Salmos 145:1-21
Ajmúú ndrígóo David mu maʼni mba̱a̱ Dios.
א [álef]
145 Ma̱ni̱ mba̱a̱n Dios ndrígóʼ, Rey ndrígóʼ,+ma̱ni̱ mba̱a̱ mbiʼyaaʼ asndu kámuu.+
ב [bet]
2 Kañiiʼ mbiʼi gáxna̱a̱ʼ gamajkhu,+ma̱ni̱ mba̱a̱ mbiʼyaaʼ asndu kámuu.+
ג [guímel]
3 Jeobá nindxu̱u̱ mba̱a̱ ga̱jma̱a̱ kaʼyoo dí magruigú mba̱a̱ gamajkhu,+ra̱ʼkhá tháán mba̱a̱ nindxu̱u̱ rí nimbáa tséʼngo̱o̱ gákroʼo̱o̱.+
ד [dálet]
4 Xúgíinʼ bi̱ gáguwáʼ rakúwá nda̱wa̱á, muni̱ mba̱a̱n ga̱jma̱a̱ numuu rí nitani̱,muthi ga̱jma̱a̱ numuu rí ikháán nitani̱ ga̱jma̱a̱ tsiaki̱i̱ ndrígáaʼ.+
ה [he]
5 Ikhiin muthi rí mitsaanʼ nindxu̱u̱ tsiaki̱i̱ ndrígáaʼ+ikhúún mandxaʼwáminaʼ ga̱jma̱a̱ numuu dí mitsaanʼ* nitani̱.
ו [waw]
6 Ikhiin muthi xúgíʼ dí nitani̱ nindxu̱u̱ mitsaanʼ,ga̱jma̱a̱ ikhúún ma̱ta̱ rí xóo mba̱a̱ nindxu̱u̱ tsiaki̱i̱ ndrígáaʼ.
ז [zayin]
7 Índo̱ garmáʼáan a̱jkiu̱ún rí májánʼ a̱jkia̱a̱nʼ ikhiin mu̱ni̱ ajmúú mu muxnaaʼ gamajkhu,+mundxa̱ʼwa̱ ga̱jma̱a̱ gagi numuu rí natani̱ xó má kaʼyoo.+
ח [jet]
8 Jeobá naʼngo̱o̱ a̱jkiu̱u̱n, nagáwíinʼ a̱jkiu̱u̱n,+tsékiʼnáa nacha̱ ga̱jma̱a̱ ra̱ʼkhá tháán mba̱a̱ ngajua rí tsétumuu* rí ikhaa gíʼdoo.+
ט [tet]
9 Jeobá naʼniún rí májánʼ xúgíinʼ bi̱ nduya,+náa xúgíʼ rí niʼni nakujmaa rí májánʼ a̱jkiu̱u̱n.*
י [yod]
10 Jeobá xúgíʼ rí nitani̱ maxnáaʼ gamajkhu+ga̱jma̱a̱ muni̱ mba̱a̱n bi̱ guájun jmbu náa ikháán.+
כ [kaf]
11 Ikhiin muthi rí xóo mitsaanʼ nindxu̱u̱ dí naratáñájunʼ+ga̱jma̱a̱ muthi xóo nindxu̱u̱ tsiaki̱i̱ ndrígáaʼ+
ל [lámed]
12 muxnúún mbuyáá xa̱bu̱ rí ikháán nitani̱ ga̱jma̱a̱ tsiaki̱i̱ ndrígáaʼ+ma̱ngaa dí ra̱ʼkhá tháán mitsaanʼ rí xóo naratáñajunʼ.+
מ [mem]
13 Ikháán maratañájunʼ asndu kámuuga̱jma̱a̱ maratañájúúnʼ xúgíinʼ bi̱ gáguwáʼ rakúwá nda̱wa̱á.+
ס [sámekh]
14 Jeobá nagutuwiin bi̱ na̱jkha̱ raxpátriga̱a̱+ga̱jma̱a̱ nakujxíín xúgíinʼ bi̱ ni̱ʼkha̱ ndi̱jtsu̱ún.+
ע [ayin]
15 Xúgíinʼ nduyaaʼ, kua̱ʼthi̱i̱n rí matambáñún,ikháán naraxnún ganitsu mu̱phu̱ náa mbiʼi rí kaʼyoo.+
פ [pe]
16 Natarmbáʼtháá ñawáanʼga̱jma̱a̱ naraxnún rí nda̱ñúunʼ xúgíinʼ bi̱ nduya.+
צ [sadé]
17 Kambo̱o̱ Jeobá nindxu̱u̱ jmbu+ga̱jma̱a̱ xúgíʼ rí naʼni nindxu̱u̱ májánʼ.+
ק [qof]
18 Jeobá xtáa mijngii náa xúgíinʼ bi̱ nutakáñíí,+náa xúgíinʼ bi̱ nutháán ga̱jma̱a̱ xúgíʼ a̱jkiu̱ún.+
ר [resh]
19 Naxnún rí nda̱ñúunʼ xúgíinʼ bi̱ namíñúún kuyáá,+naʼdxawún índo̱ nundxa̱ʼwa̱ rí mixtambáñún ga̱jma̱a̱ naʼni káwíin.+
ש [shin]
20 Jeobá nañewu̱u̱n xúgíinʼ bi̱ nandún kuyáá,+mú maʼni gámbíin xúgíinʼ xa̱bu̱ ra̱míjíinʼ.+
ת [taw]
21 Ikhúún ma̱ni̱ ajmúú mu maxnu̱u̱ gamajkhu Jeobá.+Xúgíinʼ bi̱ nduya* gu̱ni̱ mba̱a̱ mbiʼyuu rí mikaʼwu asndu kámuu.+
