Inda koshikalimo

Inda koshikalimo

 ETUKULWA 57

Jesus ta velula okakadona nosho yo omulumenhu ombolo

Jesus ta velula okakadona nosho yo omulumenhu ombolo

MATEUS 15:21-31 MARKUS 7:24-37

  • JESUS TA VELULA OKAMONAKADONA KOMUKAINHU OMUFOINIKIA

  • TA VELULA OMULUMENHU OMBOLO

Konima eshi Jesus a nyaneka pomutenya oihelele yOvafarisai i na sha neenghulunghedi davo, okwa li a ya pamwe novahongwa vaye. Okwa li a enda eekilometa dihapu a yuka koshitukulwa shaTirus naSidon shomuFoinikia, kouningininolundume.

Jesus okwa li a ya meumbo limwe, ndele ka li a hala okumonika nande okomunhu. Ashike osho kasha li tashi shiiva. Omukainhu umwe oo a li Omugreka nokwa dalelwa moshitukulwa osho, okwa li a mona Jesus ndele te mu indile ta ti: “Omwene, Omona waDavid, file nge onghenda! Omonakadona wange ota monifwa oixuna neenghono kondemoni.” — Mateus 15:22; Markus 7:26.

Konima yefimbo, ovahongwa vaJesus ova li ve mu indila tava ti: “Mu lombwela a ye, shaashi ota ingida ashike e tu shikula.” Opo Jesus a ulike kutya omolwashike ite mu nyamukula, okwa ti: “Inandi tumwa ndi ye kovanhu vamwe, kakele keedi odo da kana domeumbo laIsrael.” Ashike omukainhu oo ka li a sholola. Okwa li a ya kuJesus nokulinyongamena puye, ta ti: “Omwene, kwafele nge!” — Mateus 15:23-25.

Jesus okwa li a popya kombinga yetaleko lii lOvajuda li na sha novanhu ovo va dja momihoko dimwe opo a yeleke eitavelo lomukainhu oo, a ti: “Inashi yuka okukufa omungome wounona ndele to u ekele koumbwena.” (Mateus 15:26) Eshi Jesus a popya kombinga ‘youmbwena,’ okwa li ta ulike kutya oku na ko nasha naavo vehe fi Ovajuda. Omalinyengo aye okoshipala nosho yo onghedi omo a li ta popi oya ulika kutya oku na ko nasha navo shili.

Ponhele omukainhu oo a handuke, naye okwa li yo a popya shi na sha nonhondo yOvajuda nokwa popya nelininipiko a ti: “Ou li mondjila Omwene, ashike oumbwena ohava li oundjaumukile ovo hava u koshitaafula shoovene vavo.” Eshi Jesus a mona kutya oku na omutima muwa, okwe mu lombwela a ti: “Eitavelo loye olinene; ningilwa ngaashi wa hala.” (Mateus 15:27, 28) Naasho osho sha li sha ningwa nonande okakadona ka ka li opo va li. Eshi omukainhu oo a shuna keumbo, okwa hanga okamonakadona ka nangala kombete ka veluka, “nondemoni oya li ya dja mo muko.” — Markus 7:30.

Jesus novahongwa vaye ova li va ya komulonga waJordan va dja koshitukulwa shaFoinikia. Ova li va tauluka omulonga waJordan oo u li kolundume lefuta laGalilea nokuya moshitukulwa shaDekapolis. Ova li va ya komhunda i li oko, neengudu dinene dovanhu oda li de uya kuvo. Ovanhu ova li va etela Jesus oingudu, oilema, ovapofi nosho yo ovafitandaka. Ova li ve va tula peemhadi daye, ndele te va velula. Ova li va kumwa, ndele tava hambelele Kalunga kaIsrael.

Jesus okwa li a yandja elitulemo komulumenhu umwe oo a li ombolo noiha dulu okupopya nawa. Oshi shii okuudiwa ko eshi omulumenhu oo a li a tila eshi a li mongudu yovanhu. Otashi dulika Jesus a didilika kutya omulumenhu oo okwa tila, nokwa li e mu kufa mo mongudu yovanhu. Eshi va ya konhele ye likalela, Jesus okwa li a ulika kutya oshike ta ka ningila omulumenhu oo. Okwa li a tula ominwe daye momatwi omulumenhu oo nokwa fiya omate, ndele te mu kwata kelaka. Opo nee okwa li a tala keulu nokwa popya outumbulilo wOshijuda umwe oo tau ti “Fituluka.” Omatwi omulumenhu oo okwa li a fituluka, ndele ta hovele okupopya. Jesus ka li a hala oshinima osho shi shiivike molwaashi okwa li a hala ovanhu va itavele muye omolwoinima oyo va mona nova uda. — Markus 7:32-36.

Eshi Jesus a longa oikumwifilonga oyo, ovanhu  ovo va li po ova li ve shi “kuminwa neenghono.” Ova ti: “Oilonga yaye aishe oya wapala. Okwa fitulula omatwi eembolo nokwa ningifa ovafitandaka va popye.” — Markus 7:37.