Mefiku etiheyali lOshivilo shOmatwali, Jesus okwa li ta hongo ovanhu motembeli e li “monhele omo hamu kala oikefa yomayambidido.” (Johannes 8:20; Lukas 21:1) Osho osha li oshihale shovakainhu omo ovanhu va li hava twala omayambidido.

Pefimbo loshivilo osho, oufiku opa li hapa kala omaminikilo. Okwa li hamu kala oikwatelwalamba inhe, nakeshe shimwe osha li hashi kala olamba i na omahooli a wana. Ouyelele wado owa li hau kala wa twa nohau minikile oshitukulwa sha kula. Osho Jesus a li a popya otashi dulika sha li sha dimbulukifa ovapwilikini vaye shi na nolamba oyo, eshi a ti: “Aame ouyelele wounyuni. Keshe ou ta shikula nge ita ka enda nandenande momilaulu, ndele ota ka mona ouyelele oo tau yandje omwenyo.” — Johannes 8:12.

Ovafarisai kava li va itavela osho Jesus a popya, ndele tava ti: “Ove oto hepaulula kombinga yoye mwene, nehepaululo loye kali fi loshili.” Jesus okwa tya kuvo: “Nonande ohandi hepaulula kombinga yange mwene, ehepaululo lange oloshili, molwaashi ondi shii apa nda dja nondi shii apa handi i. Ndele nye kamu shii apa nda dja naapa handi i.” Okwa weda ko vali a ti: “MOmhango yeni omwa shangwa taku ti: ‘Ehepaululo lovanhu vavali olashili.’ Ame ohandi hepaulula kombinga yange mwene, na Tate ou a tuma nge ota hepaulula kombinga yange.” — Johannes 8:13-18.

Ovafarisai kava li tava tu kumwe naye, ndele tave mu pula tava ti: “Xo oku li peni?” Jesus okwe va nyamukula ta ti: “Kamu shii nge, na Tate kamu mu shii. Ngeno omwa li mu shii nge, ngeno naTate omu mu shii yo.” (Johannes 8:19) Nonande ova li va hala oku mu kwata po, kape na oo a dula oku shi ninga.

Jesus okwa li a endulula osho a popile nale, a ti: “Ohandi i, notamu ka konga nge; ndele otamu ka fila moulunde weni. Apa handi i itamu dulu okuuya po.” Opo nee Ovajuda ova ti: “Mbela ote ke lidipaa? Molwaashi ota ti, ‘Apa handi i itamu dulu okuuya po.’” Kava li ve udite ko eityo leendjovo  daye molwaashi kava li ve shii a pa a dja. Jesus okwa tya kuvo: “Nye ovokedu; ame onda dja pombada. Nye ovomounyuni ou; ame nghi fi womounyuni ou.” — Johannes 8:21-23.

Jesus okwa li ta popi kokukala kwaye meulu e li Messias omuudanekwa ile Kristus oo a li a teelelwa kovawiliki vomalongelokalunga. Ashike ova li va pula nondjungu, va ti: “Oove lyelye hano?” — Johannes 8:25.

Eshi va li tave mu pataneke, okwe va nyamukula a ti: “Otashi kwafa shike handi popi nanye ndele kamu udite ko?” Natango, okwa li a yandja efimano kuKalunga nokuyelifa kutya omolwashike Ovajuda va pumbwa okupwilikina kOmona, a ti: “Ou a tuma nge oha popi oshili, nohandi lombwele ounyuni oinima oyo nda uda kuye.” — Johannes 8:25, 26.

Okwa li a ulika kutya okwe lineekela muXe, ndele hangaashi Ovajuda, eshi a ti: “Ngeenge Omona womunhu omwe mu endjelelifa pombada, otamu ka shiiva kutya aame oo a li e na okuuya, nonokutya ihandi longo sha pahalo lange; ndele ohandi popi ashike oinima oyo Tate a honga nge. Ou a tuma nge oku li pamwe naame; ina efa nge, molwaashi ohandi longo alushe osho tashi mu hafifa.” — Johannes 8:28, 29.

Ashike nande ongaho, Ovajuda vamwe ova li va itavela muJesus, na Jesus okwa tya kuvo: “Ngeenge omwa diinine eendjovo dange, nye ovahongwa vange shili, notamu ka shiiva oshili, noshili otai ke mu mangulula.” — Johannes 8:31, 32.

Vamwe kava li ve udite ko oshinima osho shi na sha nokumangululwa. Ova popya tava ti: “Fye oludalo laAbraham nokatu na efiku twa li ovapika vaumwe. Omolwashike to ti, ‘Otamu ka mangululwa’?” Ovajuda ova li ve shii kutya pomhito imwe ova li ovapika, ashike ova li va anya oku ifanwa ovapika. Jesus okwa li a popya kutya natango ove li ovapika, eshi a ti: “Oshili ohandi mu lombwele, keshe ou ta longo oulunde omupika woulunde.” — Johannes 8:33, 34.

Ova li va anya okwiitavela kutya ove li ovapika voulunde, naasho osha li she va tula moshiponga. Jesus okwa ti: “Omupika iha kala meumbo lamwene waye fiyo alushe, ndele omona waye oha kala mo fiyo alushe.” (Johannes 8:35) Omupiya ka li e na efyuululo lasha, nokwa li ta dulu okutewa moilonga efimbo keshe. Ounona voumati ovo va dalwa ile tava tekulwa meumbo ovo ashike va li tava dulu okukala mo “fiyo alushe.”

Oshili kombinga yOmona oyo tai mangulula ovanhu koulunde nosho yo kefyo. Jesus okwa ti: “Omona ngeenge okwe mu mangulula, otamu ka kala mwa manguluka shili.” — Johannes 8:36.