Salmos 42:1-11
Rí na̱jkha̱ inuu bi̱ kayá edxu̱u̱ náa ajmúú. Salmo ndrígu̱ún e̱ji̱i̱n Coré.+ Maskil.
42 Xóo mbáa aña̱ʼ e̱ʼgú bi̱ nandoo maga̱a̱n iyaʼ dí na̱jkha̱ kuʼwúun,xúʼko̱ kaʼnii eyoʼ ma̱ni̱ ñajuaanʼ ikháán Dios ndrígóʼ.
2 Náá mbiʼi gándoo gátangu̱ún ga̱jma̱a̱ maxnáximinaʼ náa inuu Dios rá.+
A̱jkiu̱nʼ* ndayáaʼ Dios, Dios bi̱ ndaʼya, xóo mbáa xa̱bu̱ ndayáʼ iyaʼ maga̱a̱n.+
3 Nánguá ekuíʼtsú, mbiʼí mbruʼun i̱ndó nambi̱ya̱ʼ,xúgíʼ mbiʼi xa̱bu̱ nutsijmúún, nuthu̱nʼ “Náá xtáa Dios ndrígáaʼ rá.”+
4 Ra̱ʼkhá tháán egáwíinʼ a̱jkiu̱nʼ, índo̱ narmáʼáan a̱jkiu̱nʼ rígi̱,numuu dí nirígá mbá tiempo rí ikhúún ni̱jkhá gajmíʼ xa̱bu̱ mbaʼin,gi̱núún frúwan ra̱jkhá náa inún ikhiin mu maxnu̱u̱n ikha magún náa goʼwóo Diosnindxaʼwaxu̱ gagi ga̱jma̱a̱ nixna̱a̱ʼxu núma̱aʼ Dios,ra̱ʼkhá tháán mbaʼáanʼxu̱ niniri̱ya̱ʼxu̱ ndxa̱a̱.+
5 Náá numuu rí najmúʼ wéñuuʼ rá.+
Náá numuu rí xtáá ngíná wéñuuʼ rá.
Magúʼthu̱u̱n Dios,+matangu̱ún ma̱ni̱ mba̱a̱ mbu̱júu̱ Dios ndrígóʼ bi̱ Naʼni kríñu̱u̱nʼ.+
6 Dios ndrígóʼ, xtáá ngíná wéñuuʼ.+
Ikha jngóo narmáʼáan a̱jkiu̱nʼ ka̱ya̱a̱ʼ,+asndu náa ku̱ba̱ʼ ndrígóo Jordán náa inuu kúbá Hermón,náa kúbá Mizar.
7 Iyaʼ mi̱jnu̱ʼ nandxa̱ʼóo iyaʼ mi̱jnu̱ʼnawáán gakhi̱i̱ naʼndatígú iyaʼ.
Xúgíʼ iyaʼ rí naʼbajxu̱u̱ nirmbújxu̱u̱n.+
8 Rí mbiʼi, Jeobá masngájmuʼ ngajua rí tsétumuu,*dí mbruʼun ma̱ni̱ ajmúú ga̱jma̱a̱ numuu ikhaa: Matakáñuu Dios ndrígóʼ bi̱ naʼni rí maxtáá.+
9 Dios, bi̱ nindxu̱u̱ pátsí ndrígóʼ, marajxu̱u̱:
“Náá numuu rí nimbumaaʼ xtayoʼ rá.+
Náá numuu rí ndayóoʼ majngruigoʼ ngíná gi̱i̱ ñúʼún ga̱jma̱a̱ numuu rí naʼni ngínún xa̱bu̱ sia̱nʼ rá.”+
10 Xa̱bu̱ sia̱nʼ nuta wéñúʼ, ra̱ʼkhá tháán wi̱ñu̱u̱nʼ kuyoʼ*xúgíʼ mbiʼi nutsijmúún, nuthu̱nʼ “Náá xtáa Dios ndrígáaʼ rá.”+
11 Náá numuu rí najmúʼ wéñuuʼ rá.
Náá numuu rí xtáá ngíná wéñuuʼ rá.
Magúʼthu̱u̱n Dios,+matangu̱ún ma̱ni̱ mba̱a̱ mbu̱júu̱ Dios ndrígóʼ bi̱ Naʼni kríñu̱u̱nʼ.+
Mbaʼa nota
^ O mbáa “xóo nuxujmbi̱i̱ itsuʼ”.
