Inda koshikalimo

Inda koshikalimo

 ETUKULWA 87

Longifa ounongo

Longifa ounongo

LUKAS 16:1-13

  • EFANEKO LI NA SHA NELENGA OLO LIHE FI LIYUKI

  • “LIKONGELENI NEMONA OOKAUME”

Efaneko lomumati oo a li a kana, olo Jesus a hangwa opo a popi, otashi dulika la li la kwafela ovafendelifi, ovanongo vomishangwa nOvafarisai va mone kutya Kalunga okwa halelela okudimina po ovalunde ovo ve lidilulula. (Lukas 15:1-7, 11) Ashike pomhito oyo Jesus okwa li ta popi novahongwa vaye. Okwa li a longifa efaneko limwe li na sha nomulumenhu oshipuna oo a li a mona kutya elenga olo hali pashukile eumbo laye otali longifa nai oinima yaye.

Jesus okwa li a popya kutya elenga ola li la lundilwa kutya otali longifa nai oinima yomwene walo. Opo nee mwene walo okwa ti otali lekelwa mo moilonga. Elenga ola li le lipula tali ti: “Ondi na okuninga po shike eshi omwene wange a kufa nge oshinakuwanifwa shokukala elenga? Itandi dulu oilonga yomepya nonda fya ohoni oku ka ehela.” Ola li la fika pexulifodiladilo shi na sha naasho tali ka ninga po, la ti: “Ondi shii kutya ohandi ningi po shike opo ovanhu va ka tambule nge momaumbo avo ngeenge nda kufwa oshinakuwanifwa shokukala elenga.” Opo nee ola ifana diva keshe oo e na oikolo yomwene walo, ndele tali va pula tali ti: “Ou na oikolo yomwene wange i fike peni?” — Lukas 16:3-5.

Wotete okwa nyamukula a ti: “Omaadi eemono eelitela 2 200.” Oo a li e na oikolo oyo otashi dulika a li e na oshikunino sheemono ile ha landifa omaadi oo. Elenga ola tya kuye: “Kufa omukanda woye weudafanotwokumwe, kala omutumba ndele to shange po divadiva eelitela 1 100.” — Lukas 16:6.

Opo nee elenga ola pula vali umwe la ti: “Ove ou na oikolo i fike peni?” Okwa nyamukula a ti: “Oilya eendoloma efele limwe.” Elenga ola li la lombwela oo e na oikolo la ti: “Kufa omukanda woye weudafanotwokumwe, ndele to shange po eendoloma 80.” Okwa li a ninipika oikolo oyo neepersenda 20. — Lukas 16:7.

Elenga ola li natango tali pashukile oinima yomwene walo, sha hala kutya ola li li na oufemba wokuninipika oikolo. Eshi la ninipika oikolo yavo, kungaho otali pange oukaume naavo tashi dulika ve ke li kwafele ngeenge ola di mo moilonga.

Lwanima, mwene okwe ke shi uda. Nonande osho sha li sha ningwa po osha li she mu kanififa oimaliwa yaye, okwa li a kumwa nokupandula elenga molwaashi “nonande kala li hali longo ouyuki” ola li “la katuka pandunge.” Jesus okwa weda ko a ti: “Ovana vounyuni ou ohava ungaunga pandunge navakwao ve dule ovana vouyelele.” — Lukas 16:8.

Jesus ka li a tokola eenghedi odo elenga la longifa, ye ka li te li ladipikile oulingilingi u na sha nokungeshefa. Ndele mbela okwa li a hala okutya shike? Okwa li a ladipika ovahongwa vaye a ti: “Likongeleni nemona loulunde ookaume, opo ngeenge ola xulu po ve mu tambule meenhele daalushe.” (Lukas 16:9) Oshilihongomwa oshosho  kutya otu na okukala twe lilongekida komesho yefimbo nokukatuka pandunge. Ovapiya vaKalunga, ovo ve li “ovana vouyelele,” ova pumbwa okulongifa oiniwe yavo pandunge ve na momadiladilo eteelelo li na sha nonakwiiwa.

Jehova Kalunga nosho yo Omona waye ovo ashike tava dulu okutambula ovanhu mOuhamba womeulu ile mOparadisa kombada yedu koshi yOuhamba. Onghee otwa pumbwa okuninga eenghendabala tu pange oukaume navo mokulongifa oiniwe yetu tu yambidide oilonga oyo tai xumifa komesho Ouhamba. Ngeenge otwa ningi ngaho, eshi oishiliveli, oingoli noikwamaliko ikwao tai ka xula po, ohatu ka xupifwa nokumona omwenyo waalushe.

Jesus okwa ti kutya ovo vadiinini mokufiloshisho oiniwe yavo, otava ka kala yo ovadiinini mokufiloshisho oinima oyo ya fimanenena. Okwa ti: “Onghee hano, ngeenge ihamu ulike oudiinini weni shi na sha nemona loulunde, olyelye te ke mu lineekelela e li lashili [ngaashi oinima i na sha nOuhamba]?” — Lukas 16:11.

Jesus okwa li ta lombwele ovahongwa vaye kutya otava ka pulwa shihapu ngeenge ova ‘tambulwa meenhele daalushe.’ Umwe ita dulu okukala omupiya washili waKalunga, nopefimbo opo tuu opo oku li omupiya wemona loulunde. Opo nee okwa xulifa neendjovo odo tadi di: “Kape na omupiya ta dulu okulongela oovene vavali, osheshi ota tondo umwe ndele ta kala e hole mukwao, ile ta kanyatele kuumwe ndele ta dini mukwao. Itamu dulu okulongela Kalunga pamwe nemona.” — Lukas 16:9, 13.