Salmos 139:1-24
Rí na̱jkha̱ inuu bi̱ kayá edxu̱u̱ náa ajmúú. Salmo ndrígóo David.
139 Jeobá, ikháán natayáá májánʼ xú káʼnii nindxu̱ʼ asndu náa awúu̱n a̱jkiu̱nʼ ga̱jma̱a̱ natatsiniúúnʼ májánʼ.+
2 Natayáá índo̱ naʼgúnʼ ga̱jma̱a̱ índo̱ natujxu̱ʼ.+
Asndu mitsínguánʼ etayáá rí endxaʼwamínáʼ.+
3 Natayoʼ índo̱ rígá náa na̱jkhá ga̱jma̱a̱ índo̱ na̱bo̱ʼ mba̱ya̱a̱ jxu̱ʼ,natatsinuuʼ májánʼ xúgíʼ kambo̱ʼ.+
4 Asndu nákha xóó tségri̱ya̱ʼ nimbá ajngáa ma̱ta̱,mú ikháán Jeobá, natayáá má rí eyoʼ ma̱ta̱.+
5 Xtaa má xúʼko̱ náa níjniúʼ mu matie̱wu̱nʼ,ga̱jma̱a̱ natartuwún jxa̱ʼ.
6 Ra̱ʼkhá tháán mba̱a̱ nindxu̱u̱ ku̱ma̱ ndrígáaʼ.
Rí ikhúún tséʼngo̱o̱ gákro̱ʼo̱ʼ.+
7 Náá mina̱a̱ʼ gándoo gáʼgá mu xáxkamuu espíritu santo* ndrígáaʼ rá.Náá gándoo gárkaʼwumina’ mú ikháán xátayo̱ʼ rá.+
8 Á mu natsimuʼ mekhuíí ikhí má xtaa,ga̱jma̱a̱ á mu na̱jkháaʼ* náa Iña wajinʼ* ikhí má xtaa.+
9 Á mu gúʼdoo xpíjpiúʼ ga̱jma̱a̱ na̱jkhá nacha̱ náa inuu giñánʼ xó má índo̱ na̱jkha̱ rajtsimaʼgá gáxtáá náa rawuunʼ lamáa* dí rígá itháán mitsínguánʼ,
10 maski ajndu ikhí gáʼgá ikháán maraxnu̱ʼ ikha,matartuwún ga̱jma̱a̱ ñawún májáanʼ.+
11 Á mu ikhúún gátha “¡Dí mikína markaʼwúún!”,
mú ikháán natayáá rí mbruʼun nindxu̱u̱ mbiʼi.
12 Dí mbruʼun na̱nguá mikína tayáá ikháán,xó má mbiʼii a̱jkha̱ʼ rí mbiʼi, xúʼko̱ tayáá ikháán rí mbruʼun,+rí mbiʼi ga̱jma̱a̱ mbruʼun ikháá má nindxu̱u̱ tayáá ikháán.+
13 Ikháán nindxa̱a̱ʼ bi̱ nitani̱ riñón ndrígóʼ,nitie̱wu̱nʼ* nákha kuʼwu̱u̱n náa awúu̱n ru̱dúʼ.*+
14 Naʼniuʼ tsiánguá xóo mitsaanʼ* nitaniu̱u̱n, rúʼko̱ naxkajxu̱u̱n ma̱ni̱ mba̱a̱n.+
Ikhúún nda̱yo̱o̱ májánʼ,dí nitaniwíi ra̱ʼkhá tháán mitsaanʼ nindxu̱u̱.+
15 Índo̱ ni̱jkha̱ rakiu̱u̱n náa awúu̱n ru̱dúʼ,nákha ni̱jkha̱ rawájxu̱u̱n náa nimbáa ndawa̱a̱ tsáa eʼyoo,ikháán niʼnga̱a̱ʼ nitayáá asndu itsuʼ.+
16 Ikháán niʼnga̱a̱ʼ nitayo̱ʼ nákha kuʼwu̱u̱n náa awúu̱n ru̱dúʼ.Índo̱ xuyuʼ xóó tsékujmaa,náa libro ndrígáaʼ kiʼniraʼmáʼ xóo gáwájxi̱,ma̱ngaa naʼthí mbiʼi dí gáwájxu̱u̱n.
17 Ikhúún nda̱yo̱o̱, ¡dí ra̱ʼkhá tháán mitsaanʼ rí etatsaʼwáminaʼ!+
Dios ndrígóʼ, ¡ra̱ʼkhá tháán mbaʼa nindxu̱u̱!+
18 Índo̱ naniminaʼ magúxnuu, nindxu̱u̱ itháán ki xóo jui̱ʼi̱.+
Índo̱ nagújxu̱u̱nʼ, kaʼníí xóó xtáá ga̱jma̱á nindxa̱a̱ʼ.*+
19 Dios ndrígóʼ, ¡májánʼ gáʼni á mu maradíin xa̱bu̱ xkawi̱i̱nʼ!+
Mu xúʼko̱ xa̱bu̱ xkawi̱i̱nʼ* xákúwá náa ikhúún,
20 bi̱ nandún muni̱ rí xkawiʼ nuthi dí raʼkhí ga̱jma̱a̱ numaaʼ.Ikhiin nindxu̱ún xa̱bu̱ sia̱nʼ ndrígáaʼ bi̱ najmún mbiʼyaaʼ náa rakáʼyoo majmúún.+
21 Jeobá, nawi̱yu̱ʼ ka̱ñu̱u̱n bi̱ nawiñu̱u̱nʼ kuyaaʼ+ga̱jma̱a̱ tsíyóʼ gáñu̱u̱n bi̱ nuxujximíjna̱ náa inaaʼ.+
22 I̱ndó sia̱nʼ gíwánʼ náa a̱jkiu̱nʼ eni̱,+ga̱jma̱a̱ niguáʼnú ninindxu̱ún xa̱bu̱ sia̱nʼ ndrígóʼ.
23 Dios ndrígóʼ atayáá xóo nindxu̱u̱ a̱jkiu̱nʼ ga̱jma̱a̱ atayáá xóo xa̱bu̱ nindxu̱ʼ.+
Atayáá asndu náa awúu̱n a̱jkiu̱nʼ ga̱jma̱a̱ atatsinuuʼ rí gíwánʼ raʼni maxmiéjunʼ.+
24 Atayáá á mu rígá mbá dí ra̱májánʼ rí na̱ni̱,+ga̱jma̱a̱ ayuʼ jchún+ má xúʼko̱ náa kamba̱a̱ dí marigá asndu kámuu.
