Salmo 28:1-9
-
Dinengel so pikakasi na salmista
-
‘Si Jehova, say biskeg tan samper ko’ (7)
-
Salmo nen David.
28 Ontatawag ak ed sika, O Jehova, say Batok;+Agmo komon pepepetay layag mo.
No agmo ak ebatan,Magmaliw ak a singa saramay onlalasur ed abot.*+
2 Dengel mo pa ray pikakasik sano onkekerew ak ed sika na tulongLegan kon itatagey iray limak ya akaarap ed sankadaleman a kuarto na santuaryom.+
3 Agmo ak papatakyasen a kaiba na mauges, saramay manggagaway makapasakit,+Saramay maong so pitotongtong da ed kapara ran too balet mauges so walad puso ra.+
4 Bales mo ra lapud saray gawa ra,+Unong ed mauges a kagagawa ra.
Bales mo ra lapud kimey na saray lima ra,Unong ed saray ginawa ra.+
5 Ta agda iimanoen iray gagawaen nen Jehova,+Tan saray kimey na lima to.+
Itumba to ra tan agto ra ipaalagey.
6 Narayew komon si Jehova,Ta dinengel toy ikekerew koy tulong.
7 Si Jehova so biskeg ko+ tan say samper ko;+Sikatoy panmamatalekan na pusok.+
Tinulongan to ak, tan malikeliket so pusok,Kanian sikatoy idayew ko diad panamegley na kansion ko.
8 Si Jehova so biskeg na totoo to;Sikatoy sakey a salimbengan, a mangiiter na baleg a kililiktar ed nilanaan to.+
9 Iliktar mo komon so totoom, tan bendisyonan moy tawir mo.+
Pastolan mo ra tan ampopom ira ya anggad angga.+
Paimanod leksab
^ Odino “lubok.”
