Salmos 72:1-20
Rí naʼthí ga̱jma̱a̱ numuu Salomón.
72 Dios ndrígóʼ, atambáyíí rey mu maʼnimbánuu xtángoo ndrígáaʼ,atambáyíí rey* maʼni xó má kaʼyoo xó má natani̱ ikháán.+
2 Gámbáñún xó má kaʼyoo xa̱bu̱ xuajñaanʼga̱jma̱a̱ gaʼniu̱ún rí májánʼ xa̱bu̱ ngíníin.+
3 Kúbá gaguwaʼ kuñu̱u̱n rí tsímáá náa xuajin,xúʼko̱ má bíjní maʼni marigá xó má kaʼyoo.
4 Rey* gámbáñún* bi̱ mingíníi bi̱ kúwá náa xuajin,gáʼni káwíin e̱jñu̱ún xa̱bu̱ ngíníin,gákujmbiri̱ga̱a̱ bi̱ naʼni ngíníin xa̱bu̱.+
5 Xó má a̱jkha̱ʼ xtáa asndu kámuu,xó má gu̱nʼ xtáa asndu kámuu,xúʼko̱ mba̱yu̱u̱ʼ gámíñún kuyaaʼ bi̱ gaguwaʼ rakúwá nda̱wa̱á.+
6 Rey mani̱ndxu̱u̱ xóo ruʼwa rí naxnúu náa rajxa̱ rí nitujxi̱i̱,xóo ruʼwa gakhi̱i̱ rí narmujuun ku̱ba̱ʼ.+
7 Índo̱ gáʼtañajunʼ bi̱ naʼni rí jmbu maxtáa májánʼ,*+ga̱jma̱a̱ tsímáá mbajyúuʼ asndu kámuu+ xó má kámuu xtáa gu̱nʼ.
8 Rey maʼtáñajunʼ náa lamáa* asndu náa imbo̱o̱ lamáanáa mañu Éufrates asndu náa naguámbári̱go̱o̱ ku̱ba̱ʼ.+
9 Xa̱bu̱ bi̱ kúwá náa ku̱ba̱ʼ mijxooʼ* musmbati̱gu̱u̱n náa inuu ikhaaga̱jma̱a̱ xa̱bu̱ sia̱nʼ ndrígóo mu̱phu̱* yujndaʼ.+
10 Reyes bi̱ kúwá náa Tarsis ga̱jma̱a̱ náa islas* muni̱ numáá.+
Reyes bi̱ kúwá náa Saba* ga̱jma̱a̱ bi̱ kúwá náa Sebá maguwáʼ kudúún regalo inuu.+
11 Xúgíinʼ reyes musmbati̱gu̱u̱n inuuga̱jma̱a̱ xúgíinʼ xa̱bu̱ xuajin muni̱ ñajuunʼ.
12 Numuu rí ikhaa maʼni kríya̱a̱ʼ xa̱bu̱ ngínáa bi̱ nandxaʼwá mixtambáyíí,ga̱jma̱a̱ xúgíinʼ bi̱ ndawa̱a̱ tsáa mambáñún.
13 Magáwíinʼ a̱jkiu̱u̱n kaʼñún xa̱bu̱ ngíníi,ga̱jma̱a̱ maʼni káwíin.
14 Maʼni káwíin bi̱ naguma ngíníi ga̱jma̱a̱ bi̱ nuxnún,ikhaa mbaʼyoo rí eʼdiún ikhiin gíʼdoo wéñuuʼ numuu.
15 Gaxtáa mba̱yu̱u̱ʼ mbiʼi ga̱jma̱a̱ gagruigú oro dí na̱ʼkha̱ náa Saba.+
Gútajkáan má xúʼko̱ ga̱jma̱a̱ numuu ikhaa,ga̱jma̱a̱ guni̱ tsajkurámaaʼ kañiiʼ mbiʼi.
16 Náa ku̱ba̱ʼ marigá wéñuuʼ ganitsu,+asndu náa inuu kúbá marigá wéñuuʼ ganitsu.
Ra̱ʼkhá tháán gájma̱a̱ rí naʼdu rey xóo xaxi̱ dí rígá náa Líbano,+náa xuajin xa̱bu̱ maʼni mbaʼin xóo iná maxaʼ dí nakráʼáan náa ku̱ba̱ʼ.+
17 Mbiʼyuu garigá asndu kámuu,+xó má a̱jkha̱ʼ xtáa asndu kámuu.
Xa̱bu̱ maguma tsajkurámiinʼ ga̱jma̱a̱ numuu ikhaa,+xúgíinʼ xa̱bu̱ muthán rí xtáa gagi.
18 Gaguma mba̱a̱ Jeobá Dios, Dios ndrígóo Israel,+i̱ndó ikhaa nindxu̱u̱ bi̱ naʼni rí mitsaanʼ.*+
19 Asndu kámuu gaguma mba̱a̱ mbiʼyuu rí mitsaanʼ,+xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ guyáá nguáthá mba̱a̱ tsiaki̱i̱ gíʼdoo.+
Xúʼko̱ gáʼni,* xúʼko̱ gáʼni.
20 Gi̱i̱ má naguámbá rí niʼtájkháan David a̱ʼdióo Jesé.+
Mbaʼa nota
^ Náa ajngáa hebreo naʼthí, “a̱ʼdióo rey”.
^ Náa ajngáa hebreo naʼthí, “Ikhaa”. Gi̱i̱ naʼthí xóo maʼtáñajunʼ Salomón nda̱wa̱á.
^ Náa ajngáa hebreo naʼthí, “maʼnimbánuu numún”.
^ Náa ajngáa hebreo naʼthí, “majmidi̱i̱”.
^ O “mar”.
^ Náa ajngáa hebreo naʼthí, “muxthííʼ”.
^ O “desierto”.
^ O “ku̱ba̱ʼ rí tuáʼán náa tapo̱o̱ iyaʼ”.
^ O “Seba”.
^ O “nagui̱i̱”.
^ O “Amén”.
