Inda koshikalimo

Inda koshikalimo

 ETUKULWA 51

Edipao mefiku loshivilo shedalo

Edipao mefiku loshivilo shedalo

MATEUS 14:1-12 MARKUS 6:14-29 LUKAS 9:7-9

  • HERODES TA TETIFA KO OMUTWE WAJOHANNES OMUNINGINIFI

Eshi ovayapostoli vaJesus tava wanifa po oukalele wavo muGalilea, Johannes oo a li a lombwela vamwe shi na sha naJesus ka li e na emanguluko lokuninga ngaho. Johannes Omuninginifi okwa kala modolongo hanga oule womido mbali.

Johannes okwa li a popya moipafi yovanhu kutya osha puka eshi Ohamba Herodes Antipas ya kufa po Herodias, omukulukadi wamumwaina, Filippus, a ninge omukulukadi waye. Herodes okwa li a efa po omukulukadi waye wotete opo a hombole Herodias. She likolelela kOmhango yaMoses, oyo Herodes a ti oyo ha shikula, ohombo oyo kaya li paveta nova li tava haele. Molwaashi Herodes ka li a hokwa osho Johannes a popya, okwa li e mu kwatifa po noku mu tulifa modolongo, tashi dulika a li a ladipikwa kuHerodias e shi ninge.  

Herodes ka li e shii kutya na ningile shike Johannes molwaashi ovanhu ‘ova li ve mu tala ko e li omuprofeti.’ (Mateus 14:5) Ashike Herodias ka li e udite ngaho. “Okwa li a kwatela onghone Johannes,” nokwa li nokuli a hala oku mu dipaifa. (Markus 6:19) Lwanima, okwa ka mona omhito.

Ofimbo oshivilo shOpaasa inashi ningwa shomo 32 O.P., Herodes okwa li a unganeka oshivilo shinene shedalo laye. Omalenga aeshe novawiliki vomatangakwaita aHerodes nosho yo ovanenenhu vomuGalilea, ova li ve uya koitendele mefiku ledalo laye. Pefimbo loshivilo, Salome, okamonakadona kaHerodias oko a dala nomushamane waye wonale Filippus, oka li ka tumwa ka danene po ovaenda oshidano. Ovalumenhu ova li va hafifwa koshidano shako.

Molwaashi Herodes okwa li a hafifwa kokakadona oko, okwa tya kuko: “Indile nge keshe osho wa hala, opo nee ohandi shi ku pe.” Okwa li nokuli a ana a ti: “Keshe eshi to indile nge, ohandi shi ku pe, kutya nee etata louhamba wange.” Ofimbo Salome ine mu nyamukula, okwa li a ya kuina, ndele te mu pula ta ti: “Nandi indile shike?” — Markus 6:22-24.

Herodias okwa kala ta kongo omhito ya tya ngaho. Okwa nyamukula meendelelo a ti: “Indila omutwe waJohannes Omuninginifi.” Salome okwa li a shuna diva kuHerodes, ndele te mu lombwele ta ti: “Onda hala u pe nge paife omutwe waJohannes Omuninginifi moshiyaxa.” — Markus 6:24, 25.

Osho osha li sha nyikifa Herodes oluhodi neenghono, ashike ovaenda vaye ova li ve mu uda eshi a ana kuSalome. Ota ka kala a fya ohoni ngeenge ina wanifa po eano laye, nokuli nongeenge osho otashi pula a dipae omulumenhu oo ehe na ondjo ya sha. Onghee hano, okwa li a tuma omukwaita waye umwe kodolongo nomalombwelo a nyaya keonga. Diva omukwaita oo okwa li a aluka e na omutwe waJohannes moshiyaxa. Opo nee Herodes okwe u pa Salome, na Salome okwe ke u pa ina.

Eshi ovahongwa vaJohannes ve shi uda, ove uya ndele tava kufa po oshimhu shaye noku ke shi paka. Opo nee ova ka lombwela Jesus osho sha ningwa po.

Lwanima, eshi Herodes a uda kutya Jesus ota velula ovanhu nokuta mo eendemoni, okwa li a tila. Okwa li ta diladila kutya Jesus oo ta longo oikumwifilonga oJohannes Omuninginifi “a nyumuka koufi.” (Lukas 9:7) Onghee Herodes Antipas okwa li a halelela okumona Jesus. Ashike ka li a hala okuuda kombinga yaasho Jesus a li ta udifa. Ponhele yaasho, okwa li a hala okushilipaleka kutya osho a li te lipula nasho osho ngoo ile hasho.