Inda koshikalimo

Inda koshikalimo

 ETUKULWA 62

Oshilihongomwa sha fimana shi na sha nelininipiko

Oshilihongomwa sha fimana shi na sha nelininipiko

MATEUS 17:22–18:5 MARKUS 9:30-37 LUKAS 9:43-48

  • JESUS TA XUNGANEKE VALI SHI NA SHA NEFYO LAYE

  • OKWA FUTA OIFENDELA NOSHIMALIWA SHA DJA MOKANYA KOSHI

  • OLYELYE TA KA KALA MUNENENENE MOUHAMBA WOMEULU?

Jesus okwa li a ya kuKapernaum konima yemoniko nokonima eshi a ta mo ondemoni oyo ya li momumati moshilando shaKesarea Filippi. Okwa li a ya pamwe novahongwa vaye meholeko, opo ovanhu “vehe shi shiive.” (Markus 9:30) Osho osha li sha pa Jesus omhito opo a longekidile ovahongwa vaye efyo laye nosho yo oilonga oyo va li tava ka longa. Okwa li e va lombwela a ti: “Omona womunhu ota ka yandjwa momake ovanhu, notave ke mu dipaa, nomefiku etitatu ota ka nyumunwa.” — Mateus 17:22, 23.

Osha yela kutya ovahongwa vaye halo lotete va li tave shi udu. Jesus okwa hangwa a popya kutya ota ka dipawa, nonande Petrus ka li a itavela kutya osho otashi ka ningwa. (Mateus 16:21, 22) Ovayapostoli vatatu ova li va mona emoniko nova uda kombinga “yokuya” kwaJesus. (Lukas 9:31) Ovashikuli vaye ova li va “nyika oluhodi neenghono” omolwoshinima osho Jesus a popya, nonande kava li ve udite ko filufilu eityo leendjovo daye. (Mateus 17:23) Natango, ova li va tila oku mu pula kombinga yaasho.

Ova li va ya kuKapernaum, oko Jesus a longela oikumwifilonga ihapu, nokwa li haku di ovayapostoli vaye vahapu. Ovalumenhu ovo hava futifa oifendela yotembeli ova li va ya kuPetrus. Otashi dulika va li tava kendabala okulundila Jesus kutya iha futu oifendela, eshi va pula va ti: “Omuhongi weni oha futu ngoo oifendela yotembeli?” — Mateus 17:24.

Petrus okwa li a nyamukula a ti: “Heeno oha futu.” Nonande Jesus okwa li meumbo, okwa li e shii osho sha ningwa po. Ponhele yokuteelela Petrus a popye kombinga yoshinima osho, Jesus okwe mu pula a ti: “Simon, oto ti ngahelipi? Olyelye e na okuyandja oifuta yokeengaba ile oifendela keehamba dokombada yedu? Ovana ile ovanailongo?” Petrus okwa nyamukula a ti: “Ovanailongo.” Eshi Jesus e shi uda, okwa tya kuye: “Oshoshili, ovana ihava futu sha.” — Mateus 17:25, 26.

Xe yaJesus oye Ohamba yedu alishe, Oo ha longelwa kotembeli. Onghee Omona waKalunga ka li a teelelwa a fute oifendela yotembeli. Jesus okwa ti: “Ashike opo tuhe va handukife, inda pefuta, to umbile mo ondjolo, ndele to kufa oshi oyo to kwata tete, nongeenge owa makula okanya kayo, oto hange mo oshimaliwa shoshisilveri [oshimaliwa osho hashi ifanwa otetradrakma]. Shi kufa mo ndele to futu oifendela yoye noyange.” — Mateus 17:27.

Ovahongwa vaJesus ova li va ongala pamwe, nova li tave lipula kutya olyelye ta ka kala munenenene mOuhamba. Ova li va tila okupula Jesus kombinga yefyo laye, ashike pomhito oyo kava li va tila oku mu pula shi na sha nonakwiiwa yavo. Jesus okwa li e shii kutya otava diladila shike. Ova li tava tu eemhata kombinga yoshinima osho eshi va li tava shuna kuKapernaum. Jesus okwe va pula a ti: “Omwa li tamu tu eemhata kombinga yashike mondjila?” (Markus 9:33) Ovahongwa ova li va fya ohoni, ndele tava kala va mwena, molwaashi ova kala tava tu eemhata kutya olyelye munenenene mokati kavo. Xuuninwa, ovayapostoli ova ka pula Jesus epulo olo va kala tave lipula, va ti: “Olyelye hano munenenene mOuhamba womeulu?” — Mateus 18:1.

Ovahongwa ova kala tava tale osho Jesus a li ta ningi nokupwilikina kuye hanga oule womido nhatu. Ova kala hava tu eemhata omolwokuhawanenena. Ova kulila momudingonoko mu na  omalongelokalunga oo a lenga eendodo. Natango, Petrus okwa li a uda nale eudaneko olo Jesus a li e mu udanekela loku mu pa “eeshapi” dOuhamba. Otashi dulika a li e udite e dule vakwao. Jakob naJohannes otashi dulika navo va li ve udite ngaho eshi va li va mona emoniko laJesus.

Jesus okwa li a katuka onghatu opo a pukulule etaleko lavo. Okwa li a ifana okaana, ndele te ka kaleke ofika mokati kavo, ndele ta ti kovahongwa: “Oshili ohandi mu lombwele, itamu ka ya mo nandenande mOuhamba womeulu, okuninga shapo tamu lidilulula ndele tamu kala ngaashi ounona. Onghee hano, keshe ou te lininipike ngaashi okaana aka oye omunenenene mOuhamba womeulu, ndele keshe ou ta tambula okaana ngaashi aka medina lange, okwa tambula nge yo.” — Mateus 18:3-5.

Oyo oya li onghedi ya denga mbada yokuhonga. Jesus ka li a handukila ovahongwa vaye noka li e va ifana kutya ovanalwisho ile kutya ova lenga eendodo. Ponhele yaasho, okwa li a longifa oshinima shi wetike opo e va honge oshilihongomwa. Ounona vanini ihava kala ve na eendodo ile va fimanekwa. Jesus okwa li ta kwafele ovahongwa vaye kutya ova pumbwa okukala ve na etaleko la tya ngaho. Jesus okwa li a xulifa oshikundafanwa osho a li ta hongo ovashikuli vaye, a ti: “Osheshi keshe ou munini mokati keni oye munene e mu dule.” — Lukas 9:48.