Inda koshikalimo

Inda koshikalimo

 ETUKULWA 74

Osho hatu lihongo mokuyakula vamwe nomokwiilikana

Osho hatu lihongo mokuyakula vamwe nomokwiilikana

LUKAS 10:38–11:13

  • JESUS TA TALELE PO MARTA NAMARIA

  • OSHA FIMANA OKWIILIKANA PANDJIKILILE

Betania omukunda u li koushilo wOmhunda yeemono nohapa endwa eekilometa nhatu okudja muJerusalem. (Johannes 11:18) Jesus okwa li a ya komukunda oo, keumbo looMarta naMaria. Marta naMaria nomumwaina Lasarus ova li ookaume kaJesus nova li ve mu tambula ko nohamu.

Osha li oufembanghenda kuvo okutalelwa po kuMessias. Marta okwa li a halelela okuyakula nawa Jesus, nokwa li te mu longekidile oikulya tai tokola elaka. Ofimbo Marta a li ta longekida oikulya, omumwaina, Maria, okwa li omutumba peemhadi daJesus ta pwilikine kuye. Diva Marta okwa li a lombwela Jesus a ti: “Omwene, ku wete nande kutya mumwameme okwa efela nge po ashike? Mu lombwela e uye a kwafele nge.” — Lukas 10:40.

Ponhele yokulombwela Maria, Jesus okwa pa Marta omayele aha kale unene e lipyakidila, a ti: “Marta, Marta, ou na oshisho nowe lipyakidila noinima ihapu. Fye inatu pumbwa oinima ihapu, nande oinini oya wana ashike. Maria okwe lihoololela oshinima sha denga mbada nokape na ou te shi mu kufa.” (Lukas 10:41, 42) Jesus okwa li a popya kutya ina pumbwa e lipyakidile nokulongekida oikulya ihapu. Oikulya i li paunafangwa oya wana ashike.

Marta okwa li e na elinyengotomheno liwa noku na ehalo lokuyakula. Molwaashi okwa li ta yandje elitulemo kokulongekida oikulya, okwa li a pitililwa po komayele a fimana oo Omona waKalunga a li ta popi. Jesus okwa li ta divilike kutya Maria okwa ninga etokolo lopandunge olo tali mu etele ouwa fiyo alushe, nosha fimana okudimbuluka oshilihongomwa osho.

Pomhito imwe vali, Jesus okwa li a honga oshilihongomwa sha fimana. Ovahongwa vaye ove mu pula va ti: “Omwene, tu honga nghee tu na okwiilikana ngaashi Johannes naye a honga ovahongwa vaye.” (Lukas 11:1) Oshinima osho opo ashike a hangwa e shi ninga oule wodula netata kEudifo laye lokOmhunda. (Mateus 6:9-13) Otashi dulika ovahongwa vaha li po nomolwaasho Jesus a ka endulula oitwa oyo ya fimana. Opo nee okwa li a yandja efaneko olo la li tali divilike nghee sha fimana okwiilikana pandjikilile.

Jesus okwa tya kuvo: “Nandi tye nee umwe womunye okwa ya kukaume kaye mokati koufiku ndele ta ti kuye: ‘Kaume, kwafele nge omingome nhatu, osheshi ondi na kaume kange e uya po a dja kokule, ndele kandi na eshi handi mu pe.’ Ndele oo e li meni leumbo okwa ti: ‘Ino piyaaneka nge. Pomuvelo opa idilwa nale; ame novana vange otwa nangala. Itandi dulu okupenduka ndi ku pe sha.’ Ohandi mu lombwele, nonande ita penduka ndele te mu pe sha omolwoukaume, ota penduka e mu pe osho a pumbwa molwaashi okwa kala ta indile ehe na olufuwo.” — Lukas 11:5-8.

Jesus ka li a hala kutya Jehova iha nyamukula omailikano, ngaashi kaume oo a popiwa mefaneko. Ponhele yaasho, okwa li ta ulike kutya ngeenge kaume ota dulu okukwafela kaume kaye oo e mu indila nonande okwa li a kofa, Tate yetu womeulu omunahole naye ota ka nyamukula omailikano ovapiya vaye ovadiinini. Jesus okwa weda ko a ti: “Ohandi mu lombwele, kaleni hamu indile, opo nee otamu pewa; kaleni hamu kongo, opo nee otamu mono; kaleni hamu konghola, opo nee otamu yeululwa. Osheshi keshe ou ta indile ota pewa, nakeshe ou ta kongo ota mono, naau ta konghola, ota yeululwa.” — Lukas 11:9, 10.

Opo nee Jesus okwa xulifa oshitwa shaye eshi a faafanifa Kalunga nooxe vopanhu, a ti: “Mbela omudali olyelye womunye ngeenge omona te mu  indile oshi, te ke mu pa eyoka ponhele yoshi? Ile ngeenge te mu indile ei, mbela ote ke mu pa ondje? Hano, ngeenge nye ovalunde, ndele omu shii okupa ovana veni oinima iwa, Xo yeni womeulu ita ka yandja tuu omhepo iyapuki kwaavo tave mu indile!” (Lukas 11:11-13) Osho otashi tu tu omukumo okushiiva kutya Kalunga okwa halelela okupwilikina omailikano etu noku a nyamukula.