Oho kala wa hafa okuuda onghundana iwa. Ashike ope na onghundana iwa unene kwoove nosho yo kovaholike voye.

Onghundana oyo iwa oi li mOmbiibeli, embo olo Omushiti weshito alishe, Jehova Kalunga, a shangifa oule womido da ya. Membo eli, ohatu ka yandja elitulemo komambo Ombiibeli ane oo e tu nine onghundana iwa. Okwa lukilwa ovanhu ovo va nwefwa mo kuKalunga ve a shange, ngaashi Mateus, Markus, Lukas naJohannes.

Vahapu ohave a ifana Omavangeli ane. Omavangeli oo ane ile tu tye onghundana iwa, okwa popya kutya Jesus oku li ondjila yaKalunga omo tamu ka xupifilwa ovanhu, nonokutya e li Ohamba yOuhamba waKalunga womeulu, ota ka etela ovo ve na eitavelo muye omanangekonoupuna taa kalelele. — Markus 10:17, 30; 13:13.

Otashi dulika we lipulile nale kutya omolwashike Kalunga a shangifa omavangeli ane e na sha nonghalamwenyo yaJesus nosho yo omahongo aye.

Ope na omauwa e na sha nomambo oo ane kombinga yaasho Jesus a popya naasho a ninga. Oku shi faneka, diladila nee ngeno ovalumenhu vane va fikama popepi nomuhongi a fimanenena. Omulumenhu oo e li ofika komesho yomuhongi okwa li omufendelifi. Oo e li ofika kolulyo laye, okwa li omuhakuli. Omulumenhu oo a li ta pwilikine a ama kombinga yokolumosho, okwa li omuyuli weeshi nokwa li kaume kopofingo komuhongi oo. Omulumenhu omutine, oo a li konima, okwa li ashike ta konenene noye a li munini kuvakwao. Ovalumenhu aveshe ovo vane ova li ovanashili, nakeshe umwe okwa li e na ohokwe ile ha yandje elitulemo koinima ya yoolokafana. Ngeenge keshe umwe womovalumenhu ovo okwa shange ehokololo li na sha naasho omuhongi a popya nosho yo oilonga yaye, omahokololo oo ane otaa ka kala e na oinima ya yoolokafana ile oiningwanima ya yoolokafana. Ngeenge otwa kaleke momadiladilo elalakano lovashangi eshi hatu konakona omambo oo ane, ohatu ka uda ko nawa osho omuhongi a popya naasho a ninga. Efaneko olo otali ulike nghee hatu dulu okumona ouwa mokukala tu na omambo ane a yoolokafana e na  sha nonghalamwenyo yOmuhongi Munenenene, Jesus.

Omulumenhu oo omufendelifi okwa li a hala okuhanga omitima dOvajuda, onghee okwa li a unganeka omahongo nosho yo oiningwanima monghedi oyo ta dulu oku va kwafela. Omuhakuli okwa shanga shi na sha nokuvelulwa kwaavo va li tava yahama ile oingudu, onghee ina shanga oinima imwe oyo ya shangwa komulumenhu omufendelifi, nokwa li e i shanga monghedi imwe i lili. Kaume kaJesus kopofingo okwa divilika omaliudo nosho yo omaukwatya omuhongi. Ehokololo lomulumenhu omunyasha ola li pauxupi nola yukilila koshitwa. Ndele nande ongaho, omahokololo ovalumenhu aveshe ovo oku li paushili. Osho otashi faneke nawanawa kutya okukala tu na omambo oo ane e na sha nonghalamwenyo yaJesus otashi ke tu kwafela tu kale tu na eudeko lomoule li na sha noilonga, nomahongo nosho yo omaukwatya aye.

Otashi dulika ovanhu va popye shi na sha ‘nEvangeli laMateus’ ile ‘Evangeli laJohannes.’ Inava puka okupopya ngaho molwaashi Evangeli keshe oli na ‘onghundana iwa i na sha naJesus Kristus.’ (Markus 1:1) Onghee paulelalela, otu na ashike evangeli limwe ile onghundana iwa i na sha naJesus oyo ya shangwa momambo ane.

Ovakonakoni vahapu vEendjovo daKalunga ova yelekanifa oiningwanima nosho yo omauyelele aeshe oo e li membo laMateus, Markus, Lukas naJohannes nova mona kutya otaa tu kumwe. Omushangi Omusiria, Tatian, naye okwa li a ninga sha faafana 170 O.P. lwaapo. Okwa dimina kutya omambo oo ane oku li paushili nokwa nwefwa mo, nokwa li a tula kumwe omahokololo onghalamwenyo yaJesus nosho yo oukalele waye membo olo hali ifanwa Diatessaron.

Embo Jesus oye ondjila, noshili nomwenyo ola ninga sha faafana, ashike oli li paushili nole lixwa po. Osho otashi shiiva molwaashi paife otu udite ko omawanifo omaxunganeko nosho yo omafaneko aJesus. Eudeko olo tu na paife ole tu kwafela tu yelife nawa oinima oyo Jesus a popya naayo a ninga, mwa kwatelwa elandulafano loiningwanima oyo ya ningwa. Oinima oyo ya monika kovalafululi voikulunima oye tu kwafela tu mone omauyelele amwe e na sha noinima yokondadalunde nosho yo osho ovashangi va li ve na momadiladilo. Ashike, kape na oo ta dulu lelalela okukala e na oushili kutya oinima oya ningwa naanaa melandulafano la tya ngahelipi. Ndele nande ongaho, embo Jesus oye ondjila, noshili nomwenyo ola popya oinima oyo i li paushili noi li pandjele.

Eshi to lesha nokuhafela embo eli, kendabala okukaleka momadiladilo etumwalaka la fimanenena olo le ku nuninwa nosho yo ovaholike voye. Dimbuluka kutya Jesus Kristus okwa li a lombwela omuyapostoli Tomas a ti: “Aame ondjila, noshili nomwenyo. Kape na ou te uya kuTate, ngeenge ita pitile mwaame.” — Johannes 14:6.

Embo Jesus oye ondjila, noshili nomwenyo otali ke ku kwafela u kale u na olupandu li na sha nanghee Jesus e li “ondjila.” Okupitila ashike muye to dulu okwiilikana kuJehova Kalunga. Shikwao vali, okupitila ashike muJesus hatu ka hanganifwa naKalunga. (Johannes 16:23; Ovaroma 5:8) Natango, okupitila ashike muJesus hatu dulu okukala nekwatafano naKalunga.

Jesus oye ‘oshili.’ Okwa li ha popi nokukala metwokumwe noshili. ‘Okwa wanifa po omaxunganeko mahapu.’ (2 Ovakorinto 1:20; Johannes 1:14) Omaxunganeko a tya ngaho otae tu kwafele tu mone onghandangala oyo a li ta dana mokuwanifa po elalakano laKalunga. — Ehololo 19:10.

Jesus Kristus oye yo ‘omwenyo.’ Okupitila mekuliloyambo, okwa yandja omwenyo waye wa wanenena nohonde yaye, naasho oshe shi ningifa tashi shiiva opo tu ka mone “omwenyo washili,” sha hala okutya, “omwenyo waalushe.” (1 Timoteus 6:12, 19; Ovaefeso 1:7; 1 Johannes 1:7) Ota ka kala yo “omwenyo” kovanhu omamiliyona ovo va fya notava ka nyumunwa ve na etimaumbwile loku ka kala mOparadisa fiyo alushe. — Johannes 5:28, 29

Atushe otwa pumbwa okukala tu na olupandu li na sha nonghandangala yaJesus mokuwanifa po elalakano laKalunga. Hafela okulihonga shihapu kombinga ya Jesus oo e li “ondjila, noshili nomwenyo.”