Inda koshikalimo

Inda koshikalimo

 ETUKULWA 66

Jesus e li muJerusalem kOshivilo shOmatwali

Jesus e li muJerusalem kOshivilo shOmatwali

JOHANNES 7:11-32

  • JESUS TA HONGO MOTEMBELI

Jesus okwa li a shiivika nawa konima yeninginifo laye. Ovajuda vahapu ova li va mona oikumwifilonga yaye, nonghundana kombinga yoilonga yaye oya li ya tandavela apeshe. Pefimbo lOshivilo shOmatwali muJerusalem, ovanhu vahapu ova li tava kongo Jesus.

Ovanhu ova li ve na etaleko la yoolokafana shi na sha naJesus. Vamwe ohava ti: “Omulumenhu e li nawa.” Ofimbo vamwe hava ti: “Omulumenhu oo ke li nawa, ota pukifa ovanhu.” (Johannes 7:12) Ovanhu ova li va popya oinima oyo eshi oshivilo osho sha li metifa. Ashike kape na oo a li e na ouladi wokupopila Jesus molwaashi ova li va tila nghee ovawiliki vomalongelokalunga Oshijuda tave ke linyenga ngeenge ove shi udu.

Ofimbo Jesus ina fika koshivilo, okwa li a ya kotembeli. Ovanhu vahapu ova li va kuminwa onghedi yaye yokuhonga. Molwaashi ka li a ya keefikola dooRabbi, Ovajuda ova li va kumwa, ndele tava ti: “Osha enda ngahelipi opo omulumenhu ou a kale e na eshiivo lOmishangwa ye ina hongwa keefikola dopalongelokalunga?” — Johannes 7:15.

Jesus okwe va nyamukula a ti: “Ehongo olo handi hongo kali fi lange, ndele ola dja kwaau a tuma nge. Ngeenge oku na ou a hala okulonga ehalo laKalunga, ota ka shiiva kutya osho handi hongo osha dja kuKalunga ile ohandi popi omadiladilo ange mwene.” (Johannes 7:16, 17) Omahongo aJesus oku li metwokumwe nOmhango yaKalunga, naasho osha yela kutya okwa li ta fimanekifa Kalunga ndele haye mwene.

Jesus okwa ti: “Hamba Moses ine mu pa Omhango? Ndele kape na nande oumwe womunye ha dulika kuyo. Omolwashike mwa hala okudipaa nge?” Vamwe ovo va li mongudu oyo otashi dulika va li ovaenda ovo vehe fi vomoshilando osho, nokava li ve shii eemhangela odo. Kava li va itavela kutya ope na oo a hala okudipaa omuhongi ngaashi ye. Onghee ova li va fika pexulifodiladilo kutya pamwe ope na sha sha puka eshi Jesus a popya ngaho. Ongudu yovanhu oya ti: “Ou na ondemoni. Olyelye a hala oku ku dipaa?” — Johannes 7:19, 20.

Konima yodula netata eshi Jesus a velula omulumenhu mefiku lEshabata, ovawiliki vomalongelokalunga Oshijuda ova li va hala oku mu dipaa. Jesus okwa li a tomhafana navo opo a nyaneke pomutenya osho va li tava diladila. Okwa li a popya kutya koshi yOmhango okaana kokamati oke na okupitifwa etanda ngeenge oka wanifa omafiku ahetatu, nonande omefiku lEshabata. Opo nee Jesus okwe va pula a ti: “Ngeenge ovalumenhu ohava pitifwa etanda meshabata opo ku diininwe Omhango yaMoses, omolwashike mwa handukila nge unene eshi nda velula omunhu meshabata? Inamu tokola vali she likolelela keholokepo lokombada, ndele tokoleni etokolo la yuka.” — Johannes 7:23, 24.

Ovakalimo vomuJerusalem ovo va li ve shii onghalo oyo ova popya va ti: “Hano omulumenhu ou haye va li va hala okudipaa? Taleni, ota popi moipafi, ashike itava ti sha kuye. Mbela ovapangeli ove shi shii kutya ou oye Kristus?” Ndele omolwashike ovanhu inava itavela kutya Jesus oye Kristus? Ova nyamukula va ti: “Fye otu shii apa pa dja omulumenhu ou, ashike Kristus ngeenge okwe uya, kape na ou ta ka shiiva apa a dja.” — Johannes 7:25-27.

Eshi Jesus a li motembeli, okwa nyamukula a ti: “Omu shii nge nomu shii apa nda dja. Ashike inandi uya kwaame mwene, ndele ou a tuma nge oko e li shili, ashike kamu mu shii. Ame ondi mu shii, molwaashi oye a tuma nge nondi li omukalelipo waye.” (Johannes 7:28, 29) Eshi a popya eendjovo odo, ovanhu ova li va hala oku mu kwata  po noku mu tula modolongo ile oku mu dipaa. Ashike nonande ongaho, eemhangela davo oda li da ponya molwaashi efimbo laJesus lokufya ka la li la fika.

Ovanhu vahapu ova li va itavela muJesus. Okwa li a enda kombada yomeva, a lotifa omhepo, a kutifa ovanhu omayovi nomingome neeshi dinini, a velula ovanhu, a ningifa oingudu i ende, a twikulula omesho ovapofi, a velula ovanashilundu nokwa nyumuna ovafi. Ova li ve na etomheno liwa, eshi va pula va ti: “Ngeenge Kristus okwe uya, mbela ota ka longa ngoo oikumwifilonga ihapu i dule ei ya longwa komulumenhu ou?” — Johannes 7:31.

Eshi Ovafarisai va uda ongudu yovanhu tai popi oinima oyo, ova li va lombwela ovapristeri ovakulunhu va tume ovakwaita va ka kwate po Jesus.