Salmos 81:1-16
Rí na̱jkha̱ inuu bi̱ kayá edxu̱u̱ náa ajmúú, ga̱jma̱a̱ numuu guitit. Salmo ndrígóo Asaf.+
81 Gundxaʼwa̱ ga̱jma̱a̱ gagi náa inuu Dios, bi̱ naxnúlú tsiaki̱i̱.+
Gu̱ni̱ ajmúú ga̱jma̱a̱ gagi náa Dios ndrígóo Jacob.
2 Gugíʼdi̱i̱ mu̱di̱i̱ ajmúú ga̱jma̱a̱ gu̱di̱i̱ pandereta,xúʼko̱ má arpa rí mitsaanʼ* ewán ga̱jma̱a̱ ajua̱nʼ rí gíʼdoo cuérdóo.
3 Gu̱di̱i̱ chi̱ji̱ʼ índo̱ gáʼni gu̱nʼ rudiiʼ,+xúʼko̱ má índo̱ gági̱ʼi̱ gu̱nʼ nijndii, mbiʼi rí nuʼni riya̱a̱ʼ ndxa̱a̱.+
4 Numuu rí nindxu̱u̱ mbá xtángoo rí nikhánáá Israel,mbá rí Dios niʼtáñajuunʼ Jacob maʼni.+
5 Ikhaa nixnúu kiʼtáñajunʼ rígi̱ José mu maʼnimbánuu+índo̱ niʼni rí mamínuuʼ ku̱ba̱ʼ ndrígóo Egipto.+
Nidxawuun rí mbáa niʼthí, mú táyóo tsáa:*
6 “Ikhúún nirígúu eʼda dí grígu náa xpajpoo,+ga̱jma̱a̱ canasta rí kayá.
7 Nitatsaʼwóʼ mbiʼi dí niraxtaa ngíná ga̱jma̱a̱ ikhúún ni̱ni̱ kríña̱a̱nʼ,+asndu náa awúu̱n du̱u̱n dí naxnúu ruʼwambiʼ niriʼñaaʼ.+
Náa iyaʼ Meribá* niʼgíʼ mba̱yo̱o̱ xóo phú nindxa̱a̱ʼ.+ (Sélah).
8 Xa̱bu̱ xuajñunʼ, gudxawíín rí gúʼdoo ma̱tala.
¡Ra̱ʼkhá tháán májánʼ gáʼni á mu Israel gáʼdxawunʼ!+
9 Xáguaʼdaala nimbáa dios bi̱ tséjmaʼniiʼni má xúsmbatígala náa inuu mbáa dios bi̱ ragájkhun.+
10 Ikhúún nindxu̱ʼ Jeobá, Dios ndrígáaʼ,bi̱ niríña̱a̱nʼ náa ku̱ba̱ʼ ndrígóo Egipto.+
maxna̱a̱ʼ ganitsu miʼtsu asndu magiʼmaanʼ.+
11 Mú xuajñunʼ táʼndúún gúdxawíín aʼwóʼ,Israel tándoo gáʼnimbo̱o̱ kaʼyoʼ.+
12 Ikha jngóo ikhúún niniʼñúúnʼ muni̱ xó má nagua̱ʼa̱ maʼni a̱jkiu̱ún rí gújkhúʼ,nini̱ xúgíʼ rí ikhiin nikumu̱ún rí májánʼ nindxu̱u̱.*+
13 ¡Ra̱ʼkhá tháán májánʼ á mu xa̱bu̱ xuajñunʼ gúdxawunʼ rí mathu̱u̱n!+¡Ra̱ʼkhá tháán májánʼ á mu Israel gájngrui̱go̱o̱ náa kambo̱ʼ!+
14 Ikhúún ma̱ni̱ gámbíin mbá nacha̱ xa̱bu̱ sia̱nʼ ndrígu̱ún,ñawúnʼ maʼni ngíníi xa̱bu̱ bi̱ tsíñún gúñún.+
15 Bi̱ nawiñu̱u̱nʼ kuyáá Jeobá muxmajtamijná náa inuu,dí mugíʼníí mbajyúuʼ asndu kámuu.
16 Mú ikhaa maxnáaʼ miʼtsu trigo rí itháán májánʼ+ga̱jma̱a̱ maxnáaʼ migi̱i̱n jyááʼ dí rígá náa itsí”.+
