Salmos 74:1-23
Maskil. Salmo ndrígóo Asaf.+
74 Dios ndrígóʼ, náá numuu rí nánguá eyaaʼ xtayuxu mbá kayuuʼ rá.+
Náá numuu rí nakha xóo aguʼ* rí nakásnga̱ña̱a̱ʼ xtañún mugu̱ bi̱ kúwá náa ra̱jxa̱a̱ʼ rá.+
2 Gármáʼáan a̱jkia̱a̱nʼ eʼni xuajin* rí nitandrigúu̱ nákha wajyúuʼ,+xuajin chíʼgíiʼ* rí nitani̱ kríya̱a̱ʼ* mu mani̱ndxu̱u̱ xuajñaanʼ.+
Garmáʼáan a̱jkia̱a̱nʼ eʼni kúbá Sion, náa niraxtaa.+
3 Xa̱bu̱ sia̱nʼ niʼni gámbóo xúgíʼ náa mbaaʼ rí mikaʼwu.+
Atiejxi̱ mu ma̱ta̱ya̱a̱ xóo niguma gámbáa mbá kayuuʼ.+
4 Xa̱bu̱ bi̱ tsíñún gúyaaʼ nindxa̱ʼwa̱ náa nagimbíi̱n xa̱bia̱a̱ʼ mu mbuyamajkuaaʼ.+
Ikhí nitsiji mbá tsinaʼ rí nasngájma rí ikhiin kúwá ikhí.
5 Nindxu̱ún xóo xa̱bu̱ bi̱ nurujtu ixi̱ náa xaxi̱ ga̱jma̱a̱ hacha.
6 Nijmún hacha ga̱jma̱a̱ ajua̱nʼ rí mbi̱jua̱ mu muni̱ gámbáa xúgíʼ dí kiʼniwíi dí rígá ikhí.+
7 Nigida̱a̱ʼ agiuuʼ nikha̱a̱ guʼwáaʼ rí kaʼwu.+
Tuyamajkuíí guʼwá xtíin rí kayá mbiʼyaaʼ, nini nga̱jxi̱i̱.
8 Ikhiin gajmiún e̱jñu̱ún nindxaʼwamíjna̱ náa awúu̱n a̱jkiu̱ún:
“Mutsiʼkháa xúgíʼ náa nagimbíi̱n xa̱bu̱ bi̱ nduyamajkuíí Dios dí rígá náa tsu̱du̱u̱ ku̱ba̱ʼ”.
9 Nimbáa rí ikháanʼ tséʼyoo nguáthá mba̱yu̱u̱ʼ gájyúuʼ rígi̱,nimbá tsinaʼ nda̱a̱ mu mbu̱ya̱a̱xu̱,nánguá guanúu nimbáa profeta.*
10 Dios ndrígúxu̱, asndu nguáthá mba̱yu̱u̱ʼ gátsíjma má xúʼko̱ xa̱bu̱ sia̱nʼ rá.+
Lá maríya̱ʼ majkhuu má xúʼko̱ mbiʼyaaʼ xa̱bu̱ sia̱nʼ ráʼ.+
11 Náá numuu rí natrikháá ñawún májáanʼ rá.+
Atríya̱a̱ʼ ñawáanʼ náa awúu̱n xtíñáanʼ ga̱jma̱a̱ atani̱ gámbíin.
12 Mú Dios nindxu̱u̱ Rey ndrígóʼ asndu nákha wajyúuʼ,ikhaa naʼni káwíin xa̱bi̱i̱ náa tsu̱du̱u̱ ku̱ba̱ʼ.+
13 Ga̱jma̱a̱ tsiaki̱i̱ dí xtaʼdáá nitani̱ rí maʼbajxu̱u̱ lamáa,*+náa iyaʼ nitaxújmbi̱i̱ edxu̱ún xujkhúʼ mbaʼwi̱i̱n bi̱ kúwá náa lamáa.
14 Nitáxpígu̱u̱ edxu̱u̱* Leviatán,*niraxnún mu̱phu̱ xa̱bu̱ xuajin bi̱ kúwá náa ku̱ba̱ʼ mijxooʼ.
15 Nitarmbáʼtáá iduu iyaʼ ga̱jma̱a̱ nitani̱ rí maʼga kúʼwúun,+nitani̱ rí mujndooʼ mañu rí na̱jkha̱ má xúʼko̱.+
16 Ikháán kaʼyaaʼ rí mbiʼi ga̱jma̱a̱ rí mbruʼun.
Nitani̱i̱ a̱jkha̱ʼ ga̱jma̱a̱ nitani̱ dí marigá aguʼ.+
17 Ikháán nitagíʼ náa maʼga túmúu xúgíʼ ku̱ba̱ʼ.+Nitani̱ ruʼphu ga̱jma̱a̱ maʼga̱nú gu̱nʼ dí maʼni migúwán.*+
18 Jeobá, garmáʼáan a̱jkia̱a̱nʼ xóo etsijmáanʼxu̱ xa̱bu̱ sia̱nʼ,xóo xa̱bu̱ xuajin bi̱ tséndxa̱ʼwa̱a̱ májánʼ edxu̱ún tséyamajkuíí mbiʼyaaʼ.+
19 Nindxu̱xu̱ mbáa gúgu̱, xátatsiʼñúxu náa ñawúúnʼ xa̱bu̱ sia̱nʼ numuu rí ikhiin nindxu̱ún xóo xujkhú xáná.
Xámbumaaʼ xtañún mbá kayuuʼ xa̱bu̱ xuajñaanʼ bi̱ numíniiʼ.
20 Garmáʼáan a̱jkia̱a̱nʼ rí nimbánaaʼ,numuu rí náa mbaaʼ rí mikína dí rígá náa tsu̱du̱u̱ ku̱ba̱ʼ ra̱ʼkhá tháán gi̱ʼdu̱u̱n xa̱bu̱.
21 Gáʼni rí xájmáan a̱jkiu̱u̱n bi̱ naguma ngínáa,+gaʼni mba̱a̱ mbiʼyaaʼ bi̱ ndawa̱a̱ tsáa mambáyúu ga̱jma̱a̱ bi̱ migínáa.+
22 Dios ndrígóʼ atujxa̱a̱ʼ, ga̱jma̱a̱ atanimbáníí numaaʼ xó má kaʼyoo.
Garmáʼáan a̱jkia̱a̱nʼ rí kañiiʼ mbiʼi nutawéñáaʼ bi̱ tséndxa̱ʼwa̱a̱ májánʼ edxu̱ún.+
23 Xámbumaaʼ rí jngruigu̱u̱n ruthi xa̱bu̱ bi̱ tsíñún gúyaaʼ.
Na̱jkha̱ rawáán itháán rí xóo nundxa̱ʼwa̱ xa̱bu̱ bi̱ nuxuximi̱jna̱ náa inaaʼ.
