Salmos 46:1-11
Rí na̱jkha̱ inuu bi̱ kayá edxu̱u̱ náa ajmúú. Salmo ndrígu̱ún e̱ji̱i̱n Coré.+ Xó má nawáán alamot.* Ajmúú.
46 Dios nindxu̱u̱ náa ma̱ndoo mumbayumíjná ga̱jma̱a̱ naxnúlú tsiaki̱i̱,+nambáyulú má xúʼko̱ náa mbiʼi dí narígá gamiéjunʼ.+
2 Ikha jngóo xámíñulú maski ajndu ku̱ba̱ʼ maʼga̱ raxtiʼkhuu,maski má kúbá mangajxi̱i̱ náa itháán mi̱jnu̱ʼ lamáa,*+
3 maski ajndu iyaʼ lamáa nandxa̱ʼwá ga̱jma̱a̱ naʼni xngoʼóo,+maski ajndu rí naʼbajxu̱u̱ naʼni rí maʼba̱a̱n kúbá. (Sélah).
4 Rígá mbá mañu ga̱jma̱a̱ rí nawíʼtóo ñawúunʼ naʼni maʼdxuu xuajñuu Dios,+náa rí mikaʼwu ga̱jma̱a̱ guʼwá xtíin ndrígóo bi̱ phú Mba̱a̱.
5 Dios xtáa náa xuajin+ xándoo maguma gámbáa.
Dios ma̱ʼkha̱ gámbáyúu xuajin xóo ejkha̱ rajtsiriga̱.+
6 Xa̱bu̱ xuajin nikiʼníin wéñuuʼ, xa̱bu̱ ñajunʼ niguma gámbíin,ikhaa nikujxi̱ aʼwóo ga̱jma̱a̱ ku̱ba̱ʼ niguma gámbáa.+
7 Jeobá bi̱ naʼtáñajúúnʼ ángeles xtáa ga̱jma̱á ni̱ndxu̱lú,+Dios ndrígóo Jacob nindxu̱u̱ náa ma̱ndoo mumbayumíjná. (Sélah).
8 Gaguwaʼ ga̱jma̱a̱ ganindxa̱la testigos náa ñajunʼ rí naʼni Jeobá,náa mbá xúgíʼ dí mitsaanʼ* rí niʼni náa ku̱ba̱ʼ.
9 Ikhaa naʼni gámbáa guerra náa xúgíʼ ku̱ba̱ʼ.+
Naxpígaʼ xkamídá ga̱jma̱a̱ naʼni gámbóo kudú*ga̱jma̱a̱ natsikháa carro ndrígu̱ún soldado.*
10 “Guniʼñáánʼ ruxmijná ga̱jma̱á nindxu̱ʼ, gu̱ya̱a̱ rí ikhúún nindxu̱ʼ Dios.
Maguma mbu̱u̱n náa majñu̱únʼ xa̱bu̱ xuajin,+mbuyamajkhuʼ náa tsu̱du̱u̱ ku̱ba̱ʼ”.+
11 Jeobá bi̱ naʼtáñajúúnʼ ángeles xtáa ga̱jma̱a̱ nindxu̱lú,+Dios ndrígóo Jacob nindxu̱u̱ náa ikháanʼ ma̱ndoo mumbayumíjná.+ (Sélah).
