Salmos 77:1-20
Rí na̱jkha̱ inuu bi̱ kayá edxu̱u̱ náa ajmúú, ndrígóo Jedutún. Salmo ndrígóo Asaf.+
77 Gakhi̱i̱ gándxa̱ʼwa̱ mu ma̱ndo̱ʼo̱o̱ Dios rí mambáyúʼ,mandxa̱ʼo̱o̱ Dios ga̱jma̱a̱ ikhaa má gáʼdxawunʼ.+
2 Índo̱ xtáá ngíná, ndaʼyáaʼ Jeobá.+
Kañiiʼ mbruʼun natakáñuu Dios.*
Nimbá tséʼni̱i̱ a̱jkiu̱nʼ.
3 Asndu natsi̱ná índo̱ narmáʼáan a̱jkiu̱nʼ ka̱yo̱o̱ Dios,+naku̱mu̱ʼ dí naxmiéjunʼ wéñuuʼ ga̱jma̱a̱ nánguá gúʼdoo tsiaki̱i̱.*+ (Sélah).
4 Tsétatsíñúʼ migú,ra̱ʼkhá tháán exmiéjunʼ rí asndu nánguá eʼngo̱ʼ gátha.
5 Rí nandxa̱ʼwa̱mínáʼ nindxu̱u̱ dí nirígá nákha wajyúuʼ,+dí nirígá náa tsiguʼ dí ninújngoo.
6 Rí mbruʼun narmáʼáan a̱jkiu̱nʼ eʼni ajmúú dí ni̱ni̱,+na̱ndxa̱ʼwa̱mínáʼ náa awúu̱n a̱jkiu̱nʼ,+ndaʼyáʼ* mba̱yo̱o̱ xóo gáxti̱ʼña̱a̱ grajxe̱ rígi̱.
7 Lá asndu kámuu gániñulú Jeobá ráʼ.+
Lá nditháan xátanga̱a̱ maʼdxuu kaʼyulú xáʼ.+
8 Lá niguámbáa ngajua rí tsétumuu* rí gíʼdoo xáʼ.
Lá xáʼnimbánuu rí nikudaminaʼ maʼni náa bi̱ maguwáʼ rakúwá nda̱wa̱á xáʼ.
9 Lá nimbumuu Dios maʼniulú rí májánʼ ráʼ.+Lá ga̱jma̱a̱ numuu rí nakásngañu̱u̱ʼ niʼni rí xágáwíinʼ a̱jkiu̱u̱n kaʼyulú xáʼ. (Sélah).
10 Lá mbaʼyóoʼ ma̱ta̱ má xúʼko̱ “Rí naʼni maxmiéjunʼ+
rí bi̱ phú Mba̱a̱ nánguá eyoo gámbáyulú” ráʼ.
11 Marmáʼáan a̱jkiu̱nʼ rí niʼni Jeobá,*marmáʼáan a̱jkiu̱nʼ xúgíʼ rí mitsaanʼ* nitani̱ asndu nákha wajyúuʼ.
12 Mandxa̱ʼwa̱mínáʼ ga̱jma̱a̱ numuu xúgíʼ ñajunʼ rí nitani̱,mandxa̱ʼwa̱mínáʼ ga̱jma̱a̱ numuu rúʼko̱.+
13 Dios ndrígóʼ, kaʼwu nindxu̱u̱ kamba̱a̱ʼ.
Lá xtáa i̱mba̱a̱ dios xóo ikháán ráʼ.+
14 Ikháán nindxa̱a̱ʼ Dios bi̱ gajkhun, bi̱ naʼni rí mitsaanʼ.+
Ikháán nitasngájmúún tsiaki̱i̱ rí xtaʼdáá i̱ʼwáʼ xuajin.+
15 Ga̱jma̱a̱ tsiaki̱i̱ ndrígáaʼ* nitani̱ káwíin* xa̱bu̱ xuajñaanʼ,+e̱ji̱i̱n Jacob ga̱jma̱a̱ e̱ji̱i̱n José. (Sélah).
16 Dios ndrígóʼ, iyaʼ ndiʼyaaʼ,índo̱ iyaʼ ndiʼyaaʼ nimíñuu.+
Ga̱jma̱a̱ iyaʼ rí mi̱jnu̱ʼ niʼbajxu̱u̱.
17 Du̱u̱n niʼni rí maxnúu ruʼwa.
Mekhu rí kambájtu̱u̱n niʼni rí majmidá a̱jkhu̱u̱n*ga̱jma̱a̱ nixpíbiʼ asndu náá.+
18 Rí xóo natani̱ mujmidá a̱jkhu̱u̱n+ nindxu̱u̱ xóo nawáán llántóo carro,rí nixpíbiʼ nimbiʼiti̱ga̱ náa tsu̱du̱u̱ ku̱ba̱ʼ náa kúwá xa̱bu̱,+ku̱ba̱ʼ niʼba̱a̱n ga̱jma̱a̱ nimíñuu.+
19 Náa tu̱mba̱a̱ lamáa* nitarmbáʼtáá kamba̱a̱ʼ,+náa majñu̱u̱ʼ mba̱ji̱nʼ iyaʼ ni̱jkha̱ kamba̱a̱ʼ,mú na̱nguá nikujma̱a̱ náa ninújngaaʼ.
20 Niraxnún ikha xa̱bu̱ xuajñaanʼ xóo mugu̱,+Moisés ga̱jma̱a̱ Aarón nitrajkuáa ñawúúnʼ rí muñewu̱u̱n.+
Mbaʼa nota
^ Náa ajngáa hebreo naʼthí, “Rí mbruʼun juáʼwíi má xúʼko̱ ñawúnʼ náa ikháán ga̱jma̱a̱ tsékruígúu”.
^ Náa ajngáa hebreo naʼthí, “tsiaki̱i̱ ndrígóʼ”.
^ Náa ajngáa hebreo naʼthí, “Ja”. Ja ni̱ndxu̱u̱ xóo nagumaráʼmáʼ ga̱jma̱a̱ nguáthá ajngáa mbiʼyuu Jeobá.
^ O “nagui̱i̱”.
^ Náa ajngáa hebreo naʼthí, “ñawáanʼ”.
^ Náa ajngáa hebreo naʼthí, “niratsiwíin”.
^ O “bi̱gu̱”.
^ O “mar”.
