Inda koshikalimo

Inda koshikalimo

 ETUKULWA 78

Omupiya omudiinini nomunaendunge na kale e lilongekida

Omupiya omudiinini nomunaendunge na kale e lilongekida

LUKAS 12:35-59

  • OMUPIYA OMUDIININI NOMUNAENDUNGE NA KALE E LILONGEKIDA

  • JESUS OKWE UYA OKWEETA ETUKAUKO

Jesus okwa popya kutya ‘okangudu ashike kanini’ taka ka ya mOuhamba womeulu. (Lukas 12:32) Ashike kashipu okumona ondjabi oyo. Jesus okwa divilika nghee sha fimana komunhu oo a kale e na etaleko la yuka ngeenge ota ka kala oshitukulwa shOuhamba oo.

Opo nee Jesus okwa ladipika ovahongwa vaye va kale ve lilongekidila okwaaluka kwaye. Okwa ti: “Kaleni mwa djala nomwe lilongekida, neelamba deni nadi kale da tema, ngaashi ovanhu va teelela omwene wavo a aluke kehombolo, opo ngeenge te uya ndele ta konghola, otave mu yeulula diva. Ovapiya ovo tava hangika ve li oupafi komwene wavo otava kala va hafa.” — Lukas 12:35-37.

Ovahongwa ova li va uda ko efaneko laJesus. Ovapiya ovo a li a popya metetekelo ova li ve lilongekidila okwaaluka kwomwene wavo. Jesus okwa ti: “Ngeenge [omwene] okwe uya okudja pomuwoi woufiku fiyo omokati koufiku ile okudja mokati koufiku fiyo oponhatu yokeengula ndele ta hange ve lilongekida, otava kala va hafa.” — Lukas 12:38.

Osho osha li sha kwatela mo shihapu shihe fi ashike okukala ovapiya ovadiinini ile ovanailonga. Osho osha li sha yela eshi Jesus, Omona womunhu, a li a kwatelwa mo mefaneko olo. Okwa li a lombwela ovahongwa vaye a ti: “Nanye yo kaleni mwe lilongekida, osheshi Omona womunhu ote uya pefimbo olo inamu teelela.” (Lukas 12:40) Onghee osha yela kutya Jesus ota ka aluka. Okwa li a hala ovashikuli vaye, unene tuu ‘okangudu kanini,’ va kale ve lilongekida.

Petrus okwa li a hala okuuda ko nawa efaneko laJesus, onghee okwe mu pula ta ti: “Omwene, ofye atuke to lombwele efaneko eli ile oto li lombwele yo ovanhu aveshe?” Ponhele yokunyamukula Petrus odikilila, Jesus okwa popya vali efaneko limwe la faafana, a ti: “Olyelye naanaa omupiya omudiinini nomunaendunge, oo omwene waye e mu nangeka po a pashukile ovapiya vaye noku va pa eendja da wana pefimbo la wapala? Omupiya oo ta hangika komwene waye ta ningi ngaho, ota kala a hafa. Oshili ohandi mu lombwele, omwene waye ote ke mu nangeka po a pashukile oinima yaye aishe.” — Lukas 12:41-44.  

Mefaneko lotete, “omupiya” ota faneke Jesus, Omona womunhu. Paulelalela, “omupiya omudiinini nomunaendunge” okwa kwatela mo ovalumenhu ovo ve li oshitukulwa ‘shokangudu kanini’ ovo tava ka pewa Ouhamba. (Lukas 12:32) Jesus okwa li ta popi kutya vamwe vomokangudu oko otava ka kala tava “pashukile ovapiya vaye noku va pa eendja da wana pefimbo la wapala.” Otashi dulika Petrus novahongwa vamwe ovo Jesus a li ta hongo nokupalula pamhepo va li va fika pexulifodiladilo kutya otapa ka kala efimbo olo Omona womunhu ta ka aluka. Momukokomoko wefimbo olo, otapa ka kala elongekido lokupalula ovashikuli vaJesus pamhepo, kwaavo tava “pashukile ovapiya vaye.”

Jesus okwa li a divilika yo kutya omolwashike ovahongwa vaye va pumbwa okukala oupafi nokuyandja elitulemo koikala yavo. Otashi dulika va kale noikala yokuhenakonasha navamwe ile tashi dulika ve va pataneke, nomolwaasho a ti: “Ngeenge omupiya oo okwe lipopile momutima waye ta ti, ‘Omwene wange okwa kala ko,’ ndele ta hovele okudenga ovapiya vakwao, ta li nokunwa ndele ta kolwa, omwene waye ote uya mefiku olo ine mu teelela nopovili oyo ehe shii, note ke mu handukila nehandu linene ndele te mu tula kongudu yaavo vehe fi ovadiinini.” — Lukas 12:45, 46.

Jesus okwa ti okwe uya “okuxwameka omundilo  kombada yedu.” Okwa li a eta po oikundafanwa oyo ya etifa po omhata inene, oyo ya didilikifa mo omahongo oipupulu nosho yo eenghulunghedi. Osho osha etifa po etukauko pokati kovanhu ovo va li ve na okukala va hangana, ndele “xe ota ka pataneka omonamati, nomonamati ota ka pataneka xe, ina ota ka pataneka omonakadona, nomonakadona ota ka pataneka ina, inamweno ota ka pataneka oshitenya omukainhu, noshitenya omukainhu otashi ka pataneka inamweno.” — Lukas 12:49, 53.

Eendjovo odo oda li da nuninwa unene ovahongwa vaye. Opo nee Jesus okwa pungulukila kongudu yovanhu. Ovanhu vahapu ova li va anya okutambula ko oumbangi oo kutya Jesus oye Messias, ndele ta ti kuvo: “Ngeenge mwa mono omwaamba u li kouninginino, ohamu ti, ‘Otaku di oshikungulu shodula,’ naasho osho hashi ningwa. Ndele ngeenge omwa mono omhepo tai pepe okudja kolukadi ohamu ti, ‘Otaku ka kala kwa pupyala unene,’ naasho osho hashi ningwa. Ovanaihelele nye, omu shii okunongonona nghee onghalo yomhepo tai ka kala, ndele omolwashike muhe shii okunongonona eityo laasho tashi ningwa pefimbo eli?” (Lukas 12:54-56) Osha yela kutya kava li ve lilongekida.