Inda koshikalimo

Inda koshikalimo

 ETUKULWA 59

Omona wOmunhu olyelye?

Omona wOmunhu olyelye?

MATEUS 16:13-27 MARKUS 8:22-38 LUKAS 9:18-26

  • JESUS TA VELULA OMULUMENHU OMUPOFI

  • PETRUS TA PEWA EESHAPI DOUHAMBA

  • JESUS TA XUNGANEKE EFYO NOSHO YO ENYUMUKO LAYE

Eshi Jesus novahongwa vaye va fika muBetsaida, ovanhu ova li va eta kuye omulumenhu omupofi, ndele tave mu indile e mu twikulule.

Jesus okwa li a kwata omupofi mokwooko, ndele te mu twala kondje yoshilando. Konima eshi e mu vaeka omate pomesho, okwe mu pula a ti: “Ou wete shike?” Omulumenhu oo okwa nyamukula ta ti: “Ondi wete ovanhu, ashike otava monika va fa omiti tadi ende.” (Markus 8:23, 24) Eshi Jesus a kwata omulumenhu oo pomesho, okwe mu twikulula. Onghee omulumenhu oo okwa li a twikuluka, na Jesus okwa li e mu tuma a ye keumbo nopehe na okupita moshilando.

Jesus novahongwa vaye ova li va ya komukunda waKesarea Filippi, osho sha li kolundume. Ohapa endwa eekilometa 40 lwaapo, to ende to londo. Mokuyelekanifa nombada yefuta, omukunda oo ou li poima pa londa neemeta 350, nongeenge u li momukunda oo, oho kala u wete omhunda yaHermon ya uvikwa kolumi, koushilolundume. Otashi dulika olweendo olo la li la kwata omafiku onhumba.

Pomhito imwe ofimbo va li mondjila, Jesus okwa li a ya konhele ye likalela opo a ka ilikane. Okwa li te lipula unene kombinga yovahongwa vaye, molwaashi okwa li ashike ku na eemwedi omuwoi ile omulongo lwaapo a fye. Vahapu ova hangwa nale va fiya po Jesus, navamwe ova li va lyalyakana nova teka omukumo. Ovanhu otashi dulika va li te ve lipula kutya omolwashike a anya okuningwa ohamba nonokutya omolwashike ina yandja edidiliko li li oumbangi oo uhe fi okupatanekwa kutya oye lyelye naanaa.

Eshi ovahongwa ve uya konhele oko Jesus a li ta ilikanene, okwa li e va pula a ti: “Ovanhu ohava ti Omona womunhu oye lyelye?” Ova nyamukula va ti: “Vamwe ohava ti oJohannes Omuninginifi, vamwe ohava ti oElia, navakwao ohava ti oJeremia ile umwe womovaprofeti.” Ovanhu vamwe otashi dulika va li tava diladila kutya Jesus oumwe womovalumenhu ovo a nyumunwa. Opo Jesus a shiive kutya ovahongwa vaye otava diladila shike, okwe va pula a ti: “Nye ohamu ti aame lyelye?” Petrus okwa nyamukula a ti: “Oove Kristus, Omona waKalunga omunamwenyo.” — Mateus 16:13-16.

Jesus okwa li a lombwela Petrus kutya oku li omunelao eshi Kalunga e mu hololela oshinima osho, ndele ta weda ko ta ti: “Ohandi ku lombwele yo Petrus: Oivelo yOmbila itai ka finda eongalo lange, molwaashi ohandi ke li tungila kemanya.” Jesus okwa li a hala kutya oye mwene ta ka tunga eongalo pafaneko nonokutya ovanhu ovo va kala ovadiinini otava ka nyumunwa. Onghee okwa li a udanekela Petrus a ti: “Ohandi ke ku pa eeshapi dOuhamba womeulu.” — Mateus 16:18, 19.

Jesus ka li a pa Petrus ondodo yotete mokati kovayapostoli, noka li e mu ninga ekanghameno  leongalo. Jesus oye Emanya oko kwa li taku ka tungilwa eongalo laye. (1 Ovakorinto 3:11; Ovaefeso 2:20) Ndele nande ongaho, Petrus okwa li ta ka pewa eeshapi nhatu. Okwa li ta ka kala e na oshinakuwanifwa shokuyeululila ovanhu omhito yokuya mOuhamba womeulu.

Petrus okwa li a longifa oshapi yotete pOpentekoste 33 O.P., eshi a ulikila Ovajuda nosho yo ovapaani kutya ove na okuninga shike opo va ka xupifwe. Okwa li ta ka longifa oshapi onhivali opo a yeululile Ovasamaria omhito yokuya mOuhamba waKalunga. Mo 36 O.P., okwa li ta ka longifa oshapi onhinhatu opo a yeululile ovo vehe fi Ovajuda, Kornelius nosho yo vamwe omhito yokuya mOuhamba. — Oilonga 2:37, 38; 8:14-17; 10:44-48.

Eshi va li tava kundafana, ovayapostoli vaye ova li va kumwa eshi Jesus a li te va lombwele kutya mafiku ota ka mona oixuna nokufila muJerusalem. Ovayapostoli kava li ve shi shii kutya Jesus ota ka nyumukila omwenyo womeulu, onghee okwa li a ifana po Petrus ndele ta hovele oku mu hanyena, ta ti: “Omwene, ino popya oinima ya tya ngaho; ito ka ningilwa nandenande oinima oyo.” Okwa punguluka, ndele ta ti kuPetrus: “Inda konima yange Satana! Ove endangalati mondjila yange, molwaashi ito diladila ngaashi Kalunga, ndele oto diladila panhu.” — Mateus 16:22, 23.

Jesus okwa li a ifana vali ovanhu vamwe, ndele te va lombwele kutya itashi ka kala shipu okukala omushikuli waye. Okwa ti: “Ngeenge oku na ou a hala okushikula nge, ne lixupule ye mwene nokuhumbata omuti waye womahepeko, ndele ta kala nokushikula nge. Keshe ou a hala okuxupifa omwenyo waye ote u kanifa, nakeshe ou ta kanifa omwenyo waye omolwange nomolwonghundana iwa ote ke u mona.” — Markus 8:34, 35.

Ovashikuli vaJesus ova pumbwa okukala ovaladi nove na omhepo yeliyambo opo va kale va hokiwa kuye. Okwa ti: “Keshe ou ta fi nge ohoni nosho yo eendjovo dange mepupi eli lihe fi lidiinini kuKalunga nolikolokoshi, Omona womunhu naye ote ke mu lidimbika eshi te uya moshinge shaXe pamwe novaengeli vayapuki.” (Markus 8:38) Oshoshili kutya eshi Jesus te ke uya ota “ka futa keshe umwe she likolelela koilonga yaye.” — Mateus 16:27.