Salmos 104:1-35
104 Ma̱ni̱ mba̱a̱* Jeobá.+
Jeobá Dios ndrígóʼ, ra̱ʼkhá tháán mba̱a̱n.+
Xtíñaaʼ rí xtagíʼ ra̱ʼkhá tháán mitsaanʼ ga̱jma̱a̱ naxpíbínʼ.+
2 Xtíñaaʼ rí xtagíʼ nindxu̱u̱ aguʼ,+nataxtriga mekhu xóo mbá xtíin rí naguma ga̱jma̱a̱ guʼwá xtíin.+
3 Ikhaa naʼni goʼwóo náa tsu̱du̱u̱ du̱u̱n,*+naʼni rí du̱u̱n mani̱ndxu̱u̱ cárriu̱u̱,+na̱jkha̱ náa inuu giñánʼ.+
4 Naʼni rí ángeles ndrígióo muguáʼdáá tsiaki̱i̱,*bi̱ nuni̱ ñajuunʼ naʼni rí mani̱ndxu̱ún mbá aguʼ rí naʼni gámbáa.+
5 Ikhaa nigíʼ jxa̱ʼ ku̱ba̱ʼ náa kaʼyoo magi̱ʼi̱,+nditháan xágijxingoo náa gíʼ.+
6 Niraxnáá iyaʼ mi̱jnu̱ʼ magíʼ xóo xtíñuu.+
Iyaʼ ninújngo̱ó náa kúbá.
7 Iyaʼ ni̱jkha̱a̱ skidiʼ índo̱ nitríyíí,+índo̱ niʼdxuun aʼwáaʼ rí gamíi, iyaʼ nigáyúu mbá nacha̱,
8 ni̱jkha̱a̱ náa ikháán nitani̱ marigá,ikhú nigíʼdu̱u̱ nikujmaa kúbá+ ga̱jma̱a̱ mata.*
9 Nitagíʼ mbá náa martumuu iyaʼ mu xánújngoo,+mu xúʼko̱ xátanga̱a̱ majnííʼ náa ku̱ba̱ʼ.
10 Iyaʼ dí nagájnuu náa iduu, ikhaa naʼni rí maʼga kúʼwúun náa mata.Ga̱jma̱a̱ nagajtaa náa majñu̱u̱ʼ kúbá,
11 ikhí naʼwa̱a̱n xúgíinʼ xujkhú xáná,ma̱ngaa búrru xáná naʼga̱a̱n ga̱jma̱a̱ nawi̱ji̱i̱ rakandawuuʼ.
12 Ixi̱ rí kuájun náa níjniúu iyaʼ, ikhí ñu̱ʼu̱ nuni̱ xújúúnʼga̱jma̱a̱ náa ñawúunʼ ixi̱ ñu̱ʼu̱ nuni̱ ajmúú.
13 Asndu mekhuíí náa xtáa ikhaa naxtíjyooʼ kúbá.+
Rí ikhaa niʼniwíi kajtíí náa tsu̱du̱u̱ ku̱ba̱ʼ.+
14 Mu ku̱ba̱ʼ maxná ganitsu,ikhaa naʼni rí makráʼáan iná mu̱phu̱ xujkhú,yaʼwu mu mu̱phu̱ xa̱bu̱:+
15 Vino mu maʼni rí maʼdxuu a̱jkiu̱u̱n xa̱bu̱,+aceite mu maʼni wabaʼ inuu,ga̱jma̱a̱ ganitsu rí naxnáa tsiaki̱i̱ xa̱bu̱ numbaaʼ.+
16 Ixi̱ rí ni̱ʼdu̱u̱ Jeobá kixíjyááʼ májánʼ,cedros rí ikhaa ni̱ʼdu̱u̱ náa Líbano,
17 ikhí nuni̱ xújúúnʼ ñu̱ʼu̱.
Náa ixi̱ enebro ikhí xtáa cigüeña.+
18 Náa kúbá mitsídánʼ nindxu̱u̱ náa kúwá tsu̱jtu xáná,+náa pátsí ikhí kúwá damán.*+
19 Ikhaa niʼnii gu̱nʼ mu masngájmulú náá tiempo kuwáanʼ,a̱jkha̱ʼ ndaʼyoo májánʼ nguáná gájnguáan.+
20 Ikháán natani̱ rí maʼni mbruʼun ga̱jma̱a̱ maʼni mikína,+índo̱ xúgíinʼ xujkhú xáná jngruigu̱u̱n.
21 León bi̱ gújkuíinʼ* nundxa̱ʼwa̱ índo̱ nduñíinʼ xujkhúʼ muphu̱u̱n,+nduyáʼ ganitsu rí Dios naxnún mu̱phu̱.+
22 Índo̱ nagájnuu a̱jkha̱ʼ,ikhiin nagúun gúya̱a̱ jxu̱ún náa kúwá.
23 Xa̱bu̱ nagájnuu gáñajunʼ,nañajunʼ gakhi̱i̱ asndu wakíʼ.
24 ¡Jeobá, mbaʼa wéñuuʼ rí nitaniwíi!+
Ra̱ʼkhá tháán nijmañaaʼ nitaniwíi xúgíʼ.+
Náa ku̱ba̱ʼ kajtíí rí nitaniwíi.
25 Lamáa* rí nitani̱ ra̱ʼkhá tháán mba̱a̱ ga̱jma̱a̱ mi̱jnu̱ʼ,ikhí kajtíin xujkhú bi̱ nduya bi̱ mbaʼwi̱i̱n ga̱jma̱a̱ bi̱ majkhiinʼ.+
26 Ikhí nagún barco,ikhí kua̱ʼa̱a̱n Leviatán*+ bi̱ nitani̱i̱ mu maʼtsíin ikhí.
27 Xúgíinʼ ikhiin nuguaʼthi̱i̱nmu maraxnu̱u̱n ganitsu mu̱phu̱ náa mbiʼi rí kaʼyoo.+
28 Ikhiin nugimbóo dí naraxnún.+
Xúgíinʼ ikhiin nadxún numuu rí ikháán naraxnún xúgíʼ dí májánʼ.*+
29 Índo̱ natatsíñúúnʼ ikhiin namíñúún.
Á mu natríya̱ʼ kaʼñún xi̱ʼ rí guáʼdáá, nakháñún ga̱jma̱a̱ naguájti̱ín yujndaʼ.+
30 Á mu ikháán naraxnún espíritu ndrígáaʼ nakúwi̱i̱n,+natani̱ rí makuwíin eʼwíinʼ náa tsu̱du̱u̱ ku̱ba̱ʼ.
31 Tsiaki̱i̱ ndrígóo Jeobá mbajyúuʼ asndu kámuu.
Jeobá maʼdxuu ga̱jma̱a̱ numuu rí niʼniwíi.+
32 Ikhaa nayejxi̱ri̱gú náa ku̱ba̱ʼ ga̱jma̱a̱ ku̱ba̱ʼ naʼba̱a̱n,índo̱ naxkajma kúbá, ikhú kúbá nagájnuu gúniúu.+
33 Náa xúgíʼ mbiʼi dí gáxtáá ma̱ni̱ ajmúú náa Jeobá,+nákha xóó xtáá ma̱ni̱ ajmúú mu maxnu̱u̱ gamajkhu* Dios ndrígóʼ.+
34 Ikhaa manigu̱u̱ʼ rí nandxa̱ʼwa̱mínáʼ.*
Nadxuʼ índo̱ nandxa̱ʼwa̱mínáʼ ga̱jma̱a̱ numuu Jeobá.
35 Bi̱ nuni̱ aʼkhá maguma gámbíin náa tsu̱du̱u̱ ku̱ba̱ʼní xákúwá xa̱bu̱ ra̱míjíinʼ.+
Ma̱ni̱ mba̱a̱ Jeobá. ¡Gu̱ni̱ mba̱a̱la Jeobá!*
Mbaʼa nota
^ Náa ajngáa hebreo naʼthí, “náa tsu̱du̱u̱ iyaʼ”.
^ Náa ajngáa hebreo naʼthí, “espíritu”.
^ O “bóo”.
^ Xujkhúʼ bugi̱ xtáa náa rígá wéñuuʼ itsí.
^ O “bi̱ guáʼdáá xtátsiu̱ún náa aphúún”.
^ O “Mar”.
^ Náa ajngáa hebreo naʼthí, “ikháán natarmbáʼtáá ñawáanʼ”.
^ O “madu̱u̱ ajmúú náa inuu”.
^ O mbáa “Tsímáá gáʼni̱i̱ a̱jkiu̱nʼ índo̱ nandxa̱ʼwa̱mínáʼ ga̱jma̱a̱ numuu”.
^ O “¡Aleluya!”. Náa ajngáa hebreo naʼthí, “Ja”. Ja ni̱ndxu̱u̱ xóo nagumaráʼmáʼ ga̱jma̱a̱ nguáthá ajngáa mbiʼyuu Jeobá.
