Salmos 68:1-35
Rí na̱jkha̱ inuu bi̱ kayá edxu̱u̱ náa ajmúú. Salmo ndrígóo David. Ajmúú.
68 Gatu̱jxu̱u̱ Dios, xa̱bu̱ sia̱nʼ ndrígóo gajuiʼdáríʼiinga̱jma̱a̱ bi̱ nawiñu̱u̱nʼ kuyáá gamiñúún ga̱jma̱a̱ gangujuíin ragáñúún.+
2 Ayuʼ xtiin xó ma giñánʼ na̱jkha̱ kayóo gúní,xó má aguʼ narjuiya̱a̱ʼ éjthi̱i̱n,xúʼko̱ gaguma gámbíin xa̱bu̱ xkawi̱i̱nʼ náa inuu Dios.+
3 Mú xa̱bu̱ bi̱ nuni̱ rí májánʼ gakuwá gagi,+gakuwá gagi wéñuuʼ náa inuu Dios,gáʼdxuu wéñuuʼ a̱jkiu̱ún.
4 Gu̱ni̱ ajmúú mu maʼdxuun Dios, gu̱ni̱ ajmúú mu muni̱ mba̱a̱ mbiʼyuu.+
Gu̱ni̱ ajmúú mu maʼdxuun bi̱ gríguíi wáyúu nanújngoo náa xkua̱ mijxooʼ.
¡Jeobá* mbiʼyuu!+ ¡Gakuwáanʼla gagi náa inuu ikhaa!
5 Asndu náa mikaʼwu rí xtáa Dios+nindxu̱u̱ anu̱ún* ejín wáʼa ga̱jma̱a̱ bi̱ nañewu̱u̱n* gu̱ʼú xuáʼa̱.+
6 Dios naxnún náa makuwá bi̱ kúwá ndajkuíín,+naʼni káwíin bi̱ kaxtuʼwún ga̱jma̱a̱ cadena ma̱ngaa naʼni rí makuwá májánʼ.+
Mú bi̱ gújkhúʼ a̱jkiu̱ún mbaʼyóoʼ makuwá náa ku̱ba̱ʼ rí nda̱a̱ iyaʼ.+
7 Dios ndrígóʼ, índo̱ niraxnún ikha* xa̱bu̱ xuajñaanʼ,+índo̱ nidxu̱ʼ xtiin náa ku̱ba̱ʼ mijxooʼ,* (Sélah)
8 ku̱ba̱ʼ niʼba̱a̱n,+asndu mekhuíí Dios niʼni rí maxnuu ruʼwa,niʼba̱a̱n kúbá Sinaí ga̱jma̱a̱ numuu Dios ndrígóo Israel.+
9 Dios ndrígóʼ nitani̱ rí maxnúu gakhi̱i̱ ruʼwa,niraxníin tsiaki̱i̱ xa̱bu̱ xuajñaanʼ bi̱ néʼngu̱u̱n.
10 Dios ndrígóʼ, xa̱bu̱ xuajñaanʼ nikúwá náa guʼwá xtíin,+ga̱jma̱a̱ numuu rí májáanʼ a̱jkia̱a̱nʼ niraxnáá rí ndayóoʼ xa̱bu̱ gínáa.
11 Jeobá naʼtáñajuunʼ xuajñuu,gu̱ʼu̱ bi̱ nutaraʼa ajngáa rí májánʼ nindxu̱ún xóo soldado bi̱ mbaʼin.+
12 Reyes gajmiún soldádiu̱ún ningujuíin ragáñúún,+ ¡nánguá ewájun!
Bi̱ niguanúu guʼwáá ma̱ngaa nagruigú rí nida̱a̱.+
13 Maski ajndu nibala ndiya̱a̱ jxa̱la náa níjniúu tri̱ga̱ agiala náa nigiʼñáanʼla* índo̱ nijkua gúxmíjná,makániala mbáa paloma bi̱ kixtajmáá plata xpíjpiúuga̱jma̱a̱ xniuuʼ nindxu̱u̱ mbawíí oro rí májánʼ.
14 Nigajtaa idiʼ náa Zalmóníndo̱ bi̱ gíʼdoo xúgíʼ Tsiaki̱i̱ niʼni rí majuidáriʼiin reyes bi̱ kúwá náa tsu̱du̱u̱ ku̱ba̱ʼ rígi̱.+
15 Kúbá Basán+ nindxu̱u̱ kúbá ndrígóo Dios,kúbá Basán nindxu̱u̱ náa rígá mbaʼa kúbá rí mitsídánʼ.
16 Ikháanʼla kúbá rí mitsídánʼ, náá numuu rí nuyejxi̱i̱ ga̱jma̱a̱ sia̱nʼkúbá rí Dios niraʼwíí mu maxtáa rá.+
Gajkhun dí Jeobá maxtáa ikhí asndu kámuu.+
17 Ra̱ʼkhá tháán mbaʼa carro rí Dios naʼni ga̱jma̱a̱ guerra.+
Jeobá ni̱ʼkha̱ náa kúbá Sinaí asndu náa mbaaʼ rí mikaʼwu.+
18 Jeobá* Dios, nidxu̱ʼ náa itháán mitsídánʼ+nidxu̱ʼ xtiin xa̱bu̱ bi̱ nitrugui̱i̱nnidxu̱ʼ xtiin xa̱bu̱ xóo regalo,+asndu xa̱bu̱ bi̱ gújkhúʼ a̱jkiu̱ún,+ nidxu̱ʼ xtiin mu makuwá náa majñu̱únʼ ikhiin.
19 Gaguma mba̱a̱ Jeobá, numuu rí mámbá mbiʼi nambáyulú ga̱jma̱a̱ rí mikiwu̱n kuʼda,+Dios bi̱ gajkhun nindxu̱u̱ bi̱ naʼni káwáánʼlú. (Sélah).
20 Ikháánʼlú nduʼyáá rí Dios bi̱ gajkhun nindxu̱u̱ mbáa Dios bi̱ naʼni káwáánʼlú,+Jeobá, Tátá bi̱ itháán Mba̱a̱, naʼni káwáánʼlú náa rí nakháñulú.+
21 Gajkhun rí Dios makujmbiri̱ga̱ edxu̱ún xa̱bu̱ sia̱nʼ ndrígóo,makujmbiri̱ga̱ itsu̱ edxu̱ún xa̱bu̱ bi̱ tséniña̱a̱ʼ raxuda̱mi̱jna̱ aʼkhá.+
22 Jeobá niʼthí: “Asndu náa Basán maʼkháaʼ kagui̱i̱n xa̱bu̱ sia̱nʼ ndrígóʼ,+asndu náa mi̱jnu̱ʼ lamáa* maxmajuíin maʼkháaʼ kagui̱i̱n xa̱bu̱ sia̱nʼ,
23 mu ikháán mataxuʼmááʼ rajkuáaʼ náa eʼdiún xa̱bu̱ sia̱nʼ ndrígáaʼ,+ma̱ngaa mu xu̱ñáanʼ muxtíí’ eʼdiún”.
24 Dios ndrígóʼ, ikhiin mbuyáá xóo kri̱ga̱ enii xa̱bia̱a̱ʼ eguwáanʼ náa ikháán’ niʼnga̱a̱ʼ nitadaa’,Rey ndrígóʼ, mbuñún xa̱bia̱a̱ʼ rí naguwáanʼ nataʼa̱án náa mbaaʼ rí mikaʼwu.+
25 Bi̱ nuni̱ ajmúú nagún ginuu,wa̱ʼxa̱ʼ* bi̱ nudi̱i̱ pandereta nagún tumba̱a̱,+ bi̱ nudi̱i̱ ajua̱nʼ dí gíʼdoo cuérdóo nagún kidííʼ.+
26 Ikháanʼ xa̱bu̱ mbaʼin bi̱ nagimbáanʼ gu̱ni̱ mba̱a̱ Dios,gu̱ni̱ mba̱a̱ Jeobá, ikháanʼ bi̱ naguwa̱ʼ náa Ni̱ʼkha̱ Israel.+
27 Benjamín,+ bi̱ itháán gi̱ʼta̱ xtáa ikhí naʼtáñájúúnʼ,ma̱ngaa príncipes ndrígóo Judá gajmiún mbaʼin xa̱bu̱ bi̱ nundxa̱ʼwa̱ ga̱jma̱a̱ gagi,xúʼko̱ má príncipes ndrígóo Zabulón ga̱jma̱a̱ príncipes ndrígóo Neftalí.
28 Dios ndrígáaʼ niraʼwíí dí maxnáaʼ tsiaki̱i̱.
Dios ndrígóʼ, atasngájma tsiaki̱i̱ rí xtaʼdáá, ikháán rí nitambáyuxu̱.+
29 Ga̱jma̱a̱ numuu guʼwáaʼ dí rígá náa Jerusalén,+reyes maguwáʼ kudúún regalos muxnaa’.+
30 Naxprígún xujkhúʼ xáná bi̱ kúwá náa majñu̱u̱ʼ ra̱jxa̱ iyaʼ,xúʼko̱ má toro+ ga̱jma̱a̱ e̱jín xédí,asndu índo̱ xa̱bu̱ xuajin gúsmbati̱gu̱u̱n ga̱jma̱a̱ maguwáʼ kudúún plata.
Mú ikhaa naxídiriʼiin xa̱bu̱ bi̱ nanigu̱u̱nʼ muni̱ guerra.
31 Náa Egipto maguwáʼ kudúún dí nigu̱ma̱ ga̱jma̱a̱ bronce,*+Cus ma̱ʼcho̱o̱ ma̱ʼkha̱ kagu̱u̱ regalo náa Dios.
32 Xa̱bu̱ ñajunʼ bi̱ kúwá náa tsu̱du̱u̱ ku̱ba̱ʼ, gu̱ni̱ ajmúú náa Dios,+gu̱ni̱ ajmúú* mu mu̱ni̱ mba̱a̱ Jeobá, (Sélah)
33 bi̱ gríguíi wáyúu nanújngoo náa mekhu dí rígá itháán mitsídánʼ dí rígá asndu nákha wajyúuʼ.+
¡Gu̱ya̱a̱la! Aʼwóo nawáán xóo índo̱ najmídá, aʼwóo gíʼdoo tsiaki̱i̱.
34 Gu̱ya̱a̱la nguáthá tsiaki̱i̱ gíʼdoo Dios.+
Náa Israel nindxu̱u̱ náa nagruigú gamajkhu,tsiaki̱i̱ ndrígóo rígá mekhuíí.*
35 Xa̱bu̱ mbaʼyóoʼ maguaʼdáá gamajkhún ga̱jma̱a̱ mamiñún kuyáá Dios asndu náa ikhaa xtáa.+
Ikhaa nindxu̱u̱ Dios ndrígóo Israel,naxnúu tsiaki̱i̱ xuajñuu.+
Gaguma mba̱a̱ Dios.
Mbaʼa nota
^ Náa ajngáa hebreo naʼthí, “Ja”. Ja ni̱ndxu̱u̱ xóo nagumaráʼmáʼ ga̱jma̱a̱ nguáthá ajngáa mbiʼyuu Jeobá.
^ O “tátiu̱ún”.
^ Náa ajngáa hebreo naʼthí, “bi̱ naʼnimbánuu numún”.
^ Náa ajngáa hebreo naʼthí, “nidxu̱ʼ giníín náa inún”.
^ O “desierto”.
^ O mbáa “náa majñu̱u̱ʼ gúlu̱ún mugu̱”.
^ Náa ajngáa hebreo naʼthí, “Ja”. Ja ni̱ndxu̱u̱ xóo nagumaráʼmáʼ ga̱jma̱a̱ nguáthá ajngáa mbiʼyuu Jeobá.
^ O “mar”.
^ O “i̱jín go̱ʼo̱”.
^ O mbáa “maguwá’ xa̱bu̱ ñajunʼ”.
^ O “gudi̱i̱ ajmúú”.
^ Náa ajngáa hebreo naʼthí, “du̱u̱n”.
