Salmos 32:1-11
Salmo ndrígóo David. Maskil.*
32 Gagi xtáa xa̱bu̱ bi̱ nuni̱ mba̱a̱ a̱jkiu̱ún kuyáá rí nikiéʼkúun, ma̱ngaa aʼkhá rí nikudaminaʼ.+
2 Gagi xtáa xa̱bu̱ bi̱ Jeobá ndaʼyoo rí nda̱a̱ aʼkhúun,+ga̱jma̱a̱ rí tséʼni nduwaʼ.
3 Índo̱ niguanúʼ wíyúʼ, itsu̱ʼ niguuʼ ga̱jma̱a̱ numuu rí ni̱xiéʼkhá má xúʼko̱ kañiiʼ mbiʼi.+
4 Mbiʼíí mbruʼun ki̱wu̱n ñawáanʼ kaʼmáʼ náa tsu̱du̱ʼ.+
Tsiaki̱i̱ ndrígóʼ niguámbá xó má iyaʼ rí nujndooʼ dí ruʼphu. (Sélah).
5 Ni̱tha̱nʼ má tsiaki̱i̱ aʼkhá rí nikuʼdáminaʼ,na̱nguá nirkaʼwu múʼúnʼ rí nikiéʼkhúnʼ.+
Ni̱tha̱: “Ma̱thu̱u̱n Jeobá rí nikiéʼkhúnʼ”.+
Ga̱jma̱a̱ ikháán nitani̱ mba̱a̱ a̱jkia̱a̱nʼ xtayáá rí nikiéʼkhúnʼ ga̱jma̱a̱ aʼkhá rí nikuʼdáminaʼ.+ (Sélah).
6 Ikha jngóo, asndu tsáá bi̱ wíji̱ jmbu maʼtákáñaaʼ+xúgi̱ rí ma̱ndoo xóó maxkamáán.+
Ni má xkujndu rí nindxu̱u̱ xóo yambo̱o̱ xáʼngo̱o̱ gáxkamaa.
7 Mani̱ndxa̱a̱ʼ náa markaʼwuminaʼ,matie̱wu̱nʼ náa awúu̱n gamiéjunʼ.+
Ikháán matatsijñún náa majñu̱únʼ xa̱bu̱ bi̱ kúwá gagi, numuu rí nitani̱ kríñunʼ.+ (Sélah).
8 “Ma̱ni̱ rí makrua̱ʼa̱a̱ʼ, ga̱jma̱a̱ masngajmáaʼ kamba̱a̱ dí gíʼmaa mi̱dxu̱ʼ.+
Mba̱ya̱a̱ʼ má xúʼko̱ ga̱jma̱a̱ mañewa̱a̱nʼ índo̱ gáxna̱a̱ʼ consejo.+
9 Xánindxala xóo wáyú o mula, bi̱ na̱nguá guáʼdáá ku̱ma̱,+ga̱jma̱a̱ numuu rí najmangu̱u̱nʼ ndayóoʼ maxtuʼún ga̱jma̱a̱ ñuñuu,i̱ndó xúʼko̱ ma̱ndoo maguwáʼ kanuu náa ikháán”.
10 Mbaʼa ga̱ʼkhu̱ e̱ʼkha̱ inuu xa̱bu̱ ra̱májáanʼ,mú bi̱ naku̱mu̱u̱ kaʼyoo Jeobá, ikhaa má gáñewu̱u̱n ga̱jma̱a̱ ngajua rí tsétumuu* rí gíʼdoo.+
11 Gaʼdxalá ga̱jma̱a̱ numuu Jeobá ga̱jma̱a̱ gakuwáanʼla gagi ikháanʼla bi̱ nuni̱ rí jmbu,gundxaʼwa̱ ga̱jma̱a̱ gagi xúgiáanʼ ikháanʼla, xa̱bu̱ bi̱ májáanʼ a̱jkiu̱ún.
