Salmos 18:1-50
Rí na̱jkha̱ inuu bi̱ kayá edxu̱u̱ náa ajmúú. Salmo ndrígóo David, xa̱bi̱i̱ Jeobá, bi̱ niʼthúu̱n Jeobá ajngáa rí na̱ʼkha̱ náa ajmúú rígi̱, mbiʼi dí Jeobá niʼni kríya̱a̱ʼ náa ñawúúnʼ xúgíinʼ xa̱bu̱ sia̱nʼ ndrígióo ga̱jma̱a̱ náa Saúl. Niʼthí:+
18 Jeobá, ikháán nindxa̱a̱ʼ bi̱ naraxnúʼ tsiaki̱i̱,+ ikhúún nandoʼ ka̱ya̱a̱ʼ.
2 Jeobá nindxu̱u̱ itsí mba̱a̱ ndrígóʼ, xóo mbá xuajin dí kúgumaʼá,* bi̱ naʼni kríñu̱u̱nʼ.+
Dios ndrígóʼ nindxu̱u̱ itsí mba̱a̱,+ náa ma̱ndoo mambáyuminaʼ,escudo ndrígóʼ, bi̱ gíʼdoo tsiaki̱i̱ maʼni kríñu̱u̱nʼ,* náa nda̱a̱ gamíi mambáyuminaʼ.+
3 Ikhúún nandxa̱ʼo̱o̱ Jeobá, bi̱ kaʼyoo magruigú gamajkhu,ikhaa maʼni kríñu̱u̱nʼ náa xa̱bu̱ sia̱nʼ.+
4 Nixtambrúʼúún ga̱jma̱a̱ ñuñuu iñá wajinʼ,+dí nuni̱ xa̱bu̱ bi̱ raguáʼdáá numún naʼnimíñúʼ,+ bi̱ nindxu̱ún xóo yambo̱o̱.
5 Ñuñuu Iñá wajinʼ* naxtambrúʼún,ga̱jma̱a̱ tsáʼkhá dí nakháñún naguájun náa inuʼ mu munimiñúʼ.+
6 Índo̱ nixtáá ngíná nindxa̱ʼo̱o̱ Jeobá,nindxa̱ʼo̱o̱ má xúʼko̱ Dios ndrígóʼ.
Ikhú asndu náa goʼwóo dí mitsúʼkháan niʼdxawuun aʼwóʼ,+dí nindxa̱ʼwa̱ská mu mambáyuʼ ni̱jkha̱nú náa cháʼwuun.+
7 Ikhú ku̱ba̱ʼ nigíʼdúu niʼba̱a̱n ga̱jma̱a̱ niʼbajngaa,+niʼxma náa tri̱ga̱ kúbá,niʼbajngañiin numuu dí ikhaa nikásngañu̱u̱ʼ.+
8 Náa rakhóo nagájnuu gúníga̱jma̱a̱ náa rawuunʼ nagájnuu aguʼ dí natsiká,+asndu gíʼdoo agiuuʼ chámbuʼ egájnuu náa ikhaa.
9 Ikhaa niʼni dí mekhu maginduti̱ga̱* índo̱ nigajtaa,+ga̱jma̱a̱ asndu skuniʼ du̱u̱n tri̱ga̱ náa rajkhúu.+
10 Ni̱ʼkha̱ náa inuu giñánʼ, grígu náa tsu̱du̱u̱ mbáa querubín.+
Nacha̱ nigajtaa, grígu náa tsu̱du̱u̱ xpíjpiúu mbáa ángel.+
11 Ikhú, dí mikína nirúgoo náa mbájndi xtáa,+xóo mbá guʼwá xtíin,ma̱ngaa du̱u̱n skuniʼ dí gíʼdoo iyaʼ.+
12 Dí naxpíbínʼ náa ikhaaniʼni rí eʼtsí ga̱jma̱a̱ chámbuʼ dí gíʼdoo agiuuʼ majngutígú náa du̱u̱n.
13 Ikhú Jeobá niʼni dí majmidá asndu mekhuíí,+bi̱ phú Mba̱a̱ niʼni dí mawán aʼwóo+ga̱jma̱a̱ eʼtsí ma̱ngaa náa chámbuʼ dí gíʼdoo agiuuʼ.
14 Nidaʼ flecha dí kagu̱ ga̱jma̱a̱ niʼni dí majuidáriʼiin,+nidaʼ agiuuʼ a̱jkhu̱u̱n* ndrígóo, rúʼko̱ niʼni dí mamiñún ga̱jma̱a̱ xúyáá dí muni̱.+
15 Jeobá asndu náa itháan mi̱jnu̱ʼ mañu nikujmaa,+náa gíʼ ku̱ba̱ʼ nimbaʼtatiga̱a̱ ga̱jma̱a̱ numuu rí nitandxaʼwájmaa,ma̱ngaa dí nitandiyíí rakháaʼ.+
16 Ikhaa nikrui̱ya̱ʼ ñawúunʼ asndu mitsídánʼ,niguajtuwún ga̱jma̱a̱ niríñu̱u̱nʼ náa iyaʼ dí mi̱jnu̱ʼ.+
17 Niʼni kríñu̱u̱nʼ náa xa̱bu̱ sia̱nʼ ndrígóʼ bi̱ itháan xkujiiʼ,+náa bi̱ nawiñu̱u̱nʼ kuyoʼ, bi̱ itháan xkujiinʼ ki xóo ikhúún.+
18 Ikhiin nini̱ ngínún mbiʼi dí xtáá ramínúuʼ,+mú Jeobá nimbáyúʼ.
19 Ni̱jkha̱a̱ kañún náa gáʼchú,niʼni kríñu̱u̱nʼ, numuu dí nadxuu kaʼyoʼ.+
20 Jeobá naʼni numa̱a̱ʼ xó má májánʼ e̱ni̱,+naʼni numa̱a̱ʼ, numuu dí kaʼwu ñawúnʼ.+
21 Numuu dí na̱jkhá má xúʼko̱ náa kambo̱o̱ Jeobága̱jma̱a̱ na̱nguá ni̱ni̱ mbá dí ra̱májánʼ dí maniʼñúuʼ Dios ndrígóʼ.
22 Magiwa̱nʼ má xúʼko̱ náa a̱jkiu̱nʼ xtángoo ndrígóo,ga̱jma̱a̱ xáni̱ gaʼduunʼ kiʼtáñajunʼ ndrígóo.
23 Mani̱ndxu̱ʼ má xúʼko̱ xa̱bu̱ májáanʼ náa ikhaa,+mañewumínáʼ mu xáni̱ nimbá dí ra̱májánʼ.+
24 Jeobá gáʼni numa̱a̱ʼ xó má dí májánʼ e̱ni̱,+xó má dí kaʼwu ñawúnʼ náa inuu ikhaa.+
25 Bi̱ tséniñaaʼ, tsétatsíñáánʼ má mangáán,+xa̱bu̱ bi̱ naʼni dí májánʼ, natani̱i̱ dí májánʼ,+
26 ikháán natani̱ tsajkurámaaʼ bi̱ nindxu̱u̱ kaʼwii,+mú bi̱ nduwaaʼ, natani̱ nduwaaʼ.+
27 Numuu dí natani̱ káwíin xa̱bu̱ guabiinʼ,+mú natani̱ majti̱i̱nʼ bi̱ nuni̱ mbaʼumíjna̱.+
28 Numuu dí ikháán Jeobá, nindxa̱a̱ʼ bi̱ naskámuu lámpara ndrígóʼ,Dios ndrígóʼ naʼni dí mambiʼi náa mikína.+
29 Á mu dí natambáyúʼ maʼngo̱ʼ ma̱ni̱ gajmíʼ kuʼwáʼ,+ga̱jma̱a̱ tsiaki̱i̱ ndrígóo Dios, maʼngo̱ʼ matsimuʼ náa xtájtsí.+
30 Xúgíʼ dí naʼni Dios bi̱ gajkhun nindxu̱u̱ májánʼ,+ajngóo Jeobá nindxu̱u̱ kaʼwu.+
Ikhaa nindxu̱u̱ xóo mbá escudo náa mbá xúgíinʼ bi̱ numbayúmíjná náa ikhaa.+
31 Tsáá i̱mba̱a̱ Dios xóo Jeobá rá.+
Tsáá i̱mba̱a̱ xóo Dios ndrígúlú, bi̱ nindxu̱u̱ xóo mbá itsí mba̱a̱ rá.+
32 Dios bi̱ gajkhun naxnúʼ tsiaki̱i̱,+ikhaa maʼni jmbi̱i̱ kambo̱ʼ.+
33 Ikhaa naʼni dí rajkúʼ mani̱ndxu̱u̱ xóo rajkhúu aña̱ʼ,naʼni dí magújun gújkhúʼ náa mitsídánʼ.+
34 Ikhaa naʼniratún mu maxmína̱ʼ,ñawúnʼ maʼngo̱o̱ markumi̱i̱ xkamídá dí cobre.
35 Ikháán naraxnúʼ escudo ndrígáaʼ mu maʼni kríñu̱u̱nʼ,+natartuwúún ga̱jma̱a̱ ñawún májáanʼ,dí natani̱ guabaminaʼ naʼni dí magúʼdoo numuʼ.+
36 Natani̱ dí maʼni ma̱ja̱nʼ kamba̱a̱ náa najngríga̱,rajkúʼ xáxkanundiuuʼ.+
37 Maʼgá raxkhúún xa̱bu̱ sia̱nʼ ndrígóʼ ga̱jma̱a̱ maxkamari̱gi̱i̱n,xátangu̱ún asndu índo̱ gámbóʼ ragúdíin.
38 Majngaprígi̱i̱n mu ni xáguájxu̱u̱n,+majnguti̱gi̱i̱n náa rajkúʼ.
39 Ikháán maraxnu̱ʼ tsiaki̱i̱ mu maxmína̱ʼ,matani̱ dí xa̱bu̱ sia̱nʼ masmbri̱gi̱i̱n náa inuʼ.+
40 Matani̱ dí xa̱bu̱ sia̱nʼ mangujuíin ragáñúún mu maʼgá ragúdíin,ikhúún ma̱ni̱ gámbíin* bi̱ nawiñu̱u̱nʼ kuyoʼ.+
41 Ikhiin mundxa̱ʼwa̱ská dí mumbañún, mú ndawa̱a̱ nimbáa bi̱ maʼni káwíin,asndu nutháán Jeobá, mú ikhaa tsériʼñún.
42 Makumíguiin asndu maʼni nandaʼ xóo yujndaʼ rí na̱jkha̱ kagu̱u̱ giñánʼ,madi̱i̱nʼ rexa̱a̱ xóo ku̱ba̱ʼ xngaʼchaʼ náa kamba̱a̱.
43 Ikháán matani̱ kríñu̱u̱nʼ náa dí nuta numuʼ xa̱bu̱ xuajin.+
Mataʼgiúúnʼ mu mbaya̱ edxu̱u̱ náa mbaʼa xuajin.+
Mbá xuajin dí tséniʼnúuʼ maʼni ñajunʼ.+
44 I̱ndó mudxawíín ga̱jma̱a̱ numuʼ munimbu̱ún kuyoʼ,maguwáʼ ruxmajtamijná xa̱bu̱ bi̱ naguwaáʼ náa inuʼ.+
45 Xa̱bu̱ bi̱ naguwaáʼ mamiñún,magajnún náa xuajñún dí kúgumaʼá, asndu naguíʼiin gáguwáʼ.
46 ¡Jeobá ndaʼya! ¡Gagruigú gamajkhu Itsí mba̱a̱ ndrígóʼ!+
¡Gaguma mba̱a̱ Dios ndrígóʼ, náa dí na̱ni̱ kríyamínáʼ!+
47 Dios bi̱ gajkhun naʼni numi̱ín xa̱bu̱ sia̱nʼ ndrígóʼ,+nagrui̱ga̱ mbaʼa xuajin mu matañájuunʼ.
48 Natani̱ kríñu̱u̱nʼ náa xa̱bu̱ sia̱nʼ ndrígóʼ bi̱ nakásngañu̱u̱ʼ.Ikháán nataxújxu̱u̱n mitsídánʼ náa bi̱ nuni̱ ngínún,+ikháán natani̱ kríñu̱u̱nʼ náa xa̱bu̱ bi̱ najmangu̱u̱ʼ.
49 Ikha jngóo, Jeobá maxna̱a̱ʼ gamajkhu náa majñu̱u̱ʼ mbaʼa xuajin,+ma̱ni̱ ajmúú ga̱jma̱a̱ numuu mbiʼyaaʼ.+
50 Ikhaa naʼni dí mitsaanʼ* mu maʼni kríya̱a̱ʼ rey ndrígóo,+nasngájmuu dí nandoo kaʼyoo* bi̱ niraʼwíi,+náa David ma̱ngaa bi̱ naguwáʼ náa ikhaa asndu kámuu.+
