Inda koshikalimo

Inda koshikalimo

 ETUKULWA 95

Jesus ta hongo shi na sha neteyohombo nosho yo ohole yokuhola ounona

Jesus ta hongo shi na sha neteyohombo nosho yo ohole yokuhola ounona

MATEUS 19:1-15 MARKUS 10:1-16 LUKAS 18:15-17

  • JESUS OKWA POPYA NGHEE KALUNGA HA TALE KO ETEYOHOMBO

  • OSHALI YOKUKALA INO HOMBOLA ILE INO HOMBOLWA

  • OTWA PUMBWA OKUKALA NGAASHI OUNONA

Jesus novahongwa vaye ova li va tauluka omulonga waJordan va dja kuGalilea va yuka kuPerea. Oshikando shaxuuninwa osho Jesus a li muPerea, okwa li a lombwela Ovafarisai efinamhango li na sha neteyohombo. (Lukas 16:18) Ovafarisai ova li natango va eta po oshikundafanwa osho opo va yeleke Jesus.

Moses okwa shanga kutya omukainhu ota dulu ashike okuhengwa ngeenge omulumenhu okwa ‘mono sha muye shii.’ (Deuteronomion 24:1) Ovanhu ova li ve na eteleko la yoolokafana li na sha nokuteya ohombo. Vamwe ova li va itavela kutya ovanhu otava dulu okuteya ohombo nomoinima inini. Opo nee Ovafarisai ova pula va ti: “Oshi li tuu pamhango omulumenhu a teye ohombo nomukulukadi waye omolwoshinima keshe?” — Mateus 19:3.

Ponhele Jesus a popye omadiladilo opanhu, okwa li a popya shi na sha netaleko lomutoti wohombo, Kalunga, a ti: “Hamba inamu lesha kutya ou e va shita pehovelo okwe va ninga omulumenhu nomukainhu? Nokwa ti: ‘Nomolwaasho omulumenhu oku na okufiya po xe naina ndele ta kanyatele komukulukadi waye, ndele tava ningi onhumba imwe.’ Onghee kave fi vali vavali, ndele onhumba imwe. Hano osho Kalunga a tula kumwe, inashi kufwa kumwe komunhu.” (Mateus 19:4-6) Eshi Kalunga a hombolifa Adam naEva, okwa li a hala ohombo yavo i kalelele.

Opo nee Ovafarisai ova li va tomhafana naJesus tava ti: “Omolwashike hano Moses a yandja elombwelo opo pa yandjwe ombapila yeteyohombo ngeenge omukulukadi ta hengwa po?” (Mateus 19:7) Jesus okwa tya kuvo: “Moses okwe mu pitika mu teye ohombo novakulukadi veni omolwoukukutu womitima deni, ashike osho hasho sha li ngaho okudja pehovelo.” (Mateus 19:8) ‘Ehovelo’ olo kala li pefimbo laMoses, ndele osheshi Kalunga a tota po ohombo muEden.

Jesus okwa li e va lombwela oshili ya fimana, a ti: “Ohandi mu lombwele kutya keshe ou ta teya ohombo nomukulukadi waye omolwoshinima shimwe shihe fi oluhaelo [MOshigreka, por·neiʹa], ndele ta hombola umwe, ota haele.” (Mateus 19:9) Oluhaelo olo ashike la tumbulwa mOmbiibeli li li etomheno lokuteya ohombo.

Osho osha li she linyengifa ovahongwa va popye tava ti: “Ngeenge omulumenhu osho e na okukala nomukulukadi waye ngaho, mboli inashi wapala okuhombola.” (Mateus 19:10) Osha yela kutya keshe oo ta lalakanene ohombo oku na oku i tala ko i li oshinima tashi kalelele.

Shi na sha nokuhaya mohombo, Jesus okwa li a popya kutya ope na ovo va dalwa ovalutulwa, vehe na omahalo opamilele. Ashike vamwe ove shi ningwa kovanhu vakwao. Vo vamwe ova hoolola owina okuhahombola ile okuhahombolwa mokukala tava pangele omaliudo avo. Ohave shi ningi nelalakano lokuyandja elitulemo filufilu koinima yOuhamba. Jesus okwa li a ladipika ovapwilikini vaye a ti: “Ou ta dulu oku shi ninga [okukala ina hombola ile ina hombolwa] ne shi ninge.” — Mateus 19:12.

Ovanhu ova li va hovela okutwala ounona vavo kuJesus. Ashike ovahongwa ova li ve va hanyena nonyanya vaha twale ounona vavo kuye opo vehe mu piyaaneke. Eshi Jesus eshi mona, okwa li a handuka ndele ta ti kuvo: “Efeni ounona ve uye kwaame, inamu va kelela ko. Osheshi Ouhamba waKalunga owaava ve li ngaashi vo. Oshili ohandi mu lombwele, keshe ou ita tambula Ouhamba waKalunga ngaashi okaana, ita ka ya mo nandenande muo.” — Markus 10:14, 15; Lukas 18:15.

Osho oshilihongomwa sha fimana. Opo tu ka  fyuulule Ouhamba waKalunga, otwa pumbwa okukala ovalininipiki notu na ehalo lokuhongwa ngaashi ounona. Jesus okwa li a ulikila ounona ohole moku va ukata noku va nangeka noupuna. Oha ulikile aveshe ohole ovo tava “tambula Ouhamba waKalunga ngaashi okaana.” — Lukas 18:17.