Salmos 106:1-48
106 ¡Gu̱ni̱ mba̱a̱la Jeobá!*
Guxna̱a̱ núma̱aʼ Jeobá numuu rí májánʼ a̱jkiu̱u̱n,+dí nandoo kaʼyulú* ndajyúuʼ asndu kámuu.+
2 Tsáá gáʼngo̱o̱ maʼthí dí Jeobá niʼni ga̱jma̱a̱ tsiaki̱i̱ ndrígóoo maʼthí xúgíʼ rí niʼni mu magruigú gamajkhu xá.+
3 Gagi kúwá bi̱ nuni̱ xó má kaʼyoo,bi̱ nuni̱ má xúʼko̱ rí májánʼ.+
4 Jeobá, garmáʼáan a̱jkia̱a̱nʼ xtayoʼ índo̱ gáʼni a̱jkia̱a̱nʼ xtañún xa̱bu̱ xuajñaanʼ.+
Atiewu̱nʼ ga̱jma̱a̱ atani̱ kríñu̱u̱nʼ,
5 mu xúʼko̱ maʼdxuʼ ga̱jma̱a̱ rí májánʼ a̱jkia̱a̱nʼ dí natasngájmún bi̱ nitraʼwíin,+mu xúʼko̱ maxtáá gagi mbóó gajmíʼ xa̱bu̱ xuajñaanʼ,mu ma̱ni̱ mba̱a̱n mbóó gajmíʼ xa̱bia̱a̱ʼ.*
6 Nixuʼdámíjnáxu̱ aʼkhá, xó má wajin xiʼñúxu,+ninixu̱ dí ra̱májánʼ, ninixu̱ rí xkawiʼ.+
7 Náa Egipto, wajin xiʼñúxu támajkhún rí mitsaanʼ* nitani̱.
Nimbumún kuyáá ngajua rí tsétumuu dí ra̱ʼkhá tháán mba̱a̱ rí xtaʼdáá,dí phú nini̱ nixujximíjna̱ náa rawuunʼ lamáa Maña̱ʼ.*+
8 Mú, ga̱jma̱a̱ numuu mbiʼyuu, ikhaa niʼni káwíin,+mu masngájma nguáthá mba̱a̱ tsiaki̱i̱ gíʼdoo.+
9 Nixprígúu lamáa Maña̱ʼ ga̱jma̱a̱ lamáa nijndooʼ,nixná ikhún magún náa tapo̱o̱ lamáa xóo náa mbá ku̱ba̱ʼ mijxooʼ,*+
10 niʼni káwíin náa ñawúúnʼ bi̱ tsíñún gúñún,+niʼni káwíin náa ñawúúnʼ xa̱bu̱ sia̱nʼ.+
11 Iyaʼ niruguaru̱wi̱i̱n xa̱bu̱ sia̱nʼ ndrígu̱ún,nimbáa dí ikhiin tákríya̱a̱ʼ.+
12 Asndu ikhú, ikhiin niguáʼdáá fe náa rí ikhaa nikudaminaʼ maʼni,+nigíʼdi̱i̱ nini̱ ajmúú mu muni̱ mba̱a̱.+
13 Mú mbá nacha̱ nimbumún dí ikhaa niʼni,+na̱nguá niguáʼthi̱i̱n rí maxnún ikha.
14 Mbaʼa rí nindúún maguaʼdáá náa ku̱ba̱ʼ mijxooʼ náa nisngájma rí i̱ndó nixmiéjunʼ kuyamijná ikhiin,+nindri̱ga̱ tsáʼkhá náa inuu Dios náa ku̱ba̱ʼ mijxooʼ.+
15 Ikhaa nixnúún rí ikhiin ninda̱ʼa̱a̱,mú nda̱wa̱á nixnúún mbá nandii mbiiʼ dí niʼni rí makáguabiinʼ ga̱jma̱a̱ makhañún.+
16 Náa kúwá nixígu̱u̱n kuyáá Moisésga̱jma̱a̱ Aarón,+ bi̱ Jeobá niraʼwíi.+
17 Ikhú ku̱ba̱ʼ nimbaʼtoo ga̱jma̱a̱ niʼku̱rajngiúunʼ Datánxúʼko̱ má bi̱ xtáa gajmíi̱n Abiram.+
18 Nikamuu mbá aguʼ náa majñu̱únʼ ikhiin,ga̱jma̱a̱ mbá riʼyu̱u̱ aguʼ niʼni gámbíin xa̱bu̱ ra̱míjíinʼ.+
19 Náa Horeb nini̱i̱ mbáa a̱ʼdá xédí,nismbati̱gu̱u̱n náa inuu mbáa xándú bi̱ ki̱ʼni̱i̱ ga̱jma̱a̱ ajua̱nʼ,+
20 nixnáá gamajkhu rí kaʼyoʼ ikhúún,xtiʼkhuu mbáa xedi̱ bi̱ na̱ʼkhu̱ ra̱jxa̱.+
21 Nimbumúún kuyáá Dios+ ndrígu̱ún bi̱ Niʼni káwíin,bi̱ niʼni mbaʼa rí mitsaanʼ náa Egipto,+
22 mitsaanʼ nindxu̱u̱ rí niʼni náa ku̱ba̱ʼ ndrígóo Cam,+ra̱ʼkhá tháán mitsaanʼ rí niʼni náa lamáa Maña̱ʼ.+
23 Ikhaa inu maʼtáñajunʼ rí maguma gámbíin,mú, Moisés bi̱ niraʼwíi niʼthí ga̱jma̱a̱ numún náa inuu ikhaa,niʼtákáñuu rí maniñuuʼ rakásnga̱ñu̱u̱ʼ mu xáʼni gámbíin.+
24 Ikhiin tángaju̱u̱n ku̱ba̱ʼ rí mitsaanʼ,+táguáʼdáá fe náa rí nikudaminaʼ maʼni.+
25 Nixieʼkhá má xúʼko̱ náa awúu̱n guʼwá xtíin rí kúwá,+na̱nguá nidxawíín aʼwóo Jeobá.+
26 Ikhaa rúʼko̱ numuu rí ikhaa nikujxi̱ ñawúunʼ ga̱jma̱a̱ nixná ajngóo,rí maʼni gámbíin náa ku̱ba̱ʼ mijxooʼ,+
27 maʼni rí e̱jñu̱ún makhañún náa i̱ʼwáʼ xuajin,ga̱jma̱a̱ rí maxídiriʼiin náa i̱ʼwáʼ xuajin.+
28 Nda̱wa̱á ikhiin nigi̱ʼdi̱i̱ ndiyamajkuíí Baal bi̱ nduyamajkuíí náa Peor,+ga̱jma̱a̱ ni̱ʼphu̱ ganitsu rí nixnajxi̱ náa inún wajinʼ.*
29 Nini̱ rí makásngañu̱u̱ʼ Dios ga̱jma̱a̱ rí nini̱,+ikhú mbá nandii ni̱ʼkha̱nú náa ikhiin.+
30 Mú índo̱ Finehás nitu̱jxu̱u̱ ga̱jma̱a̱ rígá rí niʼni,ikhú núkhú má niwi̱ji̱i̱ nandii.+
31 Ga̱jma̱a̱ numuu rígi̱ rí asndu kámuu nijmaʼniiʼ rí nindxu̱u̱ xa̱bu̱ jmbii,náa xúgíinʼ bi̱ niguwáʼ rakúwá nda̱wa̱á.+
32 Ikhiin nini̱ rí makásngañu̱u̱ʼ* náa iyaʼ dí rígá náa Meribá,*ga̱jma̱a̱ numún ikhiin tágajnuu májánʼ rí niʼni Moisés.+
33 Nini̱ rí makásngañu̱u̱ʼ,ikhaa tándxáʼóo edxu̱u̱ rí niʼthí.+
34 Na̱nguá nini̱ gámbáa xuajin+xó má Jeobá niʼtáñajúúnʼ muni̱,+
35 dí phú nini̱ nindawami̱jna̱ gajmiún xa̱bu̱ bi̱ i̱ʼwáʼ xuajin+ga̱jma̱a̱ nigíʼdi̱i̱ nini̱ xó má naguʼwún nuni̱ ikhiin.+
36 Nigíʼdi̱i̱ ndiyamajkhún xándiu̱ún,+ga̱jma̱a̱ rígi̱ ninindxu̱u̱ mbá tsáʼkhá náa ikhiin.+
37 Nixnajxi̱i̱n xóo tsigijñaʼ jiámiu̱únga̱jma̱a̱ wa̱ʼxiúúnʼ náa inún xa̱bu̱ wéñiiʼ.*+
38 Nángi eʼni eradíin bi̱ nda̱a̱ aʼkhúún,+eʼdiún jiámiu̱ún ga̱jma̱a̱ wa̱ʼxiúúnʼdí nuxnajxi̱ náa inún xándú bi̱ kúwá náa Canaán,+eʼdi rí nixidíí niʼni rí maʼni tsagoo ku̱ba̱ʼ.
39 Rí nini̱, niʼni rí maʼni tsagiin,ma̱ngaa rí mugujuamíjna̱ náa inún eʼwíinʼ dioses.+
40 Ikha jngóo Jeobá nikásngañu̱u̱ʼ kaʼñún xa̱bu̱ xuajñuuga̱jma̱a̱ ikhaa niwiyu̱u̱ʼ eni̱.
41 Nángi eʼni nixnájxi̱i̱n náa ñawúúnʼ xa̱bu̱ bi̱ kúwá náa i̱ʼwáʼ xuajin,+mu xúʼko̱ bi̱ nawiñu̱u̱nʼ kuñún mutañajúúnʼ.+
42 Xa̱bu̱ sia̱nʼ ndrígiu̱ún nini̱ ngíníinga̱jma̱a̱ ikhiin kúwá náa ñawúúnʼ xa̱bu̱ sia̱nʼ.
43 Mbaʼa nuthu ikhaa niʼni káwíin,+mú ikhiin nixujximíjna̱ ga̱jma̱a̱ túnimbu̱u̱n+ga̱jma̱a̱ numuu rí nikiéʼkhúún nigájnuu gamajkhún.+
44 Mú ikhaa ndiʼyoo gamiéjunʼ ndrígu̱ún,+ga̱jma̱a̱ niʼdxawuun rí nundxa̱ʼwa̱ rí mixtambáñún.+
45 Ga̱jma̱a̱ numún ikhiin nirmáʼáan a̱jkiu̱u̱n rí nimbánuu gajmíi̱n,ga̱jma̱a̱ numuu dí ra̱ʼkhá tháán mba̱a̱ ngajua rí tsétumuu rí gíʼdoo, rúʼko̱ nixkajxi̱i̱ magáwíinʼ a̱jkiu̱u̱n kaʼñún.+
46 Niʼni rí xúgíinʼ xa̱bu̱ bi̱ nigún kudiinmagáwíinʼ a̱jkiu̱ún kuñún.+
47 Atani̱ káwáanʼxu̱ Jeobá Dios ndrígúxu̱+atagímbáanʼxu̱ náa xúgíʼ xuajin mu makuwáanʼxu̱ mbóó,+mu ma̱ndoo muxna̱a̱ núma̱aʼ mbiʼyaaʼ rí kaʼwuga̱jma̱a̱ muxna̱a̱ʼxu gamajkhu ga̱jma̱a̱ gagi.+
48 Gaguma mba̱a̱ Jeobá, Dios ndrígóo Israel,asndu kámuu.+
Atatsíñááʼ dí xúgíinʼ xa̱bu̱ xuajin muthi: “¡Xúʼko̱ gáʼni!”.*
¡Gu̱ni̱ mba̱a̱la Jeobá!*
Mbaʼa nota
^ O “¡Aleluya!”. Náa ajngáa hebreo naʼthí, “Ja”. Ja ni̱ndxu̱u̱ xóo nagumaráʼmáʼ ga̱jma̱a̱ nguáthá ajngáa mbiʼyuu Jeobá.
^ Náa ajngáa hebreo naʼthí, “rí kaʼyaaʼ”.
^ O “nagui̱i̱”.
^ O “mar Rojo”.
^ O “desierto”.
^ Xóo muʼthá, tsigijñaʼ rí nuxnajxi̱ náa inún xa̱bu̱ bi̱ nikháñún o dioses bi̱ na̱nguá eya.
^ Rí nandoo gáʼthúu̱n ‹nigiʼdu̱u̱n›.
^ Xóo muʼthá, Dios.
^ O “Amén”.
^ Náa ajngáa hebreo naʼthí, “Ja”. Ja ni̱ndxu̱u̱ xóo nagumaráʼmáʼ ga̱jma̱a̱ nguáthá ajngáa mbiʼyuu Jeobá.
