Salmos 144:1-15
Salmo ndrígóo David.
144 Gaguma mba̱a̱ Jeobá, Itsí mba̱a̱ ndrígóʼ,+bi̱ naʼsngóʼ xóo maxmínaʼ,ga̱jma̱a̱ naʼni rathúún maʼgá guerra.+
2 Ikhaa nindxu̱u̱ bi̱ nandoo kaʼyoʼ,* náa na̱ni̱ kriya̱mínáʼ,*náa nambáyuminaʼ ga̱jma̱a̱ bi̱ naʼni kríñu̱u̱nʼ,ikhaa nindxu̱u̱ escudo ndrígóʼ ga̱jma̱a̱ náa na̱jkhá mu mambáyuminaʼ,+ikhaa naʼni rí xa̱bu̱ bi̱ kúwá náa i̱ʼwáʼ xuajin matañájúúnʼ.+
3 Jeobá, tsáá lá nindxu̱u̱ xa̱bu̱ mu maxmiéjuaanʼ xtayáá rá.Tsáá lá nindxu̱u̱ xa̱bu̱ numbaaʼ mu magiwa̱a̱nʼ má xúʼko̱ a̱jkia̱a̱nʼ xtayáá rá.+
4 Xa̱bu̱ nindxu̱u̱ xóo rujmbaaʼ,*+mbiʼi rí xtáa nindxu̱u̱ xóo ndájkua̱ rí nanújngo̱ó.+
5 Jeobá, atani̱ rí mekhu maginduti̱ga̱* ga̱jma̱a̱ arajtaa,+ataxkajma kúbá mu magajnúu gúní.+
6 Atani̱ rí maxpíbínʼ agiuuʼ a̱jkhu̱u̱n* ga̱jma̱a̱ ataxídiríʼiin xa̱bu̱ sia̱nʼ,+atada̱ʼ flecha ndrígáaʼ náa ikhiin ga̱jma̱a̱ atani̱ rí xúyáá dí gúni̱.+
7 Asndu mekhuíí atatsriya̱ʼ ñawáanʼ,atambáyúʼ ga̱jma̱a̱ atani̱ kríñu̱u̱nʼ náa xa̱bu̱ bi̱ naguwaáʼ,+bi̱ nindxu̱ún xóo iyaʼ rí naʼbajxu̱u̱,
8 numbaʼtáá rawúúnʼ mu muthi rí nduwaʼga̱jma̱a̱ nuxujxi̱ ñawúúnʼ mu muxna ajngún mú tsénimbáníí.
9 Dios ndrígóʼ, ma̱ni̱ mbá ajmúú nuxi̱ʼ matadxawíín.+
Ma̱ni̱ xó má ewán ajua̱nʼ rí gíʼdoo gu̱wa̱ʼ cuérdóo, ma̱ni̱ ajmúú mu maxna̱a̱ʼ gamajkhu,*
10 ma̱ni̱ ajmúú maʼdxuun bi̱ naʼni dí reyes maʼngu̱u̱n náa nuxmijná+bi̱ naʼni kríya̱a̱ʼ David bi̱ nindxu̱u̱ xa̱bi̱i̱ mu xa̱bu̱ xúxiyáa ga̱jma̱a̱ espada.+
11 Atambáyúʼ ga̱jma̱a̱ atani̱ kríñu̱u̱nʼ náa ñawúúnʼ xa̱bu̱ bi̱ naguwaáʼ,numbaʼtáá rawúúnʼ mu muthi rí minduwaʼga̱jma̱a̱ nuxujxi̱ ñawún mújúnʼ mu muxna ajngún mú tsénimbáníí.
12 Mu xúʼko̱ jiámiuxu̱ maganuu xóó ixi̱ rí nda̱ja̱a̱ nacha̱,waʼxiuxu mani̱ndxu̱ún xóo columnas rí naʼni mitsaanʼ* náa guʼwá ñajunʼ ndrígóo rey.
13 Náa nurajxi̱i̱xu̱ ganitsu majtíí xúgíʼ enii rí májánʼ,xujkiúxu̱ maʼni mbaʼin wéñuuʼ rí nimbáa xáʼngo̱o̱ gáguxnii.
14 Xediuxu̱ bi̱ ga̱khi̱i̱n nda̱a̱ rí gáguáʼníí ni má xágrajkhi̱ín e̱jñu̱ún,ni má náa xuáá ndrígúxu̱, xa̱bu̱ xúndxa̱ʼwa̱ ga̱jma̱a̱ numuu rí kúwá ngíná.
15 ¡Gagi kúwá xa̱bu̱ bi̱ naguma tsajkurámíinʼ xígi̱ kaʼnii!
¡Gagi kúwá xa̱bu̱ bi̱ Jeobá nindxu̱u̱ Dios ndrígu̱ún!+
