Salmos 24:1-10
-
Rey bi̱ gíʼdoo tsiaki̱i̱ nato̱ʼo̱o̱ náa xkrugua
-
Jeobá kaʼyoo ku̱ba̱ʼ (1)
-
Salmo ndrígóo David.
24 Jeobá kaʼyoo ku̱ba̱ʼ ga̱jma̱a̱ xúgíʼ dí rígá ikhí,+mbaaʼ náa najma̱a̱ ga̱jma̱a̱ bi̱ kúwá ikhí.
2 Numuu dí ikhaa nigrígu gújkhúʼ ku̱ba̱ʼ náa tsu̱du̱u̱ lamáa*+ga̱jma̱a̱ nigíwanʼ jxa̱ʼ náa tsu̱du̱u̱ mañu.
3 Tsáá gándoo matsimuu náa kúbá ndrígóo Jeobá rá.+Tsáá gándoo maxtáa náa goʼwóo rí kaʼwu xá.
4 Bi̱ nda̱a̱ aʼkhúun ga̱jma̱a̱ kaʼwu a̱jkiu̱u̱n,+bi̱ tséjmuu mbiʼyuʼ* mu maʼthí dí ragájkhun,ni má tséxná ajngóo mu maʼni nduwaʼ.+
5 Jeobá maʼni tsajkurámaaʼ xa̱bu̱ buʼko̱+ga̱jma̱a̱ Dios bi̱ naʼni kríya̱a̱ʼ+ mbaʼyoo dí nindxu̱u̱ xa̱bu̱ májáanʼ.
6 Xa̱bu̱ bugi̱ nindxu̱ún bi̱ nduñáánʼ,bi̱ nandún mbuyáá inaaʼ ikháánʼ, Dios ndrígóo Jacob. (Sélah).
7 ¡Xkrugua gatujxala!+¡Gurmbátamíjnála riejun wayuu,mu mato̱ʼo̱o̱ Rey bi̱ gíʼdoo tsiaki̱i̱!+
8 Tsáá nindxu̱u̱ Rey bi̱ gíʼdoo tsiaki̱i̱ rá.
Nindxu̱u̱ Jeobá bi̱ xkujiiʼ ga̱jma̱a̱ gíʼdoo tsiaki̱i̱,+Jeobá bi̱ naʼngo̱o̱ nadaaʼ náa nuxmijná.+
9 ¡Xkrugua gatujxala!+¡Gurmbátamíjnála riejun wayuu,mu mato̱ʼo̱o̱ Rey bi̱ gíʼdoo tsiaki̱i̱!
10 Tsáá ñajuunʼ ikhaa xá. Tsáá nindxu̱u̱ Rey bi̱ gíʼdoo tsiaki̱i̱ rá.
Nindxu̱u̱ Jeobá bi̱ naʼtáñajúúnʼ ángeles: Ikhaa nindxu̱u̱ Rey bi̱ gíʼdoo tsiaki̱i̱.+ (Sélah).
