Salmos 94:1-23
94 ¡Jeobá, bi̱ nandi̱ʼi̱ín cuenta xa̱bu̱ ra̱míjíinʼ!+¡Atasngájma tsáa nindxa̱a̱ʼ, atani̱ rí mumíniiʼ xa̱bu̱ ra̱míjíinʼ!
2 Ikháán bi̱ Naʼnimbánuu xkujndu náa xúgíʼ tsu̱du̱u̱ ku̱ba̱ʼ, atujxa̱a̱ʼ.+
Ataniu̱u̱n xó má kaʼyoo bi̱ nuni̱ mba̱ʼu̱míjna̱.+
3 Jeobá, asndu nguáná gúniña̱a̱ʼ raʼdxúún xa̱bu̱ xkawi̱i̱nʼ rá.Asndu nguáthá mba̱yu̱u̱ʼ xóó gáʼdxúún xá.+
4 Nuthi má xúʼko̱ ajngáa xkawiʼ,xúgíinʼ bi̱ nuni̱ dí ra̱májánʼ jngruigu̱u̱n má xúʼko̱ runi̱ mba̱ʼu̱míjna̱.
5 Jeobá, nuni̱ ngíníi xa̱bu̱ xuajñaanʼ,+nuni̱ rí mumíni̱i̱ʼ bi̱ ikháán kaʼyaaʼ.
6 Nuradíin gu̱ʼú xuáʼa ga̱jma̱a̱ xa̱bu̱ bi̱ naguwaáʼ,ma̱ngaa nuradíin ejín wáʼa.
7 Nuthi: “Jeobá* tséʼyoo,+Dios ndrígóo Jacob tséʼdxawun rígi̱”.+
8 Gakrua̱ʼa̱a̱la rígi̱ ikháanʼ bi̱ tséndxa̱ʼwa̱a̱ májánʼ edxa̱la,ikháanʼla skágunʼ nguáná gáʼga̱nú majmañala rá.+
9 Bi̱ niʼni cháʼwuun xa̱bu̱, lá tséʼdxuun xáʼ.
Bi̱ niʼni iduu xa̱bu̱, lá tsíyejxi̱ xáʼ.+
10 Bi̱ naxprígún xa̱bu̱ bi̱ kúwá náa i̱ʼwáʼ xuajin, lá xándoo maxpríguala ikháanʼ xáʼ.+
¡Ikhaa nindxu̱u̱ bi̱ naʼni rí xa̱bu̱ maguaʼdáá ku̱ma̱!+
11 Jeobá ndaʼyoo rí nundxaʼwamíjna̱ xa̱bu̱,ga̱jma̱a̱ ndaʼyoo rí nditháan nda̱a̱ dí ejmaa.+
12 Jeobá,* gagi xtáa xa̱bu̱ bi̱ ikháán nataxpríguíí,+bi̱ narasngáá xtángoo ndrígáaʼ,+
13 mu matani̱ rí maxtáa tsímáá índo̱ na̱ʼkha̱nú gamiéjunʼ inuu,asndu índo̱ gájuiʼndii mbá iñáʼ náa majnguáán xa̱bu̱ xkawi̱i̱nʼ.+
14 Numuu rí Jeobá xániñúúnʼ xa̱bu̱ xuajñuu+ni má nditháan xámbumuu kaʼyoo xuajñuu.+
15 Numuu rí bi̱ nunimbaníí xkujndu muraʼwi̱i̱ maguma rí májánʼga̱jma̱a̱ xúgíinʼ bi̱ májánʼ a̱jkiu̱ún munimbaníí rí gúthi.
16 Tsáá gátujxu̱u̱ mambáyúʼ maxmína̱ʼ gajmíʼ xa̱bu̱ xkawi̱i̱nʼ rá.
Tsáá gáxtáa ga̱jma̱á nindxu̱ʼ mu maʼngo̱ʼ maxmína̱ʼ gajmíʼ xa̱bu̱ bi̱ nuni̱ dí ra̱májánʼ rá.
17 Á mu raʼkháa Jeobá nimbáyúʼ,ikhúún nikháñuʼ* má xúgi̱.+
18 Índo̱ ikhúún ni̱tha̱ “Naxnúndiu̱u̱nʼ”,
ikháán Jeobá, nitartuwúún ga̱jma̱a̱ ngajua rí tsétumuu* rí xtaʼdáá.+
19 Índo̱ ga̱jmá niʼni maʼni néʼngo̱ʼ,ikháán nitani̱i̱ a̱jkiu̱nʼ ga̱jma̱a̱ nitani̱ rí maxtáá gagi.+
20 Ikháán nditháan xámbájxáaʼ ga̱jma̱a̱ʼ mbáa xa̱bu̱ ñajunʼ* bi̱ naʼni dí ra̱májánʼ,numuu rí najmuu xtángoo mu maʼni rí marigá xkujndu.+
21 Nuni̱ ngínáa xa̱bu̱ májáanʼ+ga̱jma̱a̱ nuthi rí kaʼyoo makhañúu bi̱ nda̱a̱ aʼkhúun.*+
22 Mú Jeobá nindxu̱u̱ náa ikhúún mambáyuminaʼ,Dios ndrígóʼ nindxu̱u̱ itsí mba̱a̱ náa ikhúún nambáyuminaʼ.+
23 Ikhaa má gáʼni dí ikhiin má gáguáʼníí dí ra̱májánʼ dí nandún muni̱,+
xó má raʼkhí eni̱ ikhiin xúʼko̱ má gáʼni gámbíin.*
Jeobá Dios ndrígúlú maʼni gámbíin.+
Mbaʼa nota
^ Náa ajngáa hebreo naʼthí, “Ja”. Ja ni̱ndxu̱u̱ xóo nagumaráʼmáʼ ga̱jma̱a̱ nguáthá ajngáa mbiʼyuu Jeobá.
^ Náa ajngáa hebreo naʼthí, “Ja”. Ja ni̱ndxu̱u̱ xóo nagumaráʼmáʼ ga̱jma̱a̱ nguáthá ajngáa mbiʼyuu Jeobá.
^ Náa ajngáa hebreo naʼthí, “niguanúʼ wíí”.
^ Náa ajngáa hebreo naʼthí, “trono”.
^ Náa ajngáa hebreo naʼthí, “nuthi rí gíʼdoo aʼkhúun eʼdiuu bi̱ nda̱a̱ aʼkhúun”.
^ Náa ajngáa hebreo naʼthí “maʼni wíñúún”.
