Salmos 75:1-10
-
Dios na̱nda̱ʼa̱a̱ cuenta xó má kaʼyoo
-
Xa̱bu̱ ra̱májáanʼ maga̱a̱n dí kajni̱ʼ náa copa ndrígóo Jeobá (8)
-
Rí na̱jkha̱ inuu bi̱ kayá edxu̱u̱ náa ajmúú. Xó má ewán ajmúú “Xátani̱ gámbáa”. Salmo ndrígóo Asaf.+ Ajmúú.
75 Nuxna̱a̱ʼxu̱ núma̱aʼ Dios, núma̱aʼ wéñuuʼ,ikháán xtaa* ga̱jma̱á nindxu̱xu̱,+xa̱bu̱ nuthi xúgíʼ rí mitsaanʼ* nitani̱.
2 Ikháán naratá: “Índo̱ naʼgíʼ mbá mbiʼi manda̱ʼa̱a̱ cuenta,nanda̱ʼa̱a̱ xó má kaʼyoo.
3 Índo̱ ku̱ba̱ʼ ga̱jma̱a̱ xúgíinʼ xa̱bu̱ niguíʼiin,*ikhúún ni̱ni̱ dí ku̱ba̱ʼ magi̱ʼi̱ jxa̱ʼ”. (Sélah).
4 Ni̱thu̱u̱n xa̱bu̱ bi̱ nuni̱ mbaʼumíjna̱: “Xúni̱ mbaʼumíjna̱la”.
Xa̱bu̱ xkawi̱i̱nʼ ni̱thu̱u̱n: “Xúni̱ mbaʼumíjna̱ rí kuaʼdáá wéñuuʼ tsiaki̱i̱.*
5 Xúni̱ mbaʼumíjna̱ rí kuaʼdáá wéñuuʼ tsiaki̱i̱*ni má xúni̱ mbaʼumíjna̱ ga̱jma̱a̱ rí nu̱tala.
6 Numuu rí nuni̱ mbaʼumíjna̱ xa̱bu̱ na̱nguá e̱ʼkha̱náa nagájnuu a̱jkha̱ʼ* ní ma náa narámaaʼ a̱jkha̱ʼ* ní má xígií náa sur.
7 Numuu rí Dios nindxu̱u̱ bi̱ naʼnimbánuu xkujndu.+
Ikhaa nakujxi̱i̱ mbáa ga̱jma̱a̱ i̱mba̱a̱ nakruíguíi.+
8 Jeobá kayá mbá copa,+asndu naʼni xngoʼóo vino ga̱jma̱a̱ kanda̱wo̱o̱ʼ májánʼ.
Gajkhun rí ikhaa maxídirígú,ga̱jma̱a̱ xúgíinʼ xa̱bu̱ xkawi̱i̱nʼ bi̱ kúwá náa ku̱ba̱ʼ muwa̱a̱n asndu iwáá rí ka̱jnu̱”.+
9 Mú ikhúún, ma̱ta̱ má xúʼko̱ ga̱jma̱a̱ numuu rígi̱,ma̱ni̱ ajmúú mu maxnu̱u̱ gamajkhu* Dios ndrígóo Jacob.
10 Numuu rí ikhaa naʼthí: “Ma̱ni̱ gámbáa xúgíʼ tsiaki̱i̱* ndrígóo xa̱bu̱ xkawi̱i̱ʼ,mú tsiaki̱i̱* ndrígóo xa̱bu̱ májáanʼ maʼga raʼni itháán mba̱a̱”.
Mbaʼa nota
^ Náa ajngáa hebreo naʼthí, “mbiʼyaaʼ rígá”.
^ O “nagui̱i̱”.
^ Náa ajngáa hebreo naʼthí, “nijuiyari̱gi̱i̱n”.
^ Náa ajngáa hebreo naʼthí, “chi̱ji̱ʼ”.
^ O “este”.
^ O “oeste”.
^ O “madu̱u̱ ajmúú mu matadxuun”.
^ Náa ajngáa hebreo naʼthí, “Marujtu xúgíʼ chi̱ji̱ʼ”.
^ Náa ajngáa hebreo naʼthí, “chi̱ji̱ʼ”.
