Salmo 47:1-9
Parad direktor. Salmo na saray anak a lalaki nen Kora.+ Sakey a kansion.
47 Amin yo ran totoo, tipak kayo.
Eyag kayod impanalo yo tan idayew yoy Dios diad maliket a boses.
2 Ta si Jehova a Sankatagyan et makapadinayew;+Sikatoy makapanyarin Ari ed interon dalin.+
3 Ipapasakop to ray totoo ed sikatayo;Iiyan to ray nasyon diad salian tayo.+
4 Sikatoy manpipili na tawiren tayo,+Samay ipapasirayew na inad-aro ton si Jacob.+ (Selah)
5 Sinmegep so Dios legan ya oneeyag ed liket iray totoo;Sinmegep si Jehova legan dan papaknolen so tambuyog.*
6 Kansionan yo na panangidayew so* Dios, kansionan yo na panangidayew.Kansionan yo na panangidayew so Ari, kansionan yo na panangidayew.
7 Ta say Dios so Ari ed interon dalin;+Kansionan yo na panangidayew, tan ipatnag yoy pakatalos.
8 Say Dios et manuuley la bilang Ari ed saray nasyon.+
Say Dios et akayurong ed masanton trono to.
9 Saray lider na totoo et nantitipon iraKaiba iray totoo na Dios nen Abraham.
Ta saray manuley* ed dalin et kien na Dios.
Sikatoy nitandoron maong.+
