen mo a singa ra dutak.+ Kanian inad-arok iray panonot mo. 120  Lapud takot kod sika et manggiwgiw so laman ko; Tatakotan ko ray panangukom mo. ע [Ayin] 121  Ginawak no antoy maptek tan matunong.Agmo ak komon papaulyan ed saray mamapairap ed siak! 122  Garantiyaan mo pay pankaabigan na lingkor mo;Agak komon pairapen na mapalakbat. 123  Naknaksawan la ray matak lapud panaalagar ko ed panangiliktar mo+Tan ed matunong a sipan mo.*+ 124  Ipatnag mo pad lingkor mo so matoor a panangarom,+Tan ibangat mo pad siak iray pananontonan mo.+ 125  Lingkor mo ak; ikdan mo ak pay pakatalos,+Pian naamtaan ko ray panonot mo. 126  Panaon la pian onkiwas ka, O Jehova,+Ta susumlangen day ganggan mo. 127  Inad-arok iray ganggan moA mas ni nen say balitok, anggan say maabig a klase na* balitok.+ 128  Kanian ipapasen kon duga so amin a bilin* mo;+Kabusol koy amin a dalan na katilaan.+ פ [Pe] 129  Makapakelkelaw iray panonot mo. Kanian uunoren ko* iratan. 130  Say kipaparungtal na saray salitam et mangiiter na liwawa,+Iikdan toy pakatalos so andiay kakabatan.+ 131  Ilulukas koy sangik tan oniingas ak na aralem,*Lapud pampipirawat kod saray ganggan mo.+ 132  Imanom ak pa tan kasian mo ak,+A mitunosan iya ed panangukom mo parad saramay mangaaro ed ngaran mo.+ 133  Iwanwan mo ak komon diad panamegley na salitam;Agak komon nadaeg na antokaman a mauges.+ 134  Iliktar* mo ak komon ed saray totoon managpairap,Tan unoren ko ray totontonen ya inter mo. 135  Paliwawam pay lupam* ed lingkor mo,+Tan ibangat mo pad siak iray pananontonan mo. 136  Manag-agus iray lua ed matakLapud ag-ontutulok iray totoo ed ganggan mo.+ צ [Tsade] 137  Matunong ka, O Jehova,+Tan patas iray panangukom mo.+ 138  Saray panonot mo et matunongTan sigpot a napanmatalkan. 139  Say seseg ko et mandarlang ed loob ko,+Ta saray salitam et nilingwanan na saray kalaban ko. 140  Say salitam et sigpot a pinapuro,+Tan inad-aro itan na lingkor mo.+ 141  Ipapasen ak ya andi-kakanaan tan bubusolen;+Ingen ta agko nilingwanan iray totontonen ya inter mo. 142  Say inkatunong mo et agmangangga,+Tan say ganggan mo et katuaan.+ 143  Anggan nagogonigon tan nanairapan ak,Siansia nin labalabay ko ray ganggan mo. 144  Saray panonot mo et matunong ya anggad angga. Ikdan mo ak pay pakatalos,+ pian manbilay ak ni. ק [Qoph] 145  Ontatawag ak diad interon pusok. Ebatan mo ak pa, O Jehova. Unoren ko ray pananontonan mo. 146  Ontatawag ak ed sika; iliktar mo ak! Unoren ko ray panonot mo. 147  Antis na palbangon* et abangon ak la pian onkerew na tulong,+Ta saray salitam so ilalok.* 148  Akalukas la ray matak antis na panagbantay ed labi,Pian nadalepdep* koy salitam.+ 149  Dengel mo pay boses ko lapud matoor a panangarom.+ O Jehova, pansiansiam ak pan mabilay unong ed hustisyam. 150  Onaasingger iramay mibibiang ed makapabaing a kagagawa;*Arawrawi la rad ganggan mo. 151  Asingsingger ka, O Jehova,+Tan amin a ganggan mo et katuaan.+ 152  Nensaman ni et naaralan ko la ray panonot mo,Ta inletneg mo iratan pian mansiansia ya anggad angga.+ ר [Resh] 153  Nengneng mo pay paniirap ko tan iliktar mo ak,+Ta agko nilingwanan so ganggan mo. 154  Idepensam ak* tan iliktar mo ak;+Pansiansiam ak pan mabilay unong ed sipan mo.* 155  Arawrawi kililiktar ed saray mauges,Ta agda uusisaen iray pananontonan mo.+ 156  Abalbaleg so panangasim, O Jehova.+ Pansiansiam ak pan mabilay unong ed hustisyam. 157  Dakdakel iray kalaban ko tan saray mamapasegsegang ed siak;+Balet agko sinumlang iray panonot mo. 158  Makakalikna ak na panamusol sano onnenengneng ak ed traidor,Lapud agda uunoren so salitam.+ 159  Nengneng mo no panoy panangarok ed saray inter mon totontonen! O Jehova, pansiansiam ak pan mabilay lapud matoor a panangarom.+ 160  Say mismon kabaliksan na salitam et katuaan,+Tan amin a matunong a panangukom mo et mansiansia ya anggad angga. ש [Sin] odino [Shin] 161  Saray prinsipe et papasegsegangen da ak+ ya anggapoy makasengeg,Balet siansia nin pandinayewan na pusok iray salitam.+ 162  Panliliketan koy salitam+A singa ed sakey a toon akaromog na baleg a samsam. 163  Kabusol koy katilaan—didimlaen ko itan+—Inad-arok so ganggan mo.+ 164  Kada agew et maminpito ta kan idadayewLapud saray matunong a panangukom mo. 165  Abalbaleg so kareenan na saramay mangaaro ed ganggan mo;+Anggapoy makagapol ed sikara.* 166  Maniilalo ak ed saray panangiliktar mo, O Jehova,Tan susumpalen ko ray ganggan mo. 167  Uunoren ko* iray panonot mo,Tan ontan lay panangarok ed saratan.+ 168  Uunoren ko ray totontonen tan panonot mo,Ta amtam ya amin so gagawaen ko.+ ת [Taw] 169  Makasabi komon ed sika so ikekerew koy tulong, O Jehova.+ Ikdan mo ak pay pakatalos, unong ed salitam.+ 170  Makasabi komon ed sika so ikekerew koy pabor. Iliktar mo ak pa, unong ya insipan mo.* 171  Komon ta say bibil ko et naynay a mangibalikas na panangirayew,+Ta ibabangat mod siak iray pananontonan mo. 172  Komon ta say dilak et mangansion nipaakar ed salitam,+Ta matunong so amin a ganggan mo. 173  Komon ta akaparaan so limam ya ontulong ed siak,+Ta pinilik ya unoren iray totontonen mo.+ 174  Pipirawaten koy panangiliktar mo, O Jehova,Tan labalabay ko so ganggan mo.+ 175  Komon ta manbilay ak* ni pian nidayew ta ka;+Tulongan ak komon na saray panangukom mo. 176  Akaarawi ak a singa abalang a karnero.+ Anap mo komon so lingkor mo,Ta agko nilingwanan iray ganggan mo.+

Paimanod leksab

^ Odino “pansiasiansiaen dan walaay integridad.”
^ Literal, “No komon ta niletneg a malet iray dalan ko.”
^ Odino “titiponen.”
^ Odino “Aralen.”
^ Odino “so kamarerwak.”
^ Odino “Aaralen.”
^ Odino “so kamarerwak.”
^ Literal, “dalan.”
^ Odino “naaral.”
^ Odino “Agmakaugip so kamarerwak.”
^ Odino “a niiyan ak ed kababaingan.”
^ Literal, “Ombatik ak ed.”
^ Odino posiblin, “ginawam a walaay kompiyansa so pusok.”
^ Odino “Panakar mo ak.”
^ Odino “diad saray gunggona.”
^ Odino “salitam.”
^ Odino posiblin, “A ginawa parad saramay ontatakot ed sika.”
^ Odino “salitam.”
^ Odino “manaalagar ak.”
^ Odino “ed maawang a pasen.”
^ Odino “aralen.”
^ Odino “insipan mo.”
^ Odino “Ya impaalagar mod siak.”
^ Odino “Diad abung a panaayaman ko bilang dayo.”
^ Odino “Palelemeken ko (labay kon napaimis) so lupam.”
^ Odino “salitam.”
^ Odino “mankakasalanan ak ya agko ginagala.”
^ Literal, “andiay pakalikna a singa taba.”
^ Odino “manaalagar ak ed salitam.”
^ Odino “salita.”
^ Odino posiblin, “diad panamegley na saray katilaan.”
^ Odino “aralen.”
^ Odino “Pipilaleken na kamarerwak so.”
^ Odino “manaalagar ak ed salitam.”
^ Salanti, amin a pinalsa to.
^ Literal, “et maawa-awang.”
^ Odino “aaralen.”
^ Odino “aaralen.”
^ Literal, “iray boluntaryon iyaapay na sangik.”
^ Odino “Say kamarerwak et lanang a walad limak.”
^ Odino “andi-anggaan a tawir ko.”
^ Literal, “Inteen koy pusok.”
^ Odino “manaalagar ak ed salitam.”
^ Odino “unong ed salitam.”
^ Odino “et niiyan ed kababaingan.”
^ Odino “salitam.”
^ Odino “puron.”
^ Odino “totontonen.”
^ Odino “uunoren na kamarerwak.”
^ Literal, “manangos ak.”
^ Literal, “Dondon.”
^ Odino “Imis ka.”
^ Odino “Ambilunget ni ed kabuasan.”
^ Odino “manaalagar ak ed saray salitam.”
^ Odino “naaral.”
^ Odino “mabanday a kagagawa.”
^ Odino “Bembenan moy kasok.”
^ Odino “salitam.”
^ Odino “Parad sikara et anggapoy pakagapolan.”
^ Odino “Uunoren na kamarerwak.”
^ Odino “unong ed salitam.”
^ Odino “so kamarerwak.”

Copyrights na sayan publikasyon